Patan 皇宮、廟宇 群
2012.05.15 Day 25 Phaktapur and Patan 一日遊
旅店房雖然有冷氣，成個尼泊爾電力供應都唔穩定，成晚又開又停，好彩夜晚唔多熱，都算好瞓。好早起咗身，就喺附近食早餐。
約咗架車9點，司機非常專業，準時9點已喺大門口等緊。呢架唔係Suzuki車仔，而係稍大嘅日產房車，用尼泊爾水準，係靚車喇。跳上車出發。正係返工返學時間，成街都係人同車，十分擠逼。駛到一處大路，前面封路，所有車被逼左轉，再駛入窄窄嘅橫街。僅夠一架車過嘅窄巷，堆滿大車細車，連巴士都有。當然亦有行人、單車、同理左穿右插嘅電單車，大家塞理一堆，各人施展渾身解數，要揾路出番去。攪咗一大餐，終於離開窄巷，出番大路。
以為先去Patan，原來司機先車我哋去Phaktapur，Phaktapur喺加德滿都東面唔夠10km嘅市郊。司機泊好車，陪我哋去Durbar Square，皇宮廣場。就咁睇，皇宮廣場根本就係街嘅一部份，本地人就咁來來往往，但遊客就要買飛。友邦人民（SAARC），如印度等，就收平啲，呢度連中國人都收平啲。我冇中國護照，用張回鄉咭都搏到懵，咁又慳番一筆。
方便瞭解，我哋請咗個導遊。皇宮廣場，梗離唔開皇宮，同周邊嘅廟宇。而家冇皇帝，舊皇宮成為博物館，而廟宇亦分佛教同印度教。又因呢兩個宗教，好多嘢都相同，所以互相入對方嘅寺廟參拜絕冇問題，兩教相處和洽。
寺廟彿塔一定有好多雕刻，除咗滿天神佛外，最奇特嘅，係有啲斜撑住屋簷嘅柱上面嘅雕刻。呢啲柱，先用大部份面積雕咗普通嘅佛像，而下方則雕咗極其露骨嘅春宮圖。據導遊解釋，以往早婚，女仔十歲就嫁人，根本唔明兩性之事，呢啲圖就係教材。信不信由你嘞！
呢度遊人好少，行得都好舒服。又有導遊帶住，唔駛傷神睇地圖，十分他條也！
好快又睇完，行去揾番司機。車向西行，好快就去到Patan。又係睇Durbar Square，又要買飛，今次中國居民冇着數，要買全票，冇得慳！
又請個導遊，原來又係皇宮、廟宇、連春宮雕刻都大致相同。根本成個set up都大致一樣。最有趣嘅反而係行街時睇到一般市民嘅日常生活。細路仔喺喺邊食飯、婦女打井水洗衫等小城即景，都好有趣味。
Patan 就貼住加德滿都南端，跳上車向北駛，一陣就返到旅館，行咗成朝，風塵樸樸，冲番個涼。兩點幾，雖然未食晏，又唔係好肚餓，去附近餐館，飲支啤食碟雞翼炸薯條，最緊要係有得上網。
Hea 吓Hea吓又一個下午，再食一個豐富晚餐，跟住亨受最後一晚尼泊爾之夢……。
No comments:
Post a Comment