進入 Khumbu Glacier，行入雪山群
由今日開始，就係羽絨不離身喇。今日大日子，將着咗10日嘅衫褲，由底到面換晒佢，I am a new man喇。
噚日掹爛咗條背囊帶，今日拎把Leatherman出嚟，唔駛幾分鐘搞掂喇。我喎！
朝早爬上村後山坡，跟住就係一大片向上微斜嘅河谷平地。今日仍然大風，預算用三粒鐘行到Duglha。中途又係絡繹不絕嘅人同牛。更加進入山區，我哋就喺各大雪山下行走。
唔算辛苦，估唔到唔駛三粒鐘，根據行程，今日應該停止，住喺Dughla呢度。各人似乎未夠喉。同嚮導商量過，再用三粒鐘，行埋明天嗰段，即係直去Lobuche，即係一日內昇600m，唔好忘記，呢幾粒鐘，係喺4000m以上！
事不宜遲，飯後即刻起程。睇吓山谷遠處，積緊雲，起緊風，喂！大佬，唔好落雨。
一起步，前面一座，直畢甩，好似一面牆嘅山坡。我哋要用頭第一粒鐘爬上去。諗起喺Dingboche休息嗰日，原來就喺作今日嘅預備。喺4600m開始，連續爬上300m高度嘅山坡。我認為，呢粒鐘係最艱難嘅。山坡上全都喺一嚿二嚿，大大細細嘅石，好多時要手腳都用埋。再話嘞，海拔4000m連續爬成粒鐘，絕對喺體力、意志嘅挑戰。
幾辛苦都要爬上頂，上到，原來喺山口。嚮導話，往喺3000m以上嘅，大多係彿教徒，絕少印度教。因此所到山口，都掛滿晒彿教五色經幡，又有佛塔仔，同我哋上次去西藏差不多。因為難度好高，嚮導話，呢段係全程最辛苦嘅路。因此最早到達同最遲嗰個有成半粒鐘鉅離。
山口係一片幾平嘅地，除咗佛塔仔同經幡外，重擺咗一列用石叠成嘅紀念塔仔，每一個，都喺因登山而壯烈犧牲嘅故事。
跟住呢兩個鐘，都係跟住河谷，繼續向高向入接近珠峰base camp行行吓，發現行緊嘅地方似堤壩多過似山坡。原來我哋已經進入咗Khumbu Glacier，行緊嘅係冰川嘅lateral moraine。呢個地理名詞，中學讀過，而家我喺上面行緊，重行足兩粒鐘。太犀利。
Lobuche，今晚喺度瞓。入咗村，一如track上其他村落，都喺客棧同露營地。迎面有個尼泊爾人，問我，「喺邊度嚟？星架坡？日本？」我話，「香港。」佢話「我都喺香港嚟！」一定喺退休居加兵。原來尼泊爾唔人喺香港打工，我哋嚮導亦有朋友喺香港，行行吓山，有時收到由香港嚟嘅SMS，話ho ma hong kong。
接近客棧時，天色黑起來，又大風又凍。入客棧，成個人暖晒。飲杯荼再分房，不在話下。再望出窗外，嘩！居然飄起雪嚟，唔太大，不過都好興奮。即刻跑出屋外，影張相。
有冇興趣喺4950m冲個涼？重係石油氣！一於冲，係一個紀錄。我諗，點解唔係5000m？
呢間客棧可算乾淨企埋，去厠所都唔駛出露天。
食飯時，我要一杯薑煲可樂。佢擘大對眼，但仍然照我方法煲。出嚟效果唔錯，個厨試過都話好，我話，再加檸檬片更佳，可惜呢度冇。我喺呢度推癀香港地道飲品，算係咁喇！
今日雖然行咗好多路，可借胃口唔好，食碗麪加兩隻烚蛋算喇。
又係坐到熄火，瞓覺。
好凍，好凍，成晚瞓得唔好，碌嚟碌去，真慘。
No comments:
Post a Comment