2011年8月26日至9月18日 西藏遊總結篇
斬吓眼仔，廿幾日西藏之旅又名一段落，係時候總結一下。首先回顧一下行程：
矮牆辦事噏家常，遍地黃金份外香。
柯拿，大家好，
係你嘅嘢，都係要你自已做番。走咗成個月，要做番夠本，由登陸嗰日，冇停咁開工，到今日為止，已連續開工九日，嚟緊七日亦冇得休。都好！努力工作，揾下一筆水腳。
8月
26日 晚機雪梨飛香港
27日晨早到香港
28日凌晨3點搭包車，由灣仔直達廣州白雲機場。趕搭早機由廣州直飛青海首府西寧。中午到達西寧，參觀馬步芳公館，再遊市容。
29日 經丹葛爾古城、日月山，到茶卡鹽湖。
30日由茶卡鹽湖，經青海湖（3200m）返回西寧，參觀藏文化博物館。
31日塔尔寺，途經拉雞山（3820m）。到貴德地質公園。回教新年，清真午飯。貴德古城，黃河貴德段。
9月
１日坎布拉國家公園，李家峽水電站，土族第一村。夜遊西寧市。
2日晨早漫遊西寧，農貿市場，街市，水井巷。3pm搭青藏鐵路到拉薩。
3日 3pm到達拉薩（3650m），途經唐古拉山口（5200m）。漫遊八廓街。
4日布達拉宮，大昭寺。晚上拉薩文化宮睇歌劇「喜瑪拉雅」。
5日聖湖納木錯（4718m），途經5200m山口。藜八井地熱温泉。團護生日。
6日晨遊八廓街。四驅車起程去珠峰大本營，途經聖湖羊卓擁錯（4441m），卡若拉冰川山口（5600m），白居寺（4050m），江孜宗山英雄紀念廣場，夜宿日喀則市（3500m）。
7日三輪車晨遊日喀則。318國道5000km界碑，加措拉山口（5248m），珠峰大本營（5200m），珠峰觀景台。夜宿珠峰大本營。
8日百變珠峰，告別大本營。扎什倫布寺，夜遊日喀則。
9日經雅魯藏布江，返回拉薩，結束四驅車珠峰大本營三日遊。再遊八廓街，两枝公品嘗清真佳餚晚餐。
10日拉薩飛成都，轉機九黃機場，夜宿九寨溝星宇國際酒店。
11日第一日九寨溝遊。，原始森林（3000m），天鵝海，日則溝，箭竹海，熊貓海，熊貓海瀑布，五花海。鬼婆生日。
12日 第二日九寨溝遊。珍珠灘，珍珠灘瀑布，鏡海，日則溝群海，犀牛海，老虎海，樹正瀑布，樹正寨。藏式烤全羊晚宴。
13日第三日九寨遊。長海（3150m），五彩池，諾日朗，諾日朗群海，瀑布，犀牛海，老虎海，樹正群海，火花海。10人雙色河邊晚餐。
14日告別九寨，漫遊松番縣，松州古城。九黄機場，晚機飛張家界荷花机場。深夜到達張家界。
15日張家界，天子山自然保護區。
16日張家界，寶峰湖風景區，十里畫廊。
17日張家界，黃龍洞，天門山。晚機張家界荷花機場，飛廣州白雲機場。深夜到廣州，隨即搭直通包車由機場返香港。
18日凌晨3點到達灣仔屋企。2011西藏遊告一段落。
西藏之旅有感：
半夜三更由香港過邊境，因為搭包車，過境唔駛落車，咁樣嘅經驗都係第一次。西寧係一個好城市，整潔有序，留下好印象。西寧唔算有好多出名嘅景點，但作為去西藏嘅準備，先喺西寧停留三兩日，係一個聰明嘅做法。青藏高原就係世界屋脊，西寧市本身已經海拔2300m，周邊地方，閑閑地上上落落3千4千。適應後再入西藏，就減少高山問題。
