文章日期：06/21/2012 12:14 am
日出 Mt Everest
2012.05.27 愈上愈有勁，行吓噏吓又到珠峰營。
好似過咗好耐，睇下日曆，原來返回袋鼠國只有十日。18號早上到，當日下午就返鋪頭開工，跟住就係停唔到嘅工作！你話如果唔係咁上下時間，四圍去吓，咁好淒涼啫！不過四圍去係要盤川嘅，希望來年袋鼠國生生性性，經濟飛躍，等我揾多啲銀，咁我又可以孭起背囊，四圍去也。
快啲總結吓今次旅行，遲啲就唔記得。
上次由古巴返嚟，就有去尼泊爾嘅念頭，2011年，大小姐重送咗本Loney Planet Nepal俾我做生日禮物，我冇嘥佢一番心事，呢本書真係跟咗我去尼泊爾行咗一轉。
我四圍打聽有關尼泊爾行山嘅資料，咁啱我有個客跟過一個團，佢大力推薦俾我。經一番網上比較，我鎖定呢間叫Himalaya Glacier Trekking 嘅旅行社，並選定佢嘅19日Everest Base Camp Trekking。今次多謝井少，係佢一手一腳聯絡HGT。
而家，我亦大力推薦HGT，係做得好好。
既然去到尼泊爾，冇話行完山就走。於是再用多一周時間去多兩個地方，最後選定南部嘅Chitwan 國家公園，同位於北部嘅第二大城市Pokhara。定行程，訂旅館不在話下。
旅行前居然有餞行飲茶，亦係一大創舉，多謝各位好友相送，這廂謝過喇。更有馬仔賢伉儷接送到機場，一齊享用美心雞翼义飯凍鴛鴦，先至上機，實在難得。
由香港飛加德滿都只需五粒鐘，喺飛機至知，原來尼泊爾同香港時差係兩小時十五分，又會咁古怪！到步時係夜晚11點幾，因為參加行山團，有人嚟接機，感覺十分良好。
喺加德滿都前後留咗五日，住喺Thamel區，係百分之百嘅遊客區。區內店鋪都係以服務遊客為主，旅館、餐廳、遊客紀念品商店等。不過，最獨特嘅應該係：行山用品專門店、與及組織行山嘅旅行社。呢啲應該係尼泊爾嘅特色工業。旅遊業係尼泊爾嘅最大收入來源，其中，多數人都係慕名山而來，我就係其中一個。鬼唔係咩，世界十大高山，有八個喺尼泊爾境內。
加德滿都，除咗幾條主幹綫外，所有路都好窄，人多車多，加埋單車，三輪車，電單車。喺路上行，我覺得好唔舒服，成日要睇住路面情況，又要避車，又要避人，行得好緊張。由於路窄嘅原因，呢度興用一隻Suzuki車仔做的士。如果車太大，連轉彎都有問題。車細到連行李箱都冇，所有車仔都有個頂架，行李就擺噝車頂。
作為首都，加現滿都顯得十分窮。三個字去形容：爛溶溶。行咗幾日，到處都見到拆爛咗，又仍然住緊人嘅樓。路邊堆滿拆出嚟嘅爛磚瓦，一堆堆山仔咁高嘅垃圾…。沿舊皇宮行，行人路凹凸不平，一個二個大地窿。連皇宮都係咁，呢個政府都好窮。
話雖如此，我踫到嘅人都好友善，冇乜遇到蠱蠱惑惑嘅人。人與人之間嘅相處，感覺好和諧，都幾舒服。我哋租咗隻艇仔，我問，就咁擺隻艇仔喺岸邊，會唔會俾人偷？佢話，唔怕，呢度係尼泊爾唔係印度。……
今趟到尼泊爾，主要目的係行去Everest Base Camp (5365m)。一年前已作準備，行山靴要預早著到熟晒至得，背囊等亦一早買定。去年九月入西藏，係一次十分好嘅演練，我喺拉薩（3800m）跑步，喺珠峰營地酒店（5200m）上落樓梯。俾咗我好大信心。話雖如此，我唔擔心我嘅耐力同肌力，我擔心我條大陣，同埋膝頭，呢啲軟組織，我受過傷，經常會痛。好彩由頭到尾都冇事，重好似愈行愈fit，多謝上天庇祐。
開步行嘅地方叫Lukla，喺加德滿都東北百幾公里。只有兩個方法去Lukla，一係用腳行，一係用翼飛。一早已經知道Lukla機場係世界數一數二最危險機場，跑道只有500m長，20m闊。機師要有特別牌照，先至可以飛呢個機場。我第一次搭螺旋槳飛機仔，覺得好刺激。到達Lukla時，企喺機場外睇飛機升降，絕對係精彩節目之一。
行程設計係用10日時間上山，由Lukla行上Base Camp，其中兩日休整acclimatisation，一次喺升過3000m時，另一次喺升過4000m。再用5日行番落山。結果，我哋好fit，上山落山各慳一日，只用13日行完全程。
