好大風，揾嚿石擋吓風
昇上超過4000m，作第二個休整，又喺積極嘅休息，早餐後，爬上村後嘅山坡，絕對百分之百攞苦嚟辛。愈昇愈高，就愈嚟愈凍，今朝起身，度吓間房，只得2.5度。好彩夜晚要多兩張被，試吓放個温度計入睡袋，我呢個小宇宙居然30度？！咦，我發熱能力都幾高噃。
朝早起行時得六、七度。第一次着上羽絨，重以為會好焗，原來只係啱啱好。我哋喺村後爬上山，喺一個鐘頭內，上升200m高度，而家對200m高度有啲概念。山幾斜，好多時要用手扶住大石上、都能幾考功夫。
好大風，上到山腰，紛紛塭大石遮風。四周都有6000m以上嘅大雪山圍住。另一面就係大大河谷，明天我哋就由呢個河各繼續行入山。
坐夠本，落山返回客棧，食過午飯，就去上網。Dingboche一樣個有網吧，重有wifi。覆咗e貓，面書，上咗blog。想話上載相，上極都上唔到，嘥咗好多時間。好彩打咗電話俾阿珊，佢上緊堂，聽得出佢好開心。我有啲歉意……。
不過係4點，由網吧行返客棧。好凍、好大風，凍到打晒冷震嗰隻。好彩只係十分鐘路程。
要彈吓呢間客棧，佢厠所唔夠乾淨（大陸水準，已經好乾淨），冲厠水居然用出面坑渠水，而且成日冇水。露天地堂仔應該擺住桶水，俾人洗手，刷牙洗面等。但個桶成人冇水，我要用樽庄水抹面。叫極唔聽，下次（重有？）唔幫襯你。
晚飯，食嚟食去都係啲咁嘢，冇嘢好講，坐都熄火，瞓覺喇。
No comments:
Post a Comment