Everest Base Camp
2012.05.02 Day12 Lobuche to Gorak Shep (5170m) to Everst Base Camp (5365m)
今日當然係大日子。
噚晚，相信係最凍嘅一晚，外面落咗成晚雪。自從上咗4000，冇胃口兼瞓得唔好，噚晚直情完全瞓唔到。主要喺空氣稀薄，成晚都覺得吸唔夠氣咁，再者就喺好凍，間房得1度！
今朝一早起身，床前水壺裡面結成一粒粒細冰，搖得響。攞起毛巾去洗面，條毛巾冰成一塊硬布。出去厠所前面洗面處，乜嘢都結晒冰，當然扭唔到水出嚟。已經係喺室內，都搞成咁，唔知室外凍成點！好彩Suresh攞咗mug暖水俾我刷牙洗面。
知道今日有好多路行，雖然完全冇胃口，都試吓食多啲，結果只食得半份奄列。
離開村庒，繼續沿冰川北上。噚晚一定好大雪，路上就佈滿大大小小、一幅幅嘅積雪。冇耐，就踩上冰川嘅lateral moraine之上，喺我哋右手邊，群峯之中，其中一個，就喺珠峰！因為距離唔同，睇起嚟，佢唔係最高嘅一個。
踩上moraine，成條冰川一覽無遺。冰川較下遊部份，顯得較平，而且因為俾泥石覆蓋，就好似一幅泥石平原，見唔到冰。愈向上遊上，冰川就出現大大小小嘅冰湖，有啲好似一個山洞，洞內深不見底，跌落去就死梗！
午餐時間前，離遠就見到我哋今晚住宿嘅地方Gorek Shep，此地位於冰川西面山腰一塊平地上。到步後，分房食晏。時間緊逼，即刻起程前往Everest BC。咪住！我哋其中一位女士阿Jung，因為高山反應太過劇烈，嘔到七彩，如果繼續上5300，唔知後果會係點。被逼放棄行程，而且即刻安排副嚮導陪佢落山。真可惜，佢已經望到營地，但都去唔到，冇法喇，命仔要緊！
Porter，Solute仔即刻臨危授命，升任副嚮導。事不宜遲，立即出發珠峰營地。繼續踩上moraine。愈行上上遊，冰川面嘅變化愈大，景色愈壯麗。
唔講唔知，原來珠峰營地，就設喺冰川之上！冰川係會向下游移動，雖然緩慢，咁上下日子，營地就要向上游遷徙，以保持喺最隹攀上珠峰嘅地點。
營地上黄色帳幕愈嚟愈清楚，我哋要離開moraine，行入冰川！moraine同冰川面之間，好多大石頭，我哋要爬過一嚿嚿大石至可行上冰川。呢度真係一個奇異世界，我哋喺冰瑚之間狹窄通路行過，一排一排尖畢甩嘅冰柱造成冰牆，成為走廊。佢點奇幻、點靚？對唔住，我唔識形容。不過，井少對住靚景就感動到喊，而且喊完又喊，可知有幾靚。
過咗呢排冰湖，走向營地，有人豎立咗一塊石碑，刻有Everest Base Camp，亦有佛教五彩經幡，呢度就喺營地入口。Suresh即刻拉開公司橫額，大家就喺橫額下猛咁影相。
我嚟營地，要實現三個願望：1/ 手持澳洲國旗影相，呢張相將會放喺我鋪頭窗厨內。2/ 打3個側手翻。3/ 吹奏waltzing matilta。當然全部搞掂。
我哋訪客只會喺營地門口逗留。影完相稍留一陣就要走，由營地行返客棧都要粒幾兩粒鐘，遲啲會又大風又凍，即刻鬆人。我實在好攰，喺我感受中，我未試過咁攰，好多次行到好似瞓著覺，靈魂好似出咗竅。乜嘢叫行屍走肉，終於明白。
晚飯時候，今日行咗咁多路，居然毫無胃口，又係食咗兩隻烚蛋算數。噚晚冇瞓過，今日咁勞累，希望有覺好瞓。
唔講又唔知，原來喺營地，係完全睇唔到珠峰嘅，因為俾前面一座山遮咗。明天要去冰川西面一座叫Kala Pathar嘅山。佢比營地高出300m，係睇珠峰嘅最佳地點。
明天6點出發，睇埋日出珠峰。
瞓唔瞓得著呢，又？
No comments:
Post a Comment