中美洲三國單車遊 總結篇 2012.12.08 戴住頭盔過海關，再噏三國笑一餐

2012.12.08   戴住頭盔過海關，再噏三國笑一餐

文章日期：03/07/2013 07:01 pm

中美洲三國單車遊 總結篇 2012.12.08

戴住頭盔過海關，再噏三國笑一餐

好耐都想試下踩單車旅遊，由尼洎爾返嚟後就開始構思。唔同做背囊友，可以自己搞掂，要有裝備，要有支援，要有路線知識…..，咁唔係可以話去就去。現代人，當然即刻谷哥。網上搵到做單車旅遊嘅公司唔係多，但亦唔算難搵。

最後鎖定呢個中美洲單車團，由尼瓜拉瓜出發，經哥斯達尼加，喺巴拿馬結束，頭尾共14日。

咁，呢個團有乜咁吸引？

我睇過好多團都係一個禮拜左右，我想有長啲時間踩單車，14日，係我搵到最長時間嘅團。其二，可以親身體會一下中美洲，都應該係一個幾特別嘅經歷。再者，可以喺巴拿馬運河邊踩單車，同啲大船一齊行，應該好過癮。

最點晴嘅應該係著住單車衫褲，戴住頭盔，推住單車，咁嘅款過海關，人生應該冇幾多次。我係古靈精怪嘅人，唔試下點得！

有冇唔好嘅嘢？有！而且大大唔好，就係好鬼貴！咁樣14日，未計機票，重唔包食，連埋信用咭附加費，承惠袋鼠銀両 A$ 2,994，真係好大筆錢。不過又咁講，佢包埋單車，沿途單車有乜問題，即刻幫你搞掂。又有支援巴士，成日跟住你，邊個有乜冬瓜豆腐，例如唔好運，有乜仆親、抽筋、發瘟等等，即刻可以跳上巴士，咁就踩得安心又放心喇。再唔講，你夠唔夠瞻一個人喺呢的地方踩單車吖？咁，錢，都係要畀既！

名又報咗，錢又畀埋，冇彎轉嘞，疊埋心水，做好準備。首先梗係體能喇，每朝去gym，就係跳上單車，踩佢一粒鐘。星期日，揀條路線，例如踩出雪梨down town，踩佢40至60km車。咁樣嘅體能計劃，由七月開始，連續近四個月，我相信可以應付得到體能要求。

由於集合地點係尼加拉瓜嘅第二大城市Granada（格拉納特），我要一個人由首都馬拿瓜機場，再轉車去Granada。喺網上揾資科，發覺首都馬拿瓜聲譽唔多好，網上嘅帖，個個都叫你要好小心，好似好多賊咁，都係唔打算留首都。睇下張機票，夜晚十點到! 夜孖孖，由機場搭車50km去Granada，有幾安全? 搵到資料，有西班牙語文學校，提供一周課程，可安排食宿、機場接送，而且價錢相宜。重駛諗?即刻報名。

最後落實行程係11月28號起程，先去洛杉磯經休斯頓飛尼加拉瓜。五日學西班牙文，11月3日，會合大隊，開始單車旅程，15日後離開巴拿馬飛洛杉磯，玩三日就返雪梨屋企。

袋鼠國民去呢三國都唔駛簽證，同美國更係同聲同氣，免簽證，咁就大安旨意，冇理簽證呢個問題。到咗出發前兩日嘅夜晩，同大小姐講起，至知原來去美國雖然唔駛簽證，但係要喺網上申請ESTA (Electronic System for Travel Authorization) ，我算好彩，幾分鐘就批咗。一額汗! 如果烏啄啄去咗機場，唔知上唔上到機?

旅程比我預期中順利。到逹尼加拉瓜機場，比我想象中乾淨整齊，海関関員多數係二十出頭嘅後生女，好有禮貌，我以為要夾張銀紙至過得関，完全唔係咁嘅一回事，十分好嘅第一個印象。唔駛點問就畀咗90日旅遊咭過我。

喺尼加拉瓜嘅頭一個禮拜，學校安排咗寄住家庭，行路返學校只五分鐘路程。朝早起身，細仔Felix已煮好早餐，食完返學。中午返嚟食午餐，下午有excursion，或者參加啲幾個鐘嘅 local tour 。晚黑返歸食飯，入夜後都唔敢一個人出街四圍騰，寫下嘢就瞓。

咁樣住七日包埋食，連埋學費、活動，都係美金280，認真超值。畀唔到乜嘢錢，亦冇期望可以畀啲乜嘢好嘢食，總之佢食乜你食乜喇。

學完一周西班牙話，都係冇乜進步，係瞭解多咗啲，。語言嘅嘢係要時間去浸嘅，五日?算係乜!又冇記性，記唔住啲生字，亦係死症之一。不過，我冇失望，因為從來都冇希望過。

本來，寄住家庭可以幫你提高語文水準，可惜佢個細仔識英文。如果可以講英文，我又點會講西文。我話『可惜』，實在係好彩，因為有得講，溝通好啲，咁我對當地民生民情又有多啲瞭解。而家佢兩兄弟都add 咗我fb做friend，係咁意都有啲連䌓。

尼加拉瓜好窮好多問題，前幾年重打緊仗，希望佢個政府可以做啲嘢，造福人民。

戲肉當然係踩單車，全團9個人，除咗我呢個黃口黃面嘅澳洲人之外，全部係白種英國人。領隊係前東德人，連同毛里族機械師、哥斯達黎加巴士司機，一行共12人。

一般嚟講，每日，巴士會載我哋先行一段路，喺某處地方放低我哋開始踩，有時直接踩去酒店，更多係喺某處結束，巴士執番我哋，再車去酒店。踩嘅路程，每日平均有四十幾公裡，最多一次係65km，總嘅嚟講，比我想象中踩得少。

有兩段路係最難忘嘅。其一係喺Ometepe島，路程唔長，只係45km，其中35km係泥石路，真係第一次親身體會到乜嘢叫做mountain bike。初初重會轉彎避開啲石，踩得幾踩，見石都就咁剷上去。上斜時就腳攰，落斜時就手軟。無論上落斜，精神都高度集中，可以講，精神同體力都有要求。當日好天都痺，搏晒命咁出汗，飲好多水，但飲太多水，就溝稀咗身體內嘅礦物䀋，差啲就老抽。

其二喺去La Fortuna繞Laguna de Arsenal呢段路，65km ，係全程最長嘅一段。呢日橫風橫雨，全日冇停過。全身由頭到腳，由底到面，全部濕晒。路係依住湖邊山勢而建，全段路就係上完又落，落完再上，好少平路，咁大個仔未上過咁多斜路，好彩之前有鍛鍊，最後都過到呢関。

團友之中，我算後生，五個係六十開外。原來實力同年齡成正比，即係愈老愈勁。咁又可以理解嘅，呢個年紀，重參加啲攞苦嚟辛嘅活動，梗係有料有自信。跟住又自爆，原來全部係單車會嘅，而且戰績彪炳。又勁曬，全世界去過邊度邊度踩車，每日又踩幾多百哩，總之就犀利喇。我就得個聽字。反而兩件三十歲左右嘅後生女最渣，成日包晒尾，有時重要坐返上車。我白己估計，我應該排到第6。雖然話排得咁後，我好慶幸都跟得好好，都係相差幾分鐘以內路程，我幾滿意自己嘅表現，再一次引證，之前嘅訓練係好有用。我問領隊Martin我嘅表現如何。佢話我踩得慢，不過唔知點解重可以影咁多相，唔知讃定彈!

