踩車遊覧 Porkhara
2012.05.11 Day 21 Porkhara -- Cycling, Mountain Museum, Tibetan Refugee Camp
噚日，帶住條氣唔順嘅心情嚟到，第一個印象已經唔好。好彩噚晚瞓得幾好，心諗，嚟旅行啫，唔開心嘅嘢，掉咗佢算喇。
夜孖孖嚟到，乜都睇唔到，今朝一早起身，走出房四圍睇吓。我哋實在住喺Porkhara嘅Phewa Lakeside湖區，同加德滿都Thamel區一樣，係百分之百嘅遊客區。我住嘅旅館都算喺湖邊。可能係淡季，我住嘅房係頂層三面大單邊，景觀的確唔錯。出房門口遇到老闆，佢帶我哋上屋頂。湖區就係成個Porkhara地區嘅最低點，四面俾群山環抱。最靚嘅當然係封哂雪嘅Annapurna雪嶺，其中又以魚尾峰 （Mt. Machhapuchhare，俗稱Fishtail Mountain，6977m）為最觸目。影過靚相，趁機同老闆傾吓，睇吓有乜地方好玩。預算明日一早上山睇日出，叫老闆幫手訂架的士。商量既定，出街食個早餐。
五分鐘行出湖邊，去番噚晚嗰間餐廳。真係旅遊淡季，湖邊馬路好少人，坐上二樓，只得一個客，點做生意？每人叫咗份早餐，好大份，都好，食多啲，至夠力去玩。
而家至知，噚日全國大罷工，唔怪得一路上所有鋪頭都拉晒閘，我哋旅遊車又俾人攔截，而家明晒。話要罷工兩日，即係今日啲鋪頭都唔開，好彩餐廳可以開，唔會冇得食。又冇巴士，又冇的士，即係邊度都唔駛去？noway，冇嘢阻到我哋，今日租單車，一於湖邊一天自駕遊。
喺餐廳前面大樹下就有單車租。騎上單車，沿湖邊馬海路一直向西北方向踩。條路真係好靜，冇車，冇電單車。一路上，三三兩兩遊人漫步街頭，鋪頭又唔開，冇乜癮噃。冇耐，踩到湖邊碼頭，由呢度可以坐艇仔去湖心島嘅佛寺Tal Barahi，又可以划艇去對岸，再行上World Peace Stupa佛塔。不過，今日唔去，只喺碼頭影張相，繼續單車旅程。
踩咗四、五Ｋ，去到湖嘅西北盡頭，就係入湖嘅小河，河兩岸就係一大片冲積濕地。放低單車，行上石橋，跨過小河，走入濕地行吓。見到三兩群尼泊爾小子，張開魚網喺沼澤處捕捉魚毛蝦仔，睇嚟，呢啲係遊戲多過係生計，又有得玩，又有得食，都係鄉間小子打發空閒時間嘅方法。
今日好曬，單車坐位火辣辣，要淋水降温，pat pat先坐得上去，個人曬到變黑炭頭就不在話下。沿路返回，湖邊有間好有特色嘅餐館，唔係一張張枱，係一個個竹棚，竹堋內有矮枱，枱邊有墊褥，食客或坐或瞓或趴，十分自由。我哋坐喺中間個亭內，飲支百事解下暑。坐吓，嘆吓，上吓網，hea得很。環顧四周，竹棚內，都係鬼仔鬼妹，飲嘢煲烟，十分悠閒。咦！睇真啲，啲烟係自己捲嘅，又煲得咁古怪，會唔會係「草」呢？
食過午飯，繼續踩單車向東南走，經過Porkhara機場，沿途問路，點去International Mountain Museum，踩咗入條爛石路，好彩工夫夠，終於到達，買飛入場。館內展示攀山歷史，人物及用過嘅攀山器材，如氧氣樽，鋁梯等，資料豐富，值得一睇。
騎上單車，踩去西藏人難民營。經過幾個大迴旋處，全國大罷工，聚咗好多人，沿途都有一隊隊攞住長木棍、盾牌嘅警察。氣氛有些少緊張，我哋踩單車穿過人堆，又冇事喎。停低睇吓地圖，見我咁嘅款，有個膊頭有花嘅師姐埋嚟幫手，原來前面轉彎就到。難民營係一條街，兩面係劃一式樣嘅平房。前面有少女由屋內行出嚟，即刻上前訪問。一九五九年，達賴喇嘛逃走，大批西藏人逃到印度及尼泊爾成為難民，難民要自己揾食飬自己，營內平房亦要自己夾錢起。佢哋一世都係難民身份，唔會成為尼泊爾人。佢地有自己嘅佛寺，學校，保留自己宗教及文化。我講，「你哋由中國嚟」，佢即刻糾正我，話，係由「西藏」嚟，非常執着。知道我去過布達拉宮，佢哋好有興趣，臨走時，講句唯一識嘅西藏話「扎西違勒」。…….。唉！幾代人嘅悲劇。
返旅館途中，見到頭先嗰個師姐重當緊值，藉口話多謝佢指路，乘機問吓佢，為乜事有全國大罷工。佢好口密，話唔方便講，不過，佢話尼泊爾人係愛好和平嘅，呢啲係和平示威。尼泊爾人咁友善，祝佢哋好運。
今日晚飯，居然揾到間廣東人開嘅唐餐館，叫蘭花飯店。食過，都可以喎，下次再幫趁。
返旅館，老闆話明天罷工繼續，即係冇的士上山睇日出喇。
咁明天至算。
T L at 06/07/2012 07:23 pm comment
【唉！幾代人嘅悲劇。】看來，這悲劇還在演。這旅遊的感受，收到的。
No comments:
Post a Comment