飛機仔飛 Lukla ，起步上山
2012.04.24 Day4 Kathmandu to Lukla(2800), Phakding(2650)
噚晚算早瞓，10點上牀。今朝4點起身，本來話開早餐入房，酒店餐廳居然開5點鐘，特別俾我哋。怱怱食過旱餐，拎起噚晚執好嘅行李，出大堂集合。全團十分合作，一啲都冇遲，驅車到機場。班機遲咗一粒鐘飛，入閘，搭巴士出跑道，有两架飛機仔喺停機坪等緊，係雙螺旋槳嗰隻，開起引擎，如果走埋去，會批走你個頭。等咗一陣，登機啦，居然都有化晒裝嘅空姐。第一次坐咁細架機，好緊張。飛機放低梯級（5級左右），各人魚貫低頭上機。機倉內只有兩排單丁坐位，窗口位係佢，走廊位又係佢。伐架机連空姐，共有13人同埋兩個機師，所有行李貨物就放喺機尾。
靚空姐捧住托盤行埋嚟，托盤上面有乜？軟糖，重有一堆棉花？搞乜鬼？
我坐喺第二排，機師做乜嘢，我睇得一清二楚。起機啦，機師打個白鴿轉，調頭出跑道，機師真係好似揸車，大路出小路，兩頭望吓，睇真有冇機喺附近，駛出跑道停低，踩大油，螺旋槳就喺我耳邊轉。相信各位而家知道，靚空姐整乜嘢派棉花and糖。即刻將棉花分成兩舊，塞住兩隻耳仔。當堂舒服晒。
踩大油，機師推起控制捍，飛機仔如脫韁野馬，全速前衝，冇耐，就一飛冲天，都好刺激。飛上天後，比想象中穩定。飛機喺3000m高度飛，最初都好似喺高空飛行，因為加德滿都只係1800米。但飛咗入山區，就發覺，啲山就喺周圍，山谷底彎彎曲曲嘅河流，山腰上嘅田地、屋仔、小路，睇得清清楚楚。再向上望，山峯就喺上面，附近嘅山，閑閑地講緊起碼五千。山峯低過六千，根本唔入流，連名都冇。嚮導話，六千以上至可稱為mouintain，否則只配稱為peak！
飛機航道，就係依住山勢，造成一個空中走廊。
嗶嗶嗶，機師標板粒紅燈閃吓閃吓，飛機重下沉幾吓，嚇得我！好彩冇嘢，安全降落，有團友拍起手掌。擒擒青落機，唔記得耷低頭，撼親酸薑蕎。
Lukla機場(2800)，原來都好忙碌，飛機仔一架接一架，乘客十之八九係行山友。機場門口企滿人，問你要唔嚮導，要唔要挑夫。我哋揾間就喺跑道邊嘅小餐廳，集齊三個桃夫、嚮導助手，稍作整頓。挑夫唔等大隊，三條友孭往我哋六條友嘅行李，出發去Phakding--我哋今晚住嘅地方。
我哋冇咁快開步，坐喺露天茶座傾偈。跑道就喺眼前，走近鐵絲網圍欄，飛機昇降一覧無遺。唔睇尤自可，一睇嚇一跳，原來跑道只得幾百米，由候機室方向，向下微斜，跑道盡頭就係懸崖。設計係咁嘅，飛機降落時，喺跑道滑行係上斜，幫助剎停。起飛時則落斜，幫助產生浮力。雖然跑道好短，都應付得到。所以，睇飛機昇降，絕對係行程精彩節目之一。
坐喺呢度飲咖啡，同啱啱喺base camp番嚟嘅人取吓經，一樂也。
約9點起程，今日行程不足10km，可能係第一日，嚮導用好多時間慢慢行，好多休息，行得好他條。一路上，上上落落，都喺凹凸不平嘅山路行，沿途都係行山友、挑夫、驢仔，非常熱鬧。挑夫細到十二、三歲都有，一個挑夫孭嘅嘢，比一隻驢仔所孭嘅重要多。見到此情此景，要問一句，公平何在？
唔駛四點，全團到達今日終點站phakding，只係路邊一個小鎮，環境簡陋，電腦慢到死，又冇電話。上次話唔好追求過份精緻生活，如今生活簡陋又覺得好唔方便，人生真矛盾！
全團6個人第一次一齊食晚飯，鄉下地方，好唔好食，冇乜要求喇。
今晚一定好凍，有睡袋、棉被、羽絨褸，夠唔夠暖呢？
早啲瞓，明天行程 -- 8個鐘。
No comments:
Post a Comment