成個行程，留尼加拉瓜最耐，共10日。其他地方，每處只係四、五日。就直觀感覺，以尼加拉瓜最窮。據 Felix講，好多尼加拉瓜人，包括佢自己，都想移居鄰國哥斯達尼加，就係因為想有較好生活。而哥國警察經常喺街上截查路人身分證明文件，就係因為好多尼加拉瓜人非法入境做黑工。

巴拿馬嘅繁榮，亦係我想象之外。我住嘅亷價酒店就喺住宅區內，附近路邊擺滿小販，大大小小超巿林立，用嘅食嘅擺滿一街，貨物充足。我入一間唐人小超巿，老闆講廣東話，我睇住佢唔停咁收錢，都唔得閒啋我。睇嚟，生活都唔錯。我出外旅行，好少機會入超巿，原因係佢唔畀我孭背囊入去，我亦唔會放低背囊咁危險。巴拿馬超巿畀你咁做，即係，治安可以話過得去，係要衣食足至知榮辱，唔窮得去邊。

話時話，中美洲地峽，以縱向山脈(即所謂 continental devide)分成太平洋海岸及加勒比海海岸兩邊。太平洋呢邊，以西班牙或混血人組成，亦較為發達，大城市都喺呢邊，治安亦較好。加勒比海嗰邊，則多土著或非洲黑人，據講亦較立雜。睇袋鼠國政府旅遊警告，佢叫你唔好去加勒比海岸嗰邊。我哋入咗哥斯達黎加，直至去到巴拿馬，都一直喺加勒比海岸踩。係踫口踫面多數黑人，感覺係以農業為主，可能冇另一邊咁富足，不過，都係火山肥沃土地，農作物豐富，自供自給，絕對唔係問題。我哋成班人一齊活動，又唔覺有乜危險。

今次的確試驗到我踩車有幾多料，可以講，每日我都盡晒力去踩。有時跟住踩，睇到幾條友就喺前面百零米，想跟貼啲，呢百零米，永遠就係百零米，可知能力真係有距離!再者，經此一役，我踩斜路能力高咗，踩車興趣亦大咗。我期望住下一次單車旅行。

當然又係一次十分滿意嘅旅程。

全篇完

要睇相集，請上飛事卜

中美單車遊（一）

中美單車遊（二）

中美洲三國單車遊（24) 2012.11. 20 Santa Monica Beach 半日單車遊

中美洲三國單車遊（24) Santa Monica Beach 半日單車遊

文章日期：03/07/2013 06:59 pm

Santa Monica Beach 踩車

中美洲三國單車遊（24) Santa Monica Beach 半日單車遊

2012.11. 20

真䦕心，又有炒飯做早餐。早啲出發，1Km，去巴士站。今日目的地係 Santa Monica 海灘，LA 有幾個巴士公司營運，我搭嘅係 the big blue bus, 好易認，就係一架藍色大巴士。呢度嘅巴士車頭有個架，就係用嚟擺單車嘅，可知呢度踩單幾咁普遍。

一上車，就叫司機提我落車，司機好好人，猛話OK。由近酒店呢個巴士站一路向東北行，愈行愈旺，站又愈行愈密，行咗20km，到咗 Santa Monica Boulevard ，問埋司機回頭車站喺邊度。由聖蒙妮卡大道行出海灘，原來路面盡頭係一個懸崖頂。企喺崖頂向海望，一望無際嘅沙灘，一望無際嘅大海，就係一個字 --- 大。

沙灘中間，有單車徑穿過，海風將沙吹落單車徑，咁咪好易跣軚?!有一組人攞住掃把、沙鏟，將單車徑上嘅沙鏟番落沙灘。永不完嘅戰爭，相信就係咁樣嘅嘞。

由路面去到海灘要行落呢個好高嘅垂直懸崖，當然有石級、天橋引出海灘。行過又大又闊嘅沙灘，沙灘上有一個又一個嘅救生員瞭望台，好有 Bay Watch feel 。

呢度有海堤引出海中心，就係 Santa Monica Pier，海堤近沙灘處，根本就係一個遊客巿集，最搶眼嘅地標，就係一個好大嘅摩天輪。而家，太陽晨光就穿過摩天輪，照落金黃色嘅沙上。摩天輪下面有過山車等嘅機動遊戲。附近鋪頭，有食肆、禮品店、釣魚用具鋪。最吸引我嘅，就係租單車鋪頭，唔駛急，學大隻佬話，I'll be back 。

向海行，海堤長約500公尺，盡頭係一個圓形小廣埸，有碼頭，亦有士多仔、洗手間、長櫈等設施，遊人好容易可以喺呢度 hea 幾粒鐘。圓形廣埸外圍可以落一層，就有向海露台，呢度係漁翁天堂，有長櫈、水喉、小枮板，方便漁翁處理戰利品。睇咗一陣人魚大戰，沿海堤行番出去，租咗架單車，用兩過轆探索下呢個長長嘅海灘。

用單車，梗係快過用腳好多。沿住向南行嘅單車徑踩，一路上，成身肌肉嘅靚仔，身材標青嘅靚女，就喺你身邊跑過，目不睱給，一啲都唔會悶。沿途亦有健身徑，陽光少男少女，做. Sit ups、press ups、 chin ups，洛杉磯，加洲嘅陽光，果然燦爛明媚。

唔駛15分鐘，踩到 Venice Beach，呢度都有一個海堤 pier，規模細好多。都出去兜個匝。呢一段沙灘單車徑就喺呢度截咗，因為前面海灣係個 Marina，我要踩出馬路。LA，乜都大，馬路闊，單車徑亦闊。而家兜住遊艇會外圍踩，指示清楚，好好踩，再由海灣另一邊踩番出沙灘。兩邊係廣闊嘅沙灘，前面係見唔到盡頭嘅單車路，我希望可以踩到去 Manhattan Beach，因為早前，阿鳴仔喺面書叫我去嗰度食咖喱蟹。可惜，我要預時間回程，喺「民鐵吾」海灘前4Km處放棄，打道四府喇。

原路返歸，路好易認，向住摩天輪一直踩就冇錯嘞。回程多數都快啲，返到 Santa Monica  Pier，重有啲時間剩，再向北踩多個匝。交車前，睇下時間，三粒鐘，多謝US $23。

重要多謝天公，今日好天到不得了，藍天白雲，又唔潮濕，踩完成日單車，件Tee都唔濕，謝天謝地。

估唔到，無端端可以喺 LA 踩單車，驚喜! 今日踩咗35km。

走嘞。見到一個路牌，叫人遇到海嘯，即刻向高處走。唔知上次日本海嘯，有冇衝到嚟呢度?

