Pheriche 客棧外，一晚大雪，粉裝素裹
2012.05.04 Day 14 Pheriche to Tangboche (3875m)
噚晚果然落咗一場大雪，凍到飛起嘅夜晚，又點會瞓得好。早上起身，摸到所有嘅嘢都係凍鐵鐵。梗係啦，我哋根本就瞓喺個雪櫃裡面。將冰凍嘅衫褲著上身，即刻打個大冷震，好彩我製暖能力極高，好快又暖番晒。
唔好嘥咗天公將大地粉裝素裹嘅一番美意，趁雪未融，即刻出外影多幾張北國風情畫。
胃口重未返嚟，求其食啲嘢，又要趕路喇，今日要下降三百幾。雖然已經離間Khumbu 冰川，但仍然沿住Khumbu Valley向下行，不過係我哋向上行嘅另一面。風景當然好靚，深cut V形河谷，interlocking spurs，蜿蜒不斷嘅山腰小路，牲口及野生動物就喺不遠處食草、飲水、休息，總之，眼見之處，都係上佳圖畫。唔駛乜嘢大師，白痴如我，亂咁撳失打，必有幾幅沙龍作品。造物者醒咗咁多正嘢俾過我哋，人類又會唔會好好珍惜呢，又？
行行重行行，又到食晏時間，揾間客棧坐低。撳吓個肚，都未係好想食嘢。話時話，唔知點解，我又唔駛點瞓，又唔駛點食嘢，但係重咁行得，呢副機器，認真efficient。唔食唔食，都飲杯嘢食個包，sit back and relax，嘆吓世畀。
高山嘅太陽非常舒服，正在閉養神之際，發現客棧老闆位千金，居然眾目睽睽剝光豬晒太陽！哦，幾歲細路女係OK嘅，一路晒，佢媽咪一路幫佢全身搽晒油，場面十分温馨，加上和喣陽光，更添人間温暖。
遠處天色唔多妥，速速起程。我哋由4千落到3千8，沿途都睇到周圍植物嘅變化。由光禿禿石山，到一叢叢短草，到成個草山坡夾雜針葉樹。而家居然出現闊葉林，自然變化自有其法則。
將近到我地今日目的地，又要由谷底剷上山，行到乜都曉。撑到上山腰平地就係我哋住嘅地方---Tangboche (3875m) ，一上到嚟，最矚目嘅就係佛寺，係我哋喺尼泊爾見過嘅最大嘅一間佛寺。分房後即刻入寺受教，各人除鞋魚貫入大殿，坐喺兩側，有幾個高僧正在頌經，好似唱歌。我佛性唔高，聽極唔明，冇耐就走返出嚟。
走出佛寺，風雲突變，唔單止黑起個天，重吹起冰冷大風，一瞬間，落起大雪，好大好大，重大過噚晚嗰場雪，即刻縮返入客棧餐堂，圍住火爐飲杯熱嘢好過。
雪，落咗好耐，我忍唔住行出去睇吓。嘩！成個地，遠山，樹，屋頂……，全部鋪咗一層白雪，即刻攞相機，記錄如斯美景。睇嚟，我都好好彩！，諗番起，去base camp嘅前一晚，就係落大雪，上天眷顧，我哋去營地，同第二日早上，我哋去Kala Pathar都好好天。一旦離開Kala Pathar，下午就即刻落雪，真係好彩到痺！今日，我哋遇到上緊山嘅人，都好擔心壞天氣會映響行程。祝佢哋好運喇。
又係嗲到熄火至返房瞓。
又係一個凍凍凍嘅晚上。
No comments:
Post a Comment