Nepal Trip 2012.04.23 Day 3 Kathmandu - Durbar Squre, Monkey Temple, Buddhists shrine

2012.04.23 Day 3 Kathmandu - Durbar Squre, Monkey Temple, Buddhists shrine,

文章日期：04/26/2012 05:28 pm

Durban Squre 尼泊爾女神住所

2012.04.23  Day 3  Kathmandu  -  Durbar Squre, Monkey Temple, Buddhists shrine,

我去邊度都瞓得咁好，早睡早起。去樓下餐廳食個自助早餐。待應好有禮貌，食物簡單，都係蛋，烟肉，腸仔等等大路嘢。不過，有一樣嘢，我食番童年嗞味。薄餐，用麪粉加水變成粉漿加糖，再煎香兩面。相信我最後一次食，應該係四、五十年前。呢次食番，嗰種味道番晒嚟，算係意外收穫喇！

今日早上安排咗市內旅遊，早餐後，van仔已喺酒店門外等候。第一站，Durban Squre，係 喺Thamel嘅南邊，車駛經街市，轉入Durban Squre，入Durban Squre係要買飛嘅。裡面實在係幾條街，有好幾座較有歷史嘅廟，應該幾有趣。因為時間唔多，都係走馬看花，今日唔多講，打算由base camp返回加德滿都，再嚟一次，到時至講。至於馬騮廟則見唔到好多馬騮，只偶然見到一兩隻行嚟行去，非常失望。不過因為此廟建於山上，廟後面有觀景台，可居高臨下欣賞加德滿都，稍作補償喇。再驅車去Buddha Nath，係世上最大佛教白塔之一，興趣不大。再參觀畫唐卡學校，都係希望你幫趁買唐卡啫。

最後一站係去cremation site，沿住一條細河而建，火葬儀式公開進行，影相攝錄都冇問題。我哋去到時，有兩單進行緊。都係一堆柴木，架喺河上燒緊，冇乜好講。就喺燒緊柴木對開幾十米處，有五、六個十歲八歲嘅細路游緊水。啲水黄黄濁濁唔在講，嗰面重燒緊，前後左右都有燒剩嘅灰燼浮喺水上。呢班細路游得不亦樂乎，重經常潛入水中，飲咗幾多唔知乜嘢。如果咁都冇病冇痛，一定可以練就非凡內功，百毒不侵。

參觀完畢，驅車到旅遊公司寫字樓，講解行程，交錢，造登山證….等手續。跟住去借睡袋、羽絨褸，本來驚住舊嘢會有味，原來都幾乾淨，放心著喇。再買啲要用嘅嘢，就等明天出發。

我哋就喺Thamel食晚飯，上網。呢間餐廳上網幾ok，不過成晚就只得我哋一枱客，生意難撈！居然有Chinese meal，叫咗福建炒麪同炒飯，重有啤酒，local啤酒，估唔到，幾醇喎。飯後，再去ACME旅館book回程住宿，講價us70兩晚。

咁又一日。