原路走番上馬路，。行過第三街，入去兜個匝，都係遊客區，路邊有銅雕，又有街頭表演。鋪頭都係名店，唔多啱我，走頭，撘巴士返酒店。

本來退房時間係11點，推遲到三點，要畀多20蚊，冇法喇，都想冲個涼，他他條條執嘢，都冇得慳喇。執好行李，坐出大堂，上面書、上 skye、覆電郵，。五點幾，太陽已經落到好低，坐多一陣，天都黑埋。又係嗰句，快樂時光特別容易過，係時間講再見，搭穿梭巴士去機場，一切順利，機位居然隔籬冇人，打橫打掂瞓咯。

15個鐘頭後，雪梨機場。過入境處，佢知道我由中美洲返嚟，即刻查書，我話，係咪要黃熱病防疫注射紀錄?即刻畀佢睇，佢見我咁醒目，即刻放行。到海関，我額頭鑿住好人兩個字，連檢查都慳番，掂行掂過。咦，連嗰張海関申報表都唔收，我留作紀念喇。

冇耐，阿珊嚟接我，揸車返屋企，呢個愉快旅程，又告一段落。

，

中美洲三國單車遊（23) 2012.11. 19 LA 迪士尼樂園

中美洲三國單車遊（23) LA 迪士尼樂園

文章日期：03/06/2013 06:18 pm

睡公主宫殿

中美洲三國單車遊（23) LA 迪士尼樂園

2012.11. 19

噚日非常充實，唔駛一嚿水玩咗一日。繼續跟呢間VlP tours，今日去迪士尼樂園，冚辦爛包埋入埸費，只收135 蚊。櫃位今朝係個印度阿嬸，佢收我25蚊，幫我訂位。

第二日喺呢度，當然醒目好多，唔會食佢啲免費早餐，噚晩擺喺冷氣機出口「雪」住嘅炒飯，而家叮番熱，再加自冲咖啡，就係今日嘅美味早餐。熱辣辣嘅 fry rice ，香氣四溢，羡慕死隔籬枱食緊 凍鐵鐵 cereal 嘅鬼佬鬼婆。freaking Chinese food。

嘆完中西混合早餐，即刻行去 Burger King 買兩個麭，咁就係我嘅午餐。聽講附近有個巴士站，行多十分鐘，好容易就揾到。探下路，揾到去海灘區嘅巴士缐，咁，聽日有著落喇。睇到有個牌寫住 free shuttle to LAX，機埸免費巴士，咁又幾好噃。探路完畢，行番酒店。旅遊車嚟酒店執我去公司，手續同噚曰差不多，畀銭、派入埸劵，不在話下。

由酒店去迪士尼，車要行38km。旅遊公司嘅責任就係車咗我哋去門口，司機再約回程集合時間地點，送番酒店，咁就功德圓滿。

而家開始自由行，先搭小型火車由停車埸去入口。咦，前面排隊安檢，打開背嚢任佢摷，梗係冇嘢喇，過咗安檢，有人話，係摷食物，因為要保障裏面食物店嘅生意，唔知係真唔係。我兩個 Burger King 麭擺得好，摷唔到，好嘢! （後來睇番資料，原來係可以帶食物，安檢真係摷危險品。）

過咗安檢，前面一個大廣埸，再有左右兩邊入口。LA 迪士尼有兩個主題公園， 左手邊係 Disneyland ，合家歡公園，右手邊係 Disney Adventure Park，顧名思義，梗係好多 fing 到你暈嘅遊戲。一個人去旅行，好多遊戲你都玩唔到，因為唔放心放低隨身背囊。我到此一遊，目的都係想感受下氣氛，梗係去傳統呢個合家歡 Disneyland。

今日好多人，不過，排隊都算𣈱順，半個鐘左右就入咗去。攞張地圖四圍逛逛。先搭小火車喺外圍兜個匝。出外旅行，永遠都係樂事，工作人員敬業樂業，笑面迎人；放假嘅遊客嚟呢度就係尋開心，個「笑」字已經寫咗喺每個人嘅面上。唔駛再講啲細路，個個跳嚟跳去，開心到不得了。都未去玩，個氣氛已經令你笑埋一份。每次旅行完，都有人問，How was your trip?我嘅答案永遠都係，There is no such thing as a bad holiday。原因就係咁嘞。

火車兜番起點，落車開始行，門口圓型廣埸有銀樂隊表演緊，坐喺太陽下聽音樂，真寫意。搞下笑，拉咗個鬼婆出去唱。嘩，有咁大隊 band 伴唱，我都想。鬼婆好怕醜，又走音，又細聲，又甩必。冇緊要，個個都聽得好閈心，旅行吖嘛。

跟住人潮，到處都係人龍。玩遊戲、買嘢食、買紀念品、都要排隊，我都係感受氣氛，唔駛去排隊，時行時坐，旁觀人生世態，hea 得好舒服。行到餓，買支可樂，揾嚿石，坐低食我偷運入嚟嘅 burgers ，點解坐石唔坐櫈? 咁容易搵張櫈坐咩?

過咗晏晝，啲人衝咗成朝，攰晒，有啲遊戲重唔駛排隊。既然掂行掂入，就入去喇，玩咗獨木舟、古老輪船。小小世界又點可以放過，條人龍都幾長，不過 keep 住行，排得好快。冇耐就坐咗上小船，穿過堡壘，入到小小世界。燈光燦爛，輕快音樂，非常熱鬧。

上番岸，行過一檔畫水彩畫，醒起大小姐想我買啲有関LA嘅手信，畫一幅用佢個名砌成嘅畫。佢好有效率，15分鐘搞掂。

太陽就落山，行出去大街，坐喺路邊，原來路邊已經坐滿人，黃昏巡遊就嚟開始，音樂由遠到近，靚仔靚女銀樂隊打頭陣，跟住就係卡通人物，米奇、米妮，當奴鴨、高飛狗。雪姑七友、公主王子，總之童話世界，靚人靚景，人間天堂就係嘞。

遊人多數係一家大細，阿爺阿嫲，阿媽阿爸，B仔B女，把臂同遊，溫馨到不得了。除咗人多之外，就係嬰兒車多，成千上萬，載住BB四圍騰。為方便管理，劃咗好多嬰兒車停泊處，一次過見咁多嬰兒車，都係第一次。黃昏時，細路玩到攰晒，一係瞓喺BB車，一喺阿爸阿媽抱住瞓，痴心父母古來多，中外如是。

沉醉童話世界，美夢終歸要醒。天光行到天黑，晩風吹來，都寒寒地。搭番小火車出停車場，等咗一陣，上番祣遊車，逐一送返酒店不在話下。貼士?一蚊就OK喇。

照例又係好肚餓，又叫中菜送餐，今次食紅燒豆腐，雜會炒麵，重有炒飯留番聽日早餐，食得好開心。

瞓喇。

at 04/04/2013 01:18 pm comment

好正！

中美洲三國單車遊（22) 2012.11. 18 走馬看花洛杉磯

中美洲三國單車遊（22) 走馬看花洛杉磯

文章日期：03/06/2013 06:16 pm

星光大道

中美洲三國單車遊（22) 走馬看花洛杉磯

2012.11. 18

酒店話包早餐，原來所謂早餐，又只係超巿包裝甜到死麺包，任扭 cereal 加奶，自冲咖啡或茶。好處就係任食，咁你又食得幾多?百幾銀住三晚，唔要求得咁多，係咁意塞啲甜麵麭落肚，食得飽就算數喇。

我起身起得早，噚晚幫我登記嗰位印度阿叔收咗工，今日係個印度青年人。我問佢有乜好地方去。佢畀咗張單張我，VIP Tours ，呢間公司專搞一日、半日遊，啱晒我。有一團叫 LA grand tour，搭旅遊車四圍遊，價值79蚊。唔駛諗喇，去馬。慌死你甩底，酒店先收25蚊，再打電話幫我報名，9點鐘有車嚟酒店接。

重有兩個鐘，第一朝喺美國，出街四圍行下。一直向海方向行，條街又闊又大，行咗十幾分鐘，行唔到一個街口，見唔到一個鋪頭，踫唔到一個人，LA真係好大。咪嘞，褪番𨍭頭，向另一方向行。呢面好啲，係酒店區，重有 Burger King ，入去買咗個豬柳蛋漢堡加小型薯餅 meal，留番個漢堡做午餐。

