Porkhara 機場 飛 Kathmandu
2012.05.14 Day 24 Porkhara to Kathmandu
喺Porkhara 四日四晚，有三日係罷工，好彩多數景點都可以行或者踩單車就到，交道唔成問題。噚日又怱然復工，令我哋睇到日出。咁多罷工都影響唔到我嘅行程，算係好好彩喇。
今朝11點半機，邊度都唔駛去喇，好晏至起身。又係老地方、老早餐，我係大悶蛋，可以成日食相同嘅嘢，食極唔厭！
餐廳前停咗架的士。去機場？我問。
冇問題！請上車。
唔係而家，係10點。
…… Sorry嘞，唔得！
咦，嚟真喎。
正在坐喺湖邊嘆緊齋啡之際，只見一連串，一架二架巴士呀，的士呀、私家車呀，都向離開湖區方向駛去，有啲重喺車頭豎咗黑旗。可能係去緊邊度集會示威啩？
食完早餐返旅館執好嘢，告別Porkhara，預鬆少少時間，孭住大背囊，行路去機場。好快行到出迴旋處，係進入湖區嘅主要通道。嘩，攪乜鬼，成個迴旋處密麻麻滿塞晒車，巴士、的士、貨車、亂晒龍，車與車之間pumper to pumper貼到實一實，僅僅夠一個人側側身行過，我孭住大背囊，要好艱難至過到。原來今朝見到好多車駛出，就係要嚟呢度集合，目的係要堵塞進入湖區嘅路。就算有車肯載你，都過唔到呢關。我哋靠天賦本錢闖關，無往而不利。嘿嘿！
輕輕鬆鬆鬆穿過市虎陣，唔駛半粒鐘行到機場。話哂係第二大城市機場，比Lukla較有規模，Check in，安撿不在話下。坐喺候機室冇耐，有機場職員喺大堂宣佈啲唔知乜嘢，我梗係唔識聽。唔好執輸，即刻攞埋登機證去俾佢睇。……，哦，唔關我事。之後，有班乘客面露失望之色，攞住登機證，跟住嗰個職員離開候機室。望吓電視水牌，有幾班去Jomsom嘅機取消咗。剩下嘅航班，全部係飛加德滿都，只好安心繼續等喇。
11點，跑道陸績出現飛機。登機閘門打開，yeah，上得機嘞，行出跑道，排隊上機時，經過機翼嘅五葉螺旋槳，即刻走埋去，攬住其中一隻葉，影番張相。螺旋槳千祈唔好郁，否則實瓜。今次搭嘅飛機大架啲，可坐30人，十排位，每排三個位，一邊單丁位，另一邊雙座位。今次豪華嘞，空姐唔止派軟糖同棉花，每人重有汽水一杯！飛機大啲，亦飛得高啲，呢架機喺三千公尺飛行，飛行45分鐘到達加德滿都。咁刺激嘅一程飛機，每位US 75。
攞往行李出機場，我哋好似小羔羊走入餓狼堆，一大群的士佬湧埋嚟。出市區50！我唔理佢，繼續行。….40！行多兩步，30！我仍然冇反應，照行。前面有一個突圍而出，20！殺你。由US 50減到20唔駛半分鐘，豎起V字手勢上車。由機場到市中心約半嗰鐘車程，先去Shanka 酒店攞番寄存行理，再去Thamel我哋住嘅ACME旅館。真係淡季，成間旅館，就得我哋呢間房租出，US 35一晚，真抵住。
冲個涼，稍作安頓，出街食飯，四圍行吓，再補充些少手信。Thamel區，我哋都行得幾熟，經過一處賣生果嘅單車流動小販，有靚芒果同香蕉，好耐冇食生果，買番啲今晚食。忽然有人用廣東話搭嗲。路邊鋪頭呢位尼泊爾肥小姐，居然能操流利廣東話。傾起，佢阿爸喺香港做工，佢喺香港出世，係三粒星居民，佢香港、尼泊爾兩邊住，而家幫屋企睇緊鋪，遲吓就返香港。睇嚟，不少尼泊爾人都同當港有啲關係。
行完街，踩上Himalaya Glacier Trekking同佢個ED 阿Naba傾吓偈，並且問吓佢加德滿都一日遊，有乜好地方。佢都贊成我哋嘅建議，就係Bhaktapur 同 Patan。Naba幫我哋安排專車做一日day trip。重安排理後日接送機場，真周到。
晚飯，喺網上收到消息，今早有班機由Porkhara飛Jomsom，降落前喺Jomsom機場不遠處失事撞山，死咗15個人，多數由印度去Jomsom朝拜。即係早我哋班機兩個鐘飛。而家至明白今早喺侯機室睇到嘅事！驚驚！
咁又一日。
No comments:
Post a Comment