上吊橋前，影張全体相
2012.04.25 Day 5 Phaking to Namche Bazaar(3440)
今日行程緊密，6點起身，7點食早餐，為咗快捷起見，早餐已於噚日晚飯後叫定，一坐定就有得食，8點準時出發。
我哋行嘅路徑，就係連接村庄與村庄嘅路，經過民居，居民都大開中門，裡面係點，一目了然，治安一定好好。村庄都好細，村民起居生活都喺路邊，屋後有細小農地，十分寧靜。
山區經濟，睇嚟由旅遊業帶動，好多行山友到嚟，就要提供餐飲住宿等服務。而呢條路徑係冇車到，所有運入山區嘅物資，都靠挑夫一對腳。我諗，附近嘅男人，唔係做挑夫，就係行山嚮導。今日全程，路上繁忙得很，來來往往，唔係孭住大到無輪貨物嘅挑夫，就係來自世界各地，攞苦嚟辛嘅行山友。
我哋有挑夫幫手孭重嘢，而自己只孭輕便day pack，都已經行到嗌阿媽。又有人鍾意挑戰自己，早餐時見到有兩件鬼仔，佢哋用6日行上base camp，2日行番落嚟。唔單止咁，佢哋唔用挑夫，自己孭晒所有家當。不過，行得咁快，可能冇人肯接佢生意，揾命博咩？
嚮導用好慢嘅節奏，我哋一路行，有好多時間去欣賞靚景。今日主要沿河谷行，好多次要過河，我哋穿過好多座鐵索吊橋，跨度都好大。過橋時當然會兩邊遙，但感覺都好安穩。過第一條橋時，都好刺激，過得多就冇咗新鮮感啦，不過，都係好玩嘅。
除咗人過橋外，重成日有少則十隻八隻，多則成二十隻嘅驢仔運輸隊，因為橋太窄，驢仔落咗橋，人就要等佢哋行晒先。話時話，條橋會兩頭擺，點樣訓練驢仔過吊橋呢？
今曰早上行得好輕鬆，因為沿河谷行，雖然有上有落，但都唔會太斜。下午過橋後就轉上山，喺兩個鐘頭向上爬600m，都幾係嘢。我哋團有一個由美國嚟嘅韓國妹，身材巨型，上上吓就有啲問題，包尾嘅副嚮導要幫佢孭背囊，減磅後，終於可完成今日路程。
上呢段山前，天已堆起雲，而且翻起風，上到半路，重落出雨，好彩唔太大。各人早有準備，著上防雨風褸，背囊加上防雨罩，繼續前行。
由2800昇上3440，我冇高山反應，但已感覺運動時，呼吸比平時急速。今日之後會愈上愈高，動作亦會減慢啲。
本來預備8個鐘路程，七個鐘就完成。其中只有5個鐘係行嘅，兩個鐘就係食晏同休息，全程行咗13km。
Namche Bazaar都幾有市集feel，要用要食嘅都冇太大問題，旅館亦算企理。Check in後，第一件要做嘅就係冲凉。熱水有限，冲完就冇。好大驚喜，啲熱水好正，呢個熱水凉值100分！
呢度上網都好方便，即刻覆咗電郵面書。今晚好凍，晚飯後，早啲返房，捐入睡袋，寫遊記可也。
明天有乜搞？明天早餐後至傾。
No comments:
Post a Comment