VIP Tours 公司準時到逹酒店，載咗我去公司，先交埋54蚊餘額，就安排換車開始行程。司機兼埋導遊，一路開車，一路講解，事先聲明，最少要畀15%貼士。如果做得好，成日咁長，講咁多嘢，都係值得畀嘅。

LA果然大，如果冇車，真係好煩。旅遊車一路向海行，第一個站去 Venice Beach。未出海灘，先遊遊海灘後面嘅靚屋。主街叫大運河，Grand Canal，旁邊真係有條運河，再90度打橫伸出四條支流，做成一個四四方方嘅水城，運河邊當然起滿平房，住得起嘅，都係有米之人，當然不少大明星都係呢度嘅住客。

巴士停喺沙灘嘅後街，約好集合時間，大家分頭四圍去。跨過步行街行出沙灘，一望無際嘅沙灘，一望無際嘅太平洋，就係一個字 --- 大。有步行徑，單車徑穿過沙灘。跑步、踩車、滑板、滾軸溜冰、放狗、拍拖，男女老幼，各色其色，認真有活力。

巴士繼續開行，司機導遊不斷介紹邊個邊個大明星，住喺邊度邊度，有乜嘢趣事，講到眉飛色舞。行下行下，又話食晏。第二站去農夫巿場，當大衰退時期，政府開放巿埸，農夫可以賣自己嘅農作物以補充生計，到而家當然變成係旅遊大生意。有疏果，有肉賣，亦有Tee，帽等標準遊客貨品。更多嘅係熟食攤檔，意大利、黎巴嫩、日本、唐餐、乜都有。睇睇下，好有鵝頸街巿熟食大牌檔 feel，咁梗係乾淨好多。行個匝，只買咗一支玻璃樽裝可樂，同埋啲生果。行出空地，揾張櫈，攞出今朝 Burger King個麭，坐低，一邊矖住太陽，睇住川流不息嘅遊客，觀賞人生百態，一邊咬住 burger，十分寫意。

午餐過後，向何李活出發，駛入何李活大道，經過 Rossevelt Hotel，1929年，第一屆金像奬頒獎禮，就喺呢度舉行。前面嘅 Chinese Theater , 門口有好多明星嘅手印腳印。大街唔可以洎車太耐，約好集合時間，分頭各自精彩。時間唔多，要急步走，何李活大道最出名嘅就係鑲喺路邊，一眾表演藝術名人嘅名牌，walk of fame，遊客個個頭耷耷，揾自己鍾意嗰粒星，影番張相。係咁逐粒逐粒星咁影，都好花時間。

咁著名嘅旅遊區，鋪頭都賣何李活紀念品。Chinese Theater 門口最多人，好多扮成各種影視角式嘅人喺度揾食，例如蝙蝠俠、星球大戰人物、神奇女俠等。舉機影相，佢會問你攞錢，又係嘅，化妝化成咁，都係揾銀啫。

喺何李活大道向北望，可以睇到半山上嘅 HOLLYWOOD 地標，時間緊迫，唔會車上何李活山。睇完，返回旅遊車，咦，重未人齊，叫個團友揸機，幫我錄影，我喺星光大道上面打三個側手翻。旅行喎，放肆啲，無所謂喇。

巴士繼續行，經過唐人街，轉入 Olvera  Street ，落車行一行。原來呢度係洛杉磯最早開拓嘅地方，早於1781年，已經有西班牙人喺呢度定居，。唔怪得走入呢度，到處都聽到西班牙話。有間古老屋，陳列好多古董，免費畀人參觀，古老屋外面有攤檔賣工藝、紀念品，據說古老巿集亦喺呢度。隔籬有個公園仔，有墨西哥人表演樂器，音樂一起，幾對叔嬸嬸聞曲即刻起舞，舞步優美，娛人娛己。一曲既畢，不少觀眾慷慨解囊，放低幾両，梗係銀兩，皆大歡喜。

又到回程時間，順路經過音樂中心、係全美三大之一。又經過迪士尼音樂廳，1987年為紀念和路迪士尼，佢老婆 Lilian 起咗呢個音樂中心，送畀洛杉磯人民。音樂中心外形都非常前衞。至此，所有景點，參觀完畢，司機逐個逐個客送返酒店，落車時唔好忘記要畀貼士。我好聽話，15%，即係12蚊，多謝司機導遊大佬。

返到酒店至覺肚餓，鬼唔係咩，咁耐食咗個麭咋。用 Skye 打電話叫唐餐，廣東話落單，好親切。叫咗豆腐海鮮湯、生炒骨、招牌炒飯。半個鐘多啲就有得食，方便得很。咁多嘢，食唔哂，留番炒飯聽日做早餐。

早抖。

中美洲三國單車遊（21) 2012.11. 17 巴拿馬飛洛杉磯

中美洲三國單車遊（21) 巴拿馬飛洛杉磯

文章日期：03/02/2013 04:28 pm

巴拿馬城行街

中美洲三國單車遊（21) 巴拿馬飛洛杉磯

2012.11. 17

出外旅行，點會晏起身。走落大堂，請櫃位幫手預備車，下午送我去機場，順便問下櫃位小姐附近有乜好行。櫃位小姐一啲英文都唔掂，我啲西文佢又唔明，郁身郁勢都唔多掂，唯有哈哈大笑作罷。攞咗早餐劵，走人啦。

照書講，呢度附近應該有兩個博物館，今日都有六七個鐘時間，就喺附近逛逛。腸仔、煎蛋、多士、咖啡，似乎係世界標準早餐。我唔行大馬路，專走後街，原來別有洞天。行人路外馬路邊，擺滿一排排嘅小販㰙檔，分明就係舊日鵝頸橋街巿，真係好有親切感。蔬菜、雞蛋、豬牛肉，衣物、什貨、山草藥，民生嘅嘢，乜都有得賣。個個忙忙碌碌叫賣、揀貨、講價，氣氛非常良好。

過咗街巿，就係一個手工藝巿場，千篇一侓，賣嘅都係有巴拿馬字樣嘅行貨，吸引唔到我。巴拿馬可能好出名涼鞋，到處都掛住一串串嘅涼鞋，我都買咗一對超小型迷你涼鞋，用嚟擺喺鋪頭。工藝巿場邊就係博物館，行到門口，唔好意思，今日星期六，博物館休息。

唯有再向前行，居然畀我撞到一條步行街，兩邊有鋪頭，路邊都擺咗臨時㰙檔。聽人講，原來星期六係特別巿場，好多當地人嚟呢度買嘢、食嘢，即係趁墟喇。不時都見到穿著民族服飾嘅士著少女、士著阿姑，喺呢度行街買嘢。可能男性土著嘅服裝唔顯眼，所以同普通人分唔出。

街頭行到尾，慢慢行，慢慢睇。有時走入鋪頭行下，有時坐喺路邊睇下人生百態，都好寫意。

巴拿馬冇自己嘅貨幣，直接用美金，所以十分方便。不過為咗方便找續，佢都出咗啲自己嘅硬幣，同美金一樣型狀、一樣大細、一樣幣值。所以記住喺離開巴拿馬前，要用晒呢啲巴拿馬錢。

舒舒服服咁行咗一朝，街邊食個午餐，慢慢行返酒店。執好行李，等咗一陣，有車嚟接我去機場，去Tocumen 機場要行33Km，唔應該太耐。但係巿區內塞車塞到飛起，好彩預咗足夠時間，去到機埸重有好多時間。

check in 時至知，航空公司將我呢班機取消要改另一班機，搞到我要 standby ，機號又變埋。入咗候機室，要經常𥄫住登機櫃位，可能因為我太煩，冇耐，我張機票就confirm 咗。

由巴拿馬城飛洛杉磯，要用六、七個鐘，十點幾到 LAX 機埸，人人話過美國海関好煩，我就一啲都唔覺得。好暢順，11點幾就出到大堂，用酒店專綫電話，叫佢嚟接我。點知等極都冇車接。再打電話，再等都冇。愈等愈夜，又攰又肚餓，費事等嘞，我自己搭的士。

其實酒店離機埸不遠，十五分鐘就到。當然要問下櫃位，點解接唔到我，佢堅持話有派車。睇嚟，最有可能係我班機機號改咗，terminal 亦改埋，所以接我唔到。我嚟玩，唔會嬲，到咗酒店就開心喇。鬼咁肚睋，又冇嘢食賣，好彩有啲麵包、Cereal 任你食，好過冇，食飽就瞓啦。

聽日有乜活動?

