好大隻象
2012.05.08 Day 18 Kathmanthu to Chitwan (300m)
好好瞓，精神爽利。一早起身，執好細軟，搞掂埋寄存行李，就去食個自助早餐。噚日返到加德滿都時，Suresh已經幫我哋買好車飛，今早佢重一早到酒店，再叫的士送我哋去車站，接送服務係旅行團包嘅。車站就喺舊皇宮附近，一列十幾架旅遊巴士擺喺路邊，又冇站牌，都唔知邊架係。揪住背囊，一路行一路問，冇耐就揾到。座位係劃定嘅，冇得亂坐。
坐定定後，睇下周圍環境。行人路邊有幾檔賣熟食嘅小販，有張枱仔，擺個雙頭石油氣爐，煲吓奶茶咁喇。又有小販，前面孭住樽裝水、包裝零食、紙巾等旅途用品，邊行邊叫賣。巴士公司人員則攞住旅客名單，幫客人揾好座位。巴士雖然唔算新，亦可算舒適。
只不過遲咗十分鐘開車，算準時喇。
Chitwan係國家公園，非常大，佔地超過930平方公里。我哋住嘅地方叫Sauraha，喺公園嘅西北邊沿，就近公園入口處。Chitwan未劃成國家公園前，住咗好多野生動物，有孟加拉虎，犀牛、唔同種類嘅鹿、熊sloth bears、猴、野象….。點解啲動物可以住得咁舒適，唔駛俾人類追殺？原來有一樣嘢保護佢哋，就係瘧疾malaria。嗰時，只有一個叫Tharu嘅士著民族可以生活喺呢度，原因係呢群土著天生唔怕瘧疾，其他人住入嚟，就死梗，所以野生動物得以保存。
上世紀50年代中，成功執行撲滅瘧疾計劃。Chitwan變成適宜居住嘅地方，農民大量開拓土地，野生動物就愈嚟愈少，好多都變成頻危動物。1973年，政府將Chitwan劃成國家公園，農民亦要遷離公園以外，並嚴格執行禁捕政策，野生動物數量得以回升。
世事就係咁，以為做好事，點知個結果會走向另一面。
由加都去Sauraha距離約150km，行車約5粒鐘。雖然名字叫公路，但路面情況唔多理想，又窄又爛，重經常有牛、單車爭路，司機都要好小心。印度教禁止殺牛，聽聞，司機車死牛，唔理有心定冇意，即刻要坐監，不過唔知真定假？
只係中午停咗一個lunch break，車不停係路上奔馳。準時到達車站。因為我哋比計劃早咗兩日到，噚日已打咗電話嚟Chitwan旅館，千叮萬囑，一定要派人嚟接車。
巴士到站，望出窗外，哦！原來好多客旅館有人兜生意。落車即揾到嚟接我哋車嘅人，佢叫Khoba，自稱Khoba in Nepal。跳上開蓬貨車仔尾斗，向Hotel Park Side出發。呢間旅館就喺國家公園入口附近，行路10分鐘路程。其實公園裡面係有住宿地方，係貴啲，試過想租，但好早已滿座。如果住到，一定好有風味。
搭住開蓬貨車仔，天上太陽兜頭兜腦曬落嚟，估計温度30度以上，呢度海拔300m。同十幾日來喺山上，真係兩個世界！唔駛5分鐘到旅館，一睇。我一定要讚吓自己，成間旅館好有熱帶風情，餐聽廳部份係竹木結構，十分有風味。住嘅地方，直情係四五十年代英式殖民地風情。闊走廊，中通旋轉樓梯，雕晒花又唔誇張嘅大塊地磚。好大嘅睡房套間，好大嘅窗，望出去就係一片樹林。蚊帳牀鋪等乾乾淨淨，絕對係非常舒服嘅地方，每人只係28美金一晚，抵住！
安頓後，冲返個涼，幫自己洗塵，即刻落去同Khoba商量行程。我哋只留兩日，要決定今日下午同明天活動。非常簡單，下午騎大笨象遊園，明天全日Jeep Safari。
行程既定，即刻食個熱帶午餐，公園南端就係印度邊境，就食咖喱喇。呢個厨，果然掂檔，濃郁咖喱，配冰凍可樂，人間美食也。攤透一陣，騎電單車去騎象。三個人逼埋一架電單車，坐得好逼夾，鄉下地方，係咁嘅喇。
而家係旅遊淡季，遊客晤多，不過都有二三十人等緊。大象真係好大隻，背上綁咗個木架，可坐四個人，每人坐一個角，雙腳分開跨過條直木條，咁就唔會跌落嚟。木架前就係大象指揮員，當然有好多技巧去指揮大象，我見到佢對赤腳篤住大象對兜風耳後面，如果要轉右，就用左腳踢下佢左耳後面，結果就係推個象頭向右，咁象就向右行。
指揮員非常專業，一起程就四維望，見有動物即刻指揮大象去追踪，上高落低入樹林….等不在話下。最開心係見到一對犀牛母子（女），象群即湧過去，犀牛視力水皮，俾象群圍住，佢都唔覺得乜嘢一回事，咁我哋得以咁近距離睇犀牛。佢地啲皮真係好厚，厚到好假，好似着咗大皮褸一樣。咁，我又唔會懷疑呢兩隻犀牛係人扮嘅。冇耐，母子倆又施施然走返入叢林。
騎象因為坐得好高，第一要小心嘅就係樹枝，失驚無神就有連樹葉連樹枝兜口兜面掃埋嚟。第二就係蜘蛛網，一路都唔知掃欄幾多，落象時，成身都係白色嘅絲，好彩冇黑寡婦跳上身。
大象又過河，又飲水，總之行足個半鐘。到將近返歸時，指揮員跳落象，收集各入相機，佢喺地面由低向高，用你架機，同你影相，服侍周到喇啩！咁佢點上番嚟，原來佢叫隻象伸個鼻落地，佢企喺個鼻，好似坐升降機，隻象用個鼻送佢返上個頭。一定好好玩！
坐咗個幾鐘，骨都俾隻象搖散，返回起點處。又搭番電單車走人，唔返旅館住，車去國家公園入口嘅Rapti河邊。向河嘅下游望去，就係西邊，喺呢度睇日落一定好靚，唔怪得擺滿櫈，張張都向西面。而家重未落日，行去鎮中心，睇吓有乜嘢賣都好。我想買件有Chitwan標誌嘅Tee，行入一間鋪頭，睇中一件，順手買幾隻手鈪，唔知啱唔啱心水，不過，又唔係貴，就買喇。照例又要講吓價，老闆娘揸唔到主意，叫老闆出嚟。原來老闆之前喺澳門浦過幾年，講得幾好嘅廣東話。我稱呼佢做澳門朋友，佢都唔知幾高興，又打折頭，又攬頭攬頸影相。
告別澳門朋友，行番出街，不時都有大笨象行過，當然有指揮員，原來大象都收工，返歸休息喇。我哋行番去睇日落嘅地方，影幾張日落相，未等日落晒就搭車返旅館。
郁咗成日，都想靜吓，整頓過後，落餐廳，飲杯凍嘢，又有free wifi，講吓skype，跟手食埋咖喱晚餐，咁又一日。明天全日，深入國家公園。
No comments:
Post a Comment