吊橋過深谷
一如前幾日，夜晚落咗大雪，早上就清晒喇。一早起程前往Namche市集，只見山上烟霞縈繞，不過似乎逐漸向上褪，好一幅人間仙景。每睇到呢啲景象，我都諗起烟霞山庄，唔知裘玉環同龍劍飛生活如何？古漢雲佢嘅九式如來神掌又有冇退步，神鵰、一邪雙飛三絕掌、重有例牌遲到嘅東島長離教主北孤…？
今日都係一路向下行，已經下降咗2000m，可以睇到濃密嘅松樹林。再唔似高山上，居民要用牛屎做燃料取暖，呢度用柴枝，家家户户都用斬好嘅柴枝造成圍牆。靠山食山，靠水食水，生存之道。
喺山內，到處都係石頭，差不多所有建築物都由石頭砌出嚟。一路上不時見到人起屋，主要工作就係將三尖八角嘅石頭，用鎚頭一下一下，dup成所需大細，形狀，得以鋪砌。所以早上一開工，就聽到dup石仔聲，一日唔停，dup到收工。起一間屋，都好辛苦啫！
沿路不時離遠見到一種叫mountain goat嘅動物，佢大過我地常見嘅山羊goat好多，只比馬細小小。今次過吊橋前，居然見到一隻，就喺我地二三十米遠，好少可以咁近距離睇到。據說，睇到mountain goat，會帶嚟好運（實在係我話嘅）。講開又講，呢隻嘢中文點叫呢，又？係唔係叫「山山羊」？
天陰咗成朝，行行下重落起雨。即刻著上雨褲、斗蓬。喂！做乜邊個拉住我？原來有隻百厭狗跟住我，見我斗蓬尾俾風吹吓吹吓，居然咬住向後拉。喂！我唔係好鍾意同你玩噃！躝開！估唔到，呢隻嘢，可能太得閒，跟咗我哋成朝。搞到我成日要揪起個斗蓬行，好煩！stupid dog！
我哋真係行好好快，比預期快咗粒幾鐘。點解咁大動力？因為由Namche開始，旅館條件就好得多，有ensuit（房內厠所冲涼房），有熱水冲涼，有wifi，有coffee shop，有shopping…，因為Namche就係市集。中午左右，大隊已到。喺呢度見番同珠峰營地緣慳一面，提早下山嘅韓國妹。
第一件事要做嘅，就係冲番個熱水涼。開猛大水，weele wala淋上身，好過癮。
真可惜，仍然未係好有胃口，好咗啲咁喇。求其食啲嘢，出去買吓嘢。我買咗T恤，cap帽，同埋badges。
全部6條友仔坐埋一齊飲咖啡，主要係傾如何分配小賬俾嚮導及挑夫，我係yes man，冇乜意見，大家四四六六拆掂後，就分頭行事啦。
都係早瞓，明天有好多路行。
No comments:
Post a Comment