又係嗰句，瞓醒至算。

中美洲三國單車遊（20）2012.11. 16 紅色巴士遊首都

中美洲三國單車遊（20）紅色巴士遊首都

文章日期：03/02/2013 04:26 pm

巴拿馬唐人街

中美洲三國單車遊（20）紅色巴士遊首都

2012.11. 16

咁多日嘅行程，每晩都好似死豬，一覺瞓到大天光，噚晩亦冇例外。今日行程?係 ---- 冇嘅，冇起身時間，冇集合時間、冇目的地。7點，鬧鐘響，唔再瞓，即起身。執好 day pack 落樓下，有三個團友退緊房，安排交通去機埸。臨別在即，嚟個擁抱，互相祝福咁喇。我就住多晩，今日、明日都喺巴拿馬遊蕩。

酒店餐廳唔開，佢發一張早餐券，我可以去另一間餐廳食，呢間餐廳只係一街之隔。嚟巴拿馬之前，喺網上搵到嘅資料，都叫你要好小心。澳洲 Allan Brown 2000年嚟過，印象好差，話隨時有人揾槍指住你。我住嘅係住宅區，位於舊城區同商業中心區之間。一出酒店門口，我即刻四圍望，千期唔好成為賊佬嘅目標。好小心咁行，好小心咁過馬路。路邊嘅行人就好似其他一般地方嘅人，個個顧住行路，根本冇人特別注意你。行行下，我發覺，喺條街，我只係云云眾生嘅一員，咁又放心啲，當然，仍然保持警覺。

而家開始，靠自己嘞，啲水皮西班牙話加埋郁身郁勢又要出籠喇。早餐叫咖啡、煎蛋，都係可以嘅。一路食，一路攞本 lonely planet 出嚟，睇下陣間去邊度。lonely planet 係大小姐送嘅生日禮物，每次旅行，都幫我好大忙。

決定搭紅色 hop on hop off 巴士，攞住地圖西圍去。先由呢度行去舊城區，再搭紅色巴士。行去舊城區約3km，唔遠。巴士站喺邊度呢?行唔夠十分鐘，前面一架架紅色巴士，就停喺一個有上蓋嘅空地，旁邊有個貨櫃寪字樓。問下裏面個肥佬，佢識英文，問清楚點搭，即刻買張一日車飛，多謝美金29 蚊。咁，今日全日就有著落嘞。

天氣好好，曬到飛起，好彩唔算太熱。咦，我頂 panama cap 呢? 冇帶出嚟，失敗。

先行出海邊，再沿海邊行去舊城區。行行下，望向內街，發現牌樓，哦!唐人街。即刻入去同牌坊影張相。咦，李登輝提字，至醒起，巴拿馬同台灣有外交関係。穿過牌坊行入去，通常有唐人什貨舖，餐館....等等，但係呢度乜都冇，只係一般普通住宅區。街上一個唐人都冇...... 除咗我。

離唐人牌坊街冇遠有一巿集，我鍾意行街巿，而且都要買啲汽水、食物今日用。走入街巿，人山人海。點解熟口熟面嘅?，哦，原來好似灣仔大街巿，好繁忙，好多嘢賣。走咗入一間唐人超巿仔，係家爺仔乸生意，家庭由廣東省嚟，今次買嘢唔駛講西班牙話，講廣東話得嘞。買咗啲麵包、薯片、可樂，夠今日食。

行去舊城，噚晚都行過，而家日光日白睇得清楚啲。路邊擺滿攤檔，遊人稀疏，生意難做。我用4蚊買咗一頂 cap 帽，唔好曬親。半粒鐘乜都行晒。走番去巴士站，搭紅巴，兜個大圈，再去 Isla Flamenco。巴士喺巴拿馬巿區兜嚟兜去，我坐喺上層，悠悠閒閒遊車河，清風迎面吹，好舒服。巴拿城都算乾乾淨浄，人好多，車好多，塞到死，車行得好慢。喺咁短時間盡量睇多啲嘢，搭紅色巴士係好方法。

站站停，粒幾鐘去到 Flamenco 島，呢個島係巴拿馬運河入口三個𡷊之一，三個島用海堤同內陸柤連。據說，繁忙時，呢個海域停滿等候過運河嘅船。唔知而家係唔係淡季，海面冇乜船停喎。我兜住個島行個匝，除咗海景，都冇乜嘢睇。再沿海堤行埋其他兩個鳥，都係遊艇停洎嘅 marina，冇乜好睇，當 hiking 算喇。搭番紅巴離開三島，下一站係文化博物館，點知裝修，冇得睇，再搭番車出商業中心區。條街好多人，好塞車，四圍係天橋，睇睇下，呢度好似荃灣巿區。咦，好肚餓，原來成日都未食過乜嘢，買兩件三文治醫肚。

返酒店之前，去附近超巿逛逛，。呢度啲人一定唔太窮，超巿貨物充足，人山人海。我攞咗啲蕉、梨、薯片同一支大水。收銀處十幾條大大長龍，個個人都攞住好多嘢，排隊都排咗好耐。到我喇，點知唔知規矩，原來買生果要秤咗先。我冇咁做，唯有放棄。再去另一間小型超巿，又係廣東人開嘅，老闆好忙碌，收錢收到手軟，冇時間同我爹多兩句。我買咗啲梨，汽水，返酒店。連埋三文冶，呢個晚餐都好豐富。

咦，巴拿馬城一啲都唔危險，好放心。

聽日去邊? 瞓醒至算。

中美洲三國單車遊（19）2012.11. 15 首都巴拿馬城，運河踩車

中美洲三國單車遊（19）首都巴拿馬城，運河踩車

文章日期：03/01/2013 04:33 pm

巴拿馬運河

中美洲三國單車遊（19）首都巴拿馬城，運河踩車

2012.11.15

今日要入首都巴拿馬城，因為驚住入城會塞車，唔單止要早起， 早餐重要 pack 上車食。領隊 Martin 同我哋簡介下巴拿馬城，同埋巴拿馬運河。今日係最後一日踩單車，明天一早，全團人就各散東西喇。喺巴士，傳緊三個信封，各人入錢做貼士，分別畀領隊、機械師同埋司機。入幾多錢，完全隨意，甚至你唔入錢都冇人知。我真係唔知入幾多，有人話，畀領隊，大概一蚊美金一日，其他減半。我就照做喇。

