居架兵紀念博物館
2012.05.12 Day 22 Porkhara -- Cycling, Gurkha Museum
罷工繼續，冇的士上山，即係睇唔到日出。出去食早餐時經過大堂，問老闆知唔知幾時復工，佢聳下膊頭表示無奈。又係嘅，政治嘅嘢，鬼知咩。再提吓佢，如果明日復工，即刻幫我哋訂架的士。
老地方早餐，唔可以唔講呢間餐廳一個待應。廿歲仔，幾醒目，又識順住客人傾偈，多國語言，樣樣識幾句。應該係叻仔嚟嘅，喺呢個環境，唔知有冇機會發揮？祝佢好運喇。
今日着咗件已褪晒色嘅紅色Tee，係我23年前喺添馬艦一次開放日買嘅。點解千里迢迢，特別帶嚟今日着呢？呢件Tee係當年幫襯駐港居架兵買嘅，上面有三個尼泊爾文，我當然唔識解。今朝就係要去Porkhara嘅Gurkha Museum。着Gurkha衫，睇Gurkha展館，啱晒key喇。
又係租番噚日架單車，今次先踩去機場再沿公路向北一直踩，仍然係罷緊工，鋪頭都拉晒閘。喺冇車嘅公路踩單車，爽！每逢經過迴旋處，都有人群聚集，當然亦有防暴裝置嘅警察。呢啲場面，已經見慣，照樣踩住單車穿過人群。
單車經過Old Porkhara市集，本來應該係遊客必到血拼之地，但鋪頭唔開，本來係車水馬龍嘅車路，而家成為細路嘅足球場同板球場。小商販點會鍾意罷工，手停口停。想必係被脅逼，唔罷唔得而已。又見過有鋪頭拉起些少閘，搏吓懵，揾得幾多得幾多。政治！好麻煩。
地圖話，附近有個Regional Museum，入場費又唔係貴，就去睇吓。只有兩個細細嘅展廳，展出當地嘅文化歷史，生活風貌等。橫掂無地方行，聊勝於無喇。
繼續北上，沿途不斷問路，當地人都好友善，有問必答。冇耐，踩到一條橋。睇吓，橋對面一幢三層高樓，上面寫住Gurkha Memorial Museum。到喇，咦，鐵閘鎖咗，唔通，又係罷工唔開門？唔好啩！我哋喺門口閃嚟閃去。有個啊伯行出來。知道我哋喺香港嚟嘅，開閘放我哋入，又帶我哋上展廳。
Porkhara可以話係居架兵之鄉，英國佬好早就嚟呢度招聘當地山區人做顧傭兵，貪佢地捱得又忠心。招聘考驗非常艱苦，入選嘅都係fit到漏嘅人。而尼泊爾人亦以做顧傭兵為榮，可以有理想嘅薪金養家，當然係最大動力喇！真係一人當兵，全家光榮。展館亦展出居架兵曾參與嘅各場戰役，同駐守世界各地嘅情況，其中當然有駐香港居架軍團。有漆咸營，黃泥涌道軍營嘅相，重有一張，係駐港居架兵幫手清理颱風後嘅長洲，好有親切感。係值得睇嘅展館。
睇完落樓下，見到阿伯已換上，燙到直畢甩起晒骨嘅居架軍服。原來阿伯都係退休居架軍人，即刻同佢合影幾張。知道我專誠著呢件衫嚟，佢都好高興。阿伯話，我件Tee三個尼泊爾字就係英國、軍部、通訊兵。哈哈！23年嘅尼泊爾謎，就喺尼泊爾解開。當初幫襯Gurkha買呢件Tee，點會估到有一日會著住佢喺Gurkha之鄉踩單車！世事真奇妙。
今早由湖區踩嚟Museum，4、5km全程上斜，而家返湖區，嘆咯，全程落斜。一出馬路，唔同晒，成街都係車，大貨車、的士、重有左穿右插嘅電單車。嘩！發達喇，復工喇。路邊鋪頭，真係開番晒。不過，而家踩單車，真係要打醒12分情神，尤其踩過迴旋處，唔識搶路，你唔駛旨意過到。係囉，咁先至似第三世界嘅交通！
唔駛點用力就返番湖區，又係食晏時候，揾間有湖景嘅餐館。叫支可樂係指定動作，再order兩個餐，咖哩雞又係走唔甩嘅餸。尼泊爾人，多數唔係印度教就係佛教，餐館多數唔賣牛肉，又冇乜人養豬，所以食嚟食去都係雞，十分單調。講開又講，印度教嘅所謂牛，就單指cow，水牛buffalo，同牦牛yak，都唔係牛cow，係可以屠宰嘅。白馬非馬，水牛非牛，牦牛非牛，就係咁解嘞，有道理。
食食吓，黑埋個天，冇耐，重落起大雨。其實，踏入5、6月一直到10月，係monsoon雨季，所以係尼泊爾嘅旅遊淡季。特點係朝早鬼咁好天，曬到飛起，到午後就起風落大雨，日日係咁。而家又落雨，好彩喺餐館食緊嘢。忽然全店停電，停電，係尼泊爾係家常便飯，不過，快則幾分鐘，慢則半個鐘就有番電，每日十幾廿次停電，閒過立秋。餐館早有準備，即刻幫食客點起蠟燭，食燭光午餐，未試過喎，幾有情調，最緊要睇清楚食咗乜嘢落肚。
趁雨冇咁大，著起風褸，踩番單車走人，咁落雨法，都係邊度都唔駛去嘞，即刻還咗單車，返旅館寫吓遊記、上吓網，算吧喇。係咁，又hea咗兩粒鐘。
天色又好番啲，不過已經近黄昏喇。行去食晚飯，路過湖邊公園，行入去逛吓。公園十分簡單，好多草地，大人細路都玩得好開心，羽毛球、排球、板球、踢波…。咦！重有鬼仔打中國功夫，打得都幾有功架，唔錯。
走向湖邊，雨停晒，仍然成天黑雲，西面天邊雖然睇唔到日落，卻泛起一片紅霞。雨後嘅瑚面波平如鏡，紅霞倒映湖中，重唔喺上佳影相背景！
唐人胃，食唐餐，又去蘭花飯店。
返旅館，老闆有好消息，明天冇罷工，佢幫我哋訂咗架的士，明天凌晨四點，嚟旅館接我哋上山睇日出。
三點幾要起身，早抖喇喂！
No comments:
Post a Comment