返回 Lukla 紀念拱門，終點衝綫
哈哈哈，今日係成個行山之旅嘅最後一日，Finale喇。個個都好興奮。根據計劃，今日要行嘅路程，實在係兩日嘅行程。事不宜遲，一早出發。
整體趨勢都係落落落落落，所以行進速度都幾快。邊行邊見到好多倒下嘅大樹，原來係最近嘅一場風暴，吹倒唔少大樹，好多好粗壯嘅，都連根拔起，個風一定好勁。原來山上樹林係禁止砍伐，不過倒咗嘅就另計。村民即刻喺倒樹旁築起鎅木小作坊。將十幾廿米長嘅大樹成棵橫放喺高台上。台上台下各一人，各攞往巨型大鋸嘅一端，上下上下鋸成一塊塊樹咁長嘅長木板，即係好似fillet棵樹。當然喇，木板愈長愈值錢。如果打橫斬成一碌碌，最多用嚟做砧板，鬼值錢咩。
見到一棵斜倒下嘅大樹，樹頂俾其他樹頂住，同地面成45度。見到有咁好玩嘅嘢，我即刻跳上去，攬實棵樹，扮吓樹熊，梗係要影相喇。就係喺呢度，重可以見到珠峰，再落啲就睇唔到喇，所以人人都影多張相，同珠峰講拜拜。
沿河谷愈行愈低，又經過一座又一座嘅吊橋。眾人歸心似箭，連午餐都唔食，一於盡快趕路。
天色愈行愈陰暗，終於落出雨嚟，唔怕喇，慣晒喇。披上斗蓬，再上征途。
今次路上遇到一隊建築材料運輸隊，你無法想像一個人可以孭咁重嘅嘢。有組人，每人孭住七八條，每條約8吋Ｘ8吋Ｘ10呎長嘅木方，紮成一塊木板形狀。下面嘅挑夫被壓成90度，由後面睇，好似一塊自己會行嘅大木板。唔好話成塊，我諗我連一支木方都搞佢唔掂！
唔好話孭上山難，孭過吊橋就更難。條橋只得一個人伸開雙手嘅闊度，又重又大件嘅木板，需要另一個人喺前面引導方向，再唔講條橋重會咗搖右擺。唉！生活真艱難。
橋太窄，如果只係行人，喺橋中相遇都冇大問題，側側身都可以，但有時就一定要讓。大件嘢係一個，另一個係動物，牛、牦牛、羊等。有一次，遇到一個人騎住匹馬，一路飛奔過橋，人人望住佢，嘩！威到震。
一路落雨冇停過，我件斗蓬都濕晒，睇吓我哋個副嚮導Dodi，佢冇雨衣，重戴住布cap帽，點解佢唔會濕身嘅？問佢，佢淨係傻笑，真係奇怪。井少話，雨神係你個friend，所以唔會淋濕你。大家哈哈大笑。
緊張時刻終於來臨，前面就係Lukla嘅紀念門拱，穿過去就踏入Lukla，就係全程嘅終點喇。我？飛奔過去作衝綫狀。各人喺終點後面歡呼擁抱，十幾日艱苦旅程，終於圓圓滿滿，畫上一個大句號，開心到喊，人之常情也。
行多十分鐘，到達旅館。呢間旅館喺正機場隔籬，店前擺咗幾張枱，客人一邊飲嘢，一邊睇飛機仔昇降，雙重娛樂。記得13日前，我哋落機，都喺呢度飲過咖啡，而家已大功告成。
淋咗成日雨，冲番個熱水涼係必做嘅事。跟住即刻打電話俾阿珊，即時共享光榮時刻。
冇嘢做喇，乜都完成喇，輕鬆晒，飯後即刻行去市集，入Star bucks at Lukla飲杯咖啡食件餅，最重要係有free wifi，即刻通知好友，並報平安。
我哋上山時慳咗一日，落山時又慳多一日。本來15日嘅行程，縮短成13日。而呢13日，根據井少嘅儀器計算，共行咗150km。
呢兩日天氣唔好，Lukla機場停飛，積咗好多旅客等搭飛機，Suresh幫我哋撲緊機票，明天飛唔飛得，都要問過天公！
瞓覺喇！
No comments:
Post a Comment