巴士向東行，一路駛向巴拿馬城。今日天陰陰，沿途有時落出雨，巴士喺時陰時雨嘅天氣下行咗270km，條路好暢通。忽然，領隊 Martin 叫大家預備相機，冇耐，一條鐵索橋就出現喺前面。因為橋喺山腰建成，橋面離水面好高，

跨過嘅，就係巴拿馬運河。過咗河就離䦕大路，向南駛向船閘 Miraflores Locks。呢個南端船閘，係巴拿馬運河向太平洋嘅通道。

巴士駛落山，駛向運河船閘及展覽館。一開始落山，就落起大雨，係好大好大嗰隻。喂，大佬，唔好落啦，陣間重要踩單車噃。果然係熱帶雨，落咗一陣就停。

巴士停喺展覽館停車場，領隊約好各人幾點鐘返番巴士，大家就走去展覽館。參觀運河船閘，入場費承惠8蚊美金。

咁啱有船過緊，大家快快手搭𨋢上頂樓，走出瞭望平台。船閘有兩條水道，可以畀兩艘船同時通過，今次呢兩艘船都係由運河南行駛出太平洋嘅。船喺水道中，有兩架火車頭喺兩岸陸地牽引，用鋼䌫由水道一端拉去另一端。調節水位後，打開水閘，船就駛出太平洋喇。

因為過程都非常緩慢，大把時間，參觀嘅人都他他條條四圍影相，十分休閒。問下其他遊客，原來參觀運河嘅人，多數都係郵輪乘客，落咗船，再搭車嚟參觀。

睇完船過閘。咦，肚餓哩，食嘢喇。展覽舘有幾個餐廳，都好骨子。如果時間充足，重可以食自助餐㖭，我又冇時間，又孤寒。晏晝啫，駛乜咁巴閉?落去樓下，走出露天小食部，買隻熱狗加罐可樂，醫飽個肚就搞掂喇。

展覽館地下有個小小展覽㕔，有照片、有影片、有實物展出。都係向當日開山劈石嘅人致敬。想當年，法國人嚟呢度，用原始工具劈䦕群山，造水道，造人工湖，工業意外再加瘧疾黃熱病，一定死咗唔少人。呢度附近，就有墳埸，長眠於此嘅都係建築運河勇士。

呢個展㕔真係好細，唔駛半粒鐘就睇完。同一層有個可以坐百幾人嘅電影院，放映嘅係一套立體電影，介紹運河嘅過去、現在及將來嘅發展。運河係巴拿馬嘅搖錢樹，為國家搵好多錢。巴拿馬係拉丁美洲數一數二嘅富國，都係多得呢條運河。

又食飽、又睇完，咁就預備踩車，呢段路，係今次中美洲之旅最後一程單車。巴士車我哋離開大路，就踩較靜嘅馬路。巴士入唔到細路，有架 pick up van 跟我哋。踩咗唔夠半粒鐘，就落起雨。又熱又濕，我都係唔著風褸，由得佢淋喇。條路實在好好踩，又平又闊又少車，落咗雨，天又涼啲，身又濕晒，踩車時，風吹埋嚟，好舒服。

踩過一條破爛鐵橋，繼續沿運河邊踩，岸邊係火車軌，遠望運河嘅人工湖，有一隻貨櫃船，喺湮霧中駛過群山，向加勒比海方向駛去，一幅好靚嘅圖畫。

今日只係踩咗10 km，踩到國家公園外圍就停止喇。巴士由另一條路駛嚟接我哋。點解咁多人一早坐咗上車?哦，原來頭先一落雨，呢班友已經放棄，上咗巴士。我哋四個踩喺前頭，就唔知喇。雖然只得10k，但絕對係值得紀念嘅一程。

同架單車講聲再見，就拆轆擺上車頂。巴士駛去首都巴拿馬城，離遠已睇到高樓大廈，䢖築物都好新淨，果然係首都，有大都巿風格。駛入巿區，更體會大都巿特色，就係塞車。左兜右𨍭，終於到達酒店。司機同阿 Mau 終於完成兩個禮拜嘅任務，連巴士帶單車，即刻駛番哥斯達尼加。多謝佢哋照顧咗我咁多曰，講聲拜拜，有緣再敘。

時間無多，略作休整，起程去舊城區。冇巴士，截的士都好方便。原來舊城區係巴拿馬政府辦公室集中地，各部門首長都霸住最靚海景嘅歷史建築物做辦公大樓，門外、街道都重兵駐守，睇嚟，喺呢度行街，應該都幾安全。沿海邊路行，呢度絕對係旅遊點，路邊擺滿賣紀念品嘅㰙檔。向海望去係一望無際嘅太平洋，隔個海灣，就見到高樓林立嘅商業中心區，矗立喺太平洋海岸。

一行十人，約好食晩飯時間、地點，趁重未係好黑，各散東西，四圍睇下。舊城好細，行行下，又見番，一齊坐低飲啤酒吹水，吹到夠鐘去食飯。睇餐牌價錢，都算係高級餐廳，門口街邊擺咗摺櫈餐枱，似足香港環頭環尾茶餐廳。坐喺街邊摺櫈，用西班牙話點菜，夠晒高級。愈夜愈多人，成條街坐滿人，衣香嬪影，原來係夜浦旺區。再夜啲，重有現場獻唱。唔好以為大牌檔，好高級哩。最後一餐成團人一齊食嘅晩餐，就喺街邊搞掂。

食飽飽，搭的士返酒店，咁又一日。

中美洲三國單車遊（18）2012.11.14 向太平洋海岸

中美洲三國單車遊（18）向太平洋海岸

漏夜修車

文章日期：02/27/2013 04:24 pm

中美洲三國單車遊（18）向太平洋海岸

2014.11.14

門外面係嘩哩嘩啦嘅小河流水，都阻唔住一覺瞓到天光。習慣咗早起身，因為要 skye 返屋企。一出門外，就見到 Mau 整緊我架單車。尾轆齒輪成個甩咗，要換個新零件。我 skye 完，阿 Mau 已經搞掂架車，多謝晒。

食過早餐，巴士一路向南落山離開 continental divide ，駛向太平洋海岸，愈行得低，天氣愈好。今日搭好多車，由 Boquete 酒店到踩單車起點，巴士要行260 km。中午去到 Santiago鎮，就喺呢度食個晏。午餐後，即刻上車再行多十零分鐘，由大路 Carretera Panamericana 右𨍭入 Via Ocu 橫街，就由呢度開始踩單車。噚日踩嘅係山路，今日踩嘅係城市住宅區嘅路。

路都幾平，冇乜特別。可能因為咁樣，踩咗40km，去到一個鎮仔，好多人就上巴士喇。我嚟踩車，幾大都踩到尾。最尾呢程，就只得 Kiwi John、Martin root 同我，當然重有領隊 Martin Miller 同阿Mau。再踩多十零 Km，就喺大路前結束，巴士就執返我哋上車，一直駛去 Chitre。

全日踩咗58km。

上車時，重係天光，入到 Chitre 城，天都黑埋，入住 Hotel Versalles，呢間酒店，睇嚟係全程最靚嘅一間，又有泳池，可惜只住一晚，幾靚都冇用。好夜至 check in，邊度都唔駛去，就喺酒店食埋晚飯算數。

一宿無話。

中美洲單車三國遊 （17）2012.11.13 離開加勒比海岸

中美洲單車三國遊 （17）離開加勒比海岸

文章日期：02/27/2013 04:11 pm

先爛齒輪，而家爆埋軚

中美洲單車三國遊 （17）離開加勒比海岸

2012.11.13

噚日成日都係自由活動，晚餐亦各散東西，我、阿 John，同埋Martin 一齊去食pizza，啤酒當然不可少。因為人少少，講嘢亦多咗。無端端講起肥彭，我叫佢做阿 Chris，Martin 瞪大對眼望住我話：Chris? 乜你冋佢好熟呀?我哋要叫佢The Right Honourable the Lord Patten of Barnes 。我鬼知咩，梗係再講，yes we are good friends! 呢個晩餐都傾咗好多嘢。鬼咁大個pizza, 食完又差唔多即刻瞓，真係有啲滯。

一宿無話，今日早起，早餐後 pick up van 已喺門外等緊。行李掟晒上車，人就行去碼頭。重係好早，路上冇乜行人，只係見到好多食腐肉嘅禿鷹喺垃圾堆摷嘢食。啲禿鷹見人行埋去，紛紛飛走，有啲飛上燈柱，有啲飛埋一二邊，係咁𥄫實你，個樣係好鬼鼠，唔怪得文人都用好衰嘅文字去形容佢哋!