西藏係呢次旅行嘅高潮所在，布達拉宮係十分值得去嘅地方。喺西藏，好容易體會到藏民對自己宗教嘅熱誠，亦感受到藏文化絕對唔遜色於中原文化。沿途見到良田處處，風吹草低見牛羊，原來青藏高原係富饒之地，真係唔睇唔知！
高潮中嘅高潮當然係搭四驅車去喜瑪拉雅山睇珠穆朗瑪峯。高原反應，人人唔同，我講我嘅親身感受。我試過朝早五點幾起身，喺拉薩（3650m）跟個勁佬跑步。用我慣常嘅步速（約8-10km/h），平時應該唔駛停，但我跑5-10分鐘就要減速回氣，如是者，跑跑行行，45分鐘，都應付得到。我又試過喺珠峯大本營（5200m），孭住day pack背囊由地下行上四樓，不斷上上落落，呼吸當然比喺平地急促，但降低運動強度（即係行慢啲），都係絕對可以應付嘅。如果話處於平時狀態，即係普通行行企企，食飯幾味，我係完全無高山反應。呢次試驗，比咗我好大信心去計劃下一個旅程！
全程喺無憾嘅，睇到神州大地獨特多變嘅山水，對比起喺袋鼠國，揸咗成日車，景色完全一樣咁悶蛋，中國風景的确多姿多彩。
但係，喺欣賞大自然賜予美景之餘，每日都谷住一肚氣。
好多景區唔比旅遊車駛入，口口聲聲話環保，藉此掠水，收取高昂入場費。都唔緊要，永遠唔話比人知喺邊度等車，唔派人維時秩序。咁即係製造一個原始森林，遊客唔該自己搞掂。結果一有車嚟，各人就運用森林定律，即係弱肉強食，奔跑鬆踭踢腳功架，各展所長。推撞口角就司空見慣喇！唔應該怪罪旅客，喂！管理當局，錢就識收，只要一套簡單嘅制度，就可以令遊客舒舒服服咁旅行，咁都唔肯做？
我對食，一啲都唔講究。各地導遊，知道我哋呢班南蠻，怕辣怕咸怕油，佢哋走入廚房，再三提醒各位大厨，少辣少咸少油，我哋都好滿意喇。anyway，有入就有出，食得咁過癮，就要揾地方放低幾両或幾cc。去厠所，永遠係難題，尢其女仕而言。舊時窮，缺乏物質，張張就就，算啦。今日泱泱大國，豬的屁世界首位，太空實驗室上天又得，超級潛艇，深入海底又得，點解搞好個厠所咁艱難？
我有三條屎坑橋：
其一﹕唔該砌多幾塊磚整高隔牆，起碼踎喺度見唔到人，辦大事時，唔想同人傾謁，更唔想將面部表情公諸於世。
其二：唔該整番好道門，我唔想連出口係啲乜嘢情況，都比人又見到。
其三：每日揾水冲幾次。經常見到黄金遍地情況，睇真啲，啲黃金可能係舊年己經擺落。嗰度又唔係缺水嘅地方。
做少少嘢就可以令遊客舒何服服，咁都唔肯做？
唔好話係國情，明明可以做嘅而唔去做，一個字講晒， 懶。你班管理人冇自尊，唔関人事，但係要接侍外人，就要從客人嘅角度去諗啦。如果冇能力全部改善，都應該由遊客多去嘅地方做起。
唔好話做唔到，睇吓九寨溝，入場費好貴，但佢哋肯擺番啲錢係客人身上。經常見到工人打掃清潔，厠所足夠亦冇味。我要比個好大好大個like佢。
總結起嚟，景點係靚嘅。人，無論係管理人抑或遊人，不少都令你成日谷住道氣。無秩序，無公德，争先恐後，髒亂吵…總之唔舒服。
以後遊唔遊神州？
我嘅答案係：盡量少！
再噏過
嚤囉