由Lukla行上Base Camp，實在係沿住Khumbu Valley，一直向北行。由2800m嘅Lukla行到上5545嘅Kala Pathar。一路行，睇住啲雪山愈行愈近。愈上得高，就愈大風，亦愈凍。我低估咗温度，以為行起上嚟會好熱，夜晚入咗屋，凍極有限啩！點知原來任你點行，凍風吹埋嚟，一啲都唔覺熱，一滴汗都冇，停喺度幾秒鐘，就凍到飛起。到夜晚，外面應該零下幾度，房裡面冇電、冇發熱設備，成晚只得零度至兩、三度。掂到乜嘢都係凍鐵鐵嘅，梗係喇，我直情係瞓咗喺個雪櫃裡面。你試吓夜晚將衫褲擺喺雪櫃，第二朝起身，將雪到凍晒嘅衫褲着上身，你就知道我每朝起身嘅感受。所以井少醒目，根本唔換瞓覺衫，夜晚着定第二日嘅衫一齊瞓，第二朝起身就暖笠笠喇。
我哋都係凍幾日啫，咁嘅環境，點生活？要喺呢啲環境住一生一世，實在艱難！
初初入山區，頭幾日喺二千幾高度行，又有樹林，又有村落。上吓上吓，冇晒樹，都有草。過咗四千，草地變得稀疏，見到嘅就係石！石！石！石！石！大石，中石，細石。水成岩，火成岩、變質岩。當地人好識利用石。石屋、石牆、石路，乜都用石。不過如果落斜路就好麻煩，一個唔小心，踩到碎石，随時跣低。
好多人都問我有冇高山反應。過咗四千就有，就係瞓得唔好同埋冇胃口。喺五千時，直情成晚冇得瞓。到珠峰營地前幾日，完全唔想食嘢，每日只食兩三隻烚蛋，幾箸麪。又唔食得，又唔瞓得，唔知點解，仍然咁行得，我覺得，我真係幾得！
五月二日下午，行到第9日，終於登上珠峰營地，係非常感動嘅一刻。井少話一路行一路喊，一方面當然因為周圍靚得交關，更重要嘅係辛勞多日，收成日子終於來臨。而我一早已經預備好做三件事：
其一，手揮袋鼠旗影相。冇難度吖，影多幾張，預備放大佢，擺喺鋪頭，等啲客睇吓。
其二，口琴演奏袋鼠國非正式國歌Waltzing Matilda。珠峰營地高5365m，氧氣含量只得一半，吹吹吓，發覺唔係幾夠氣，首歌吹到斷撅禾蟲，冇法喇，都收貨喇。
最後，打三個側手翻。 四圍揾平地，邊有？呢度係冰川面，全部係碎石。唔理嘞，揾到一條較長嘅地方，一個，兩個…..三個。唔多順，都算可以喇。
全個行程，呢一日行得最多路。由營地行返客棧，我覺得我個靈魂唔知去咗邊。剩係識行行行，好一副行屍走肉。
行過Everest Base Camp Trek嘅人，知你去過EBC，一定會再問，有冇上Kala Pathar？Kala Pathar係EBC西面一個山頭，高5545m。朝早6點，由客棧行上山頂，個零鐘攪掂。喺五千五爬山，係我嘅紀錄。空氣稀薄，冇可能一口氣上到。咁上下就要回一回氣，都需要體力同意志。上得高望得遠，坐喺五千五山頭向東望，珠峰群山、冰瀑布、成條Khumbu冰川，由頭睇到尾，值回票價喇！
真係要多謝天公造美。搭飛機出入Lukla好好天，入山區，一路都好天。入珠峰營地前，落起雪。好彩入珠峰當日，及上Kala Pathar都好好天，如果落雪就好麻煩。一離開Kala Pathar，當日下午就落起大雪。跟住四日，每日下午都落雪或落雨，天公，多謝包涵。
主菜講完，甜品係8日觀光輕鬆遊（請睇我個blog）。兩日去Chitwan國家公園。本來兩日嘅Porkhara，變成四日。唔覺意睇到尼泊爾全國大罷工。尼泊爾議會將要完結，臨時憲法仍未出台，各政黨正争取曝光，尤以毛派最為激進，發動全國大罷工，組織城鎮居民，阻塞交通要道。我哋行程當然受阻，但係始終係人哋家事，我對尼泊爾政治一竅不通，唔識講。
因為罷工原因，木來諗住搭巴士由Porkhara返加德滿都，改坐飛機。返到加德滿都至知，一架由Porkhar飛Jomson嘅飛機失事，15個由印度嚟嘅朝聖者遇難。呢班機應該係早我哋兩個鐘飛。驚驚！
今次旅行創咗好多紀錄：
-連續行咗150km,
-行上最高5545m
-4950m冲涼
-冰川上打側手翻
-………重冇冇呢？
下次去邊度？
後記，1977年12月同井少去過湖南，35年再次同行，真有緣。
全篇完
要睇相片集，請上飛事卜：
`