碼頭附近，居然有間候王廟，有紅紙寫上對聯，「侯恩同博厚，王度並乾坤」。可惜大門緊閉，否則我會行入去，睇下拜緊乜嘢神。

坐上大飛，個個都要著上救生衣，政府有督導員睇實，冇得唔著。大飛撻著兩個200匹馬力外弦機，喺平靜嘅加勒比海破浪前進，向西返回內陸。由船上望向內陸，見到巴拿馬最高峯 Vocan Baru ( 3475m ) ，就喺晨霧中若隱若現，今日就會喺山腳過夜。

半個鐘左右，大飛到達 Almirante 碼頭，車頂載住單車嘅巴士已經喺碼頭等緊。搬行李上車時，幾個赤膊街童湧埋嚟，幫手搬嘢，希望得到幾個零錢打賞，不過一定要小心，𥄫實行李，唔好畀人撻走，話晒，呢度係加勒比海岸。

巴士向東行咗一段加勒比海岸公路再向南上山，朝住Continental Divide 進發，呢度係終年積雲，多雨、多霧又潮濕。巴士一路上山，去到水霸 Represa la Fortuna，呢個係巴拿馬嘅重要水庫，我哋就由呢度再始踩。天色陰暗，即刻著上風褸，騎上單車，出發。水庫喺山嘅高點，開始時，南向下山，主要落斜，行咗5Km，尾轆齒輪成個甩咗出嚟， 阿 Mau 話冇得整，佢畀咗佢架車我，佢自己坐巴士。行多2km，尾轆居然漏氣，唯有企喺路邊等。阿Mau拆咗個轆，原來拮咗玻璃，唔使三兩下手勢就換咗新內膽，可以繼續踩。

好彩有支援，如果 solo 踩單車，發生咁嘅事，點搞?

路好闊，都係上斜落斜交集，冇乜車行過，亦冇乜民居，都踩得幾順。如是者踩咗53km。可能條路好悶，最後嗰拾零廿Km，個速度好似拖住拖住踩唔快，有攰嘅感覺。個個踩到夠哂皮，上巴士車去Vacan Baru 山腳小鎮 Boquete 埋棧即刻飲支啤。

呢個酒店仔好過癮，有條河仔就喺酒店中間流過，成晚流水聲，唔知瞓唔瞓得著?

跟住領隊Martin出去食晩飯，夜晩行下小鎮，好舒服好𡨴靜，走咗入一間秘魯小館，叫咗客秘魯牛心做頭盆。牛心?牛心你都食?嚇到班Pommie 吖!有兩串切成薄片嘅牛心，都接近廣東式鹵水食物，用嚟送啤酒一流。再加一蝶秘魯式蝦仁炒飯做主菜，成個旅程，呢餐最正，點解?因為似廣東菜，啱脾胃。

飯後，成班人慢慢踱步返酒店，雖然地處熱帶，但小鎮喺山區內，氣溫涼啲，晚風撲面吹來，好舒服。

瞓喇。

中美洲單車三國遊 (16) 2012.11.12 Hea Hea Hea 今日零 Km

中美洲單車三國遊 (16) Hea Hea Hea 今日零 Km

文章日期：11/13/2012 06:57 am

 Colon Island

中美洲單車三國遊   (16)    Hea Hea Hea 今日零 Km

2012.11.12

上咗呢個島，就預咗享受佢嘅寧靜，喺大街行嚟行去嘅，多數係歐美嚟嘅遊人，又以後生居多。街上到處都係小旅館、餐廳、禮品小店、旅行社。而岸邊又有做出海活動嘅鋪頭。

食過早餐，今日就任你行。因為天氣唔好，本來話出海嘅，都取銷喇，雨中遊船河，有乜好玩！

趁天氣好啲，我都出去係咁意逛逛。唔駛兩粒鐘，乜都行晒。呢個島實在都幾大，不過可行嘅地方唔多啫。

中午時刻，揾間路邊小店食吓嘢。有chicken compo，圖片顯示一隻雞翼，一件雞件，有薯條同可樂。就要佢喇！但係送嚟嘅係炸碎雞肉，好大出入喎。同送餐小姐講，點知溝通有困難，又指住張相，又指住碟雞，周身郁都唔點，不過好似話冇圖片嘅嘢。唓！咁你做乜影張相誤導人？咦！西班牙話點講呢，又？死死氣攞番碟嘢坐番好，食晒佢喇。

買咗頂帽，返酒店，坐喺路邊 Veranda ，寫埋噚日個blog，上吓網好過。

講起上網，而家人人都帶電腦，i phone，I pad。一坐低，個個都撳緊電腦，連領隊都係。只有一個阿嬋唔係，佢對領隊話，最好食dinner時，唔好用電腦，要用，就去第二度，做完至返嚟。佢都係好意，兩件後生女梗係不以為然，但係大家都好合作！結果？就係成枱人，有一半分散喺唔同地方照撳，撳完又返嚟，總之走嚟走去，非常有動感。

呢班團友，多數喺英國嚟，Isabella阿嬋係法國人，不過英法兩邊走。Kiwi阿John，揸嘅係英國護照。到今日，大家實力已完全顯露。基本上，愈老愈勁，最渣嘅就係兩個後生女。我自我評估，9個人我應該排到第6。但係，我跟得到，已經唔錯喇。

另一個收穫，係明白咗點樣拆轆，因為要擺車上車頂，成日又拆又安。我冇試過，返屋企要試吓。又識咗，原來啲cables要落油。否則，轉波就有問題。當然最大收穫就係上斜路好咗，耐力應該亦有改善。

有一樣嘢我而家唔會問住，就係，到而家，每一日都係一個人住一間房。咁樣應該要畀extra，遲啲，喺巴拿馬城我會問點解。

中美洲單車三國遊 (15) 2012.11.11 43km 直踩巴拿馬

中美洲單車三國遊 (15) 43km 直踩巴拿馬

文章日期：11/13/2012 04:30 am

過巴拿馬海関

中美洲單車三國遊   (15)    43km 直踩巴拿馬

2012.11.11

因為酒店喺高地，噚晚綵到索晒氣，不過都係值得嘅。今朝又要起早，走出露台，望向下面山谷，村落就掩映係晨霧之中。即刻諗起呢一句：忽聞海上有仙山，山在虛無飄渺間。如果唔爬到咁高，點睇到咁靚嘅景！

今日要過巴拿馬，所以要咁趕，一行人等，預備好踩車裝備、隨時候命。唔駛旨望好天，車行冇耐，就落起雨、點都要踩喇。巴士停低，落晒單車，就由呢度出發，沿公路直踩巴拿馬。睇吓路牌，哦！要踩43km。

雨，時大時細，但係一直冇停過。我著住件鬼咁貴嘅Gortex風褸，據云超級防水。但係呢幾日，都係由面濕到底，梗係懷疑防水功能唔夠。但真正原因極可能，外面係雨，裡面係汗，所以底面都濕晒。

沿住公路，非常平坦，上落又唔多，毫無難度。中間只小休過兩次。四粒鐘到，就去到邊境Sixaola，一條大馬路行入禁區。可能係星期日，路邊都擺咗一行等過境嘅貨車，但係唔算多。蓋印離開Costa Rica。向邊界行去，係一條河分隔兩國，河上有條生晒銹嘅鐵橋連住。橋中間有條一定行唔到火車嘅鐵軌。鐵橋面放咗一截又一截，又爛又霉嘅木板，大細、長短、厚薄完全唔同，木板亦冇釘死係橋面，人就係上面行。由木板之間嘅大罅隙，你可以完全欣賞到泥黄色河水，就係你腳下滔滔流過。注意，唔好差錯腳，警告，啲木板會郁郁貢！

過咗橋，踏上巴拿馬境。路邊屋仔外面開個窗，你遞個護照入去，佢check過電腦，打個印，係咁意望吓你，我哋重戴住單車頭盔，都唔知睇唔睇得真，就放人喇。再行前，科水3美金，貼個貼紙喺護照，恭喜你，你成功登陸喇。

我哋啲行李喺架巴士度，成架巴士一齊過境。我哋就過得好快，巴士有啲手續要辦。等緊巴士時，入咗個超市，我買咗罐美製午餐內，幾時食都好吖！呢度貨幣好簡單，就係用美金！不過佢有自己嘅硬幣，同美金好相似，找續時撈亂用。記得離境時，用晒啲巴拿馬硬幣。

領隊話，呢間超市係Chino開嘅，又話，唔知點解中國人離開自己家鄉，喺呢啲山窿山忽嘅地方開超市？……中國人離鄉別井，移民他方，如果唔係逼出嚟，邊個想？唔識點同呢個東德佬講！

唔似尼加拉瓜、同哥斯達尼加，呢兩國係南北走向。而巴拿馬就係東西走向。一入巴拿境，巴士就係加勒比海邊，即係北面行駛。一路向東行300km左右，對出有一列群島，因為地處加勒比海，風景優美，係旅遊聖地。單車就要留喺mainland，人就搭船去最大嘅島, Colon Island，會喺島上住兩晚。

渡輪好似大飛，船尾有兩個好大嘅外舷摩打、開起嚟，真係好快，唔駛一粒鐘就到。

天都黑哂，分房晚飯不在話下。今晚食咗個3 course dinner，個湯話係泰式，又酸又辣又有米粉，古靈精怪，一啲都唔好食！

今晚好眼瞓，寫兩行就瞓咗。

中美洲單車三國遊 (14) 2012.11.10 邊得嚟咁多斜路

中美洲單車三國遊 (14) 邊得嚟咁多斜路

文章日期：11/11/2012 01:15 pm

由朝踩到黑

中美洲單車三國遊   (14)    邊得嚟咁多斜路

2012.11.10

今日行程緊密，六點早餐，七點就搭專用巴士離開La fortuna，當然係繼續向南。喺度咁耐就落咁耐雨，雨中踩單車，梗係全新經驗。巴士一路向高爬，爬爬吓，直情係走入咗雲中，四圍都係霧，一直落住細雨，能見度極低，所有車都行得好慢，以策安全。

愈向南行，地峽就愈窄，呢座山嘅東坡就向住加勒比海，西坡就向住太平洋。車上到高點，一路向下落，愈行愈好天，重出哂太陽。巴士經過機場，再喺聖荷西外圍走過，然後走入郊區。三個鐘後，去列Orosi Valley嘅頂，喺呢度食個午餐，12點15分出發。

第一段路就認真高興，全部落，大斜路，連續兩三公里係咁落。因為又長又斜，速度都幾高，兼且又有其他車，都要好小心。Isabella阿嬋，因為太高興，速度太快，所以成日走咗出路中間。之後，領隊叫佢小心，阿嬋話佢自己知自己事。相方來回幾句，唔多高興。

呢個Orosi Valley，沿途都種滿農作物，尤其係咖啡。小休時，阿Mau介紹點樣製作咖啡豆。

今日路程唔算太難，有上有落，係以落為主，所以經常都有高速落斜情景。四點左右到達山谷盡頭，而我哋住嘅Turriltico Lodge就喺6km路程一個小山崗上，即係話要上幾公里嘅斜路。有時斜啲，有時冇咁斜，總之就係上上上。5點15分，天都黑晒，我終於撑到酒店門外，重有幾百米斜到飛起嘅大大斜，至去到酒店。我冇本事上，就推車上。有3條友已經坐低飲緊啤。原來只有兩個踩上嚟。

我又嘆支啤，Isabella阿嬋又到。再等，我哋架back up 巴士駛到，其他5個由巴士送到。太黑喺路面行，而且大斜路，都幾危險。

今晚係最後一晚喺哥斯達尼加，明天踩單車過境去巴拿馬。踩幾多？幾時踩？明天至算。

今日總共踩咗52km，用咗5個鐘

中美洲單車三國遊 (13) 2012.11.09 La Fortuna 公路輕鬆50K

中美洲單車三國遊 (13) La Fortuna 公路輕鬆50K

文章日期：11/10/2012 10:45 am

Martin 帶隊

中美洲單車三國遊   (13)  La Fortuna  公路輕鬆50K

2012.11.09

住喺小木屋，又幾有風味，雨成晚冇停，打落屋頂嘅雨聲，正好摧眠，助我入夢，一覺瞓到天光。

噚晚黑孖孖到，冇留意酒店名，呢間叫Arenal Montechiari Hotel，我哋住嘅都喺亷價小旅館，多數係家爺仔乸生意。

今日領隊畀個選擇大家，一係，正正常常繼續踩車，一係，自由活動。如果揀後者，佢會幫手安排。呢度係湖區，可以喺Laguna Arenal湖玩水上活動，如獨木舟或遊船河。呢度又係火山區，可以遠足去Arenal火山。又因為係火山，所以有温泉浸。我嚟呢個團就係踩車，好易揀。

早餐後出發。吓！原來得三個人踩車，其餘六個人，就去浸温泉。今次大陣仗喇，三條友踩車，領隊、阿Mau、重有司機揸住巴士，一齊出發，夠晒suport喇。

噚日，由頭濕到落腳，用條晾衫繩，將洗過嘅濕嘢擺正喺冷氣底，吹咗成晚，居然乾得唔錯，連對鞋都幾ok。噚日成套衫褲鞋襪，今日著番晒。

由酒店開始，經過市中心區，沿住車路踩。雨繼續咁落，唔駛幾耐，全身又濕晒。今日實在係踩公路，連續踩過好幾個鎮。因為係鎮與鎮之間嘅主要公路，雖然唔似大城咁繁忙，路面不時都有車來來往往，踩車都要好小心。比起噚日湖邊嘅路，呢段路就平坦得多。偶然都有上落斜，亦有長命斜，但係經噚日一役，今日呢啲都係小兒科，濕濕碎喇。

成段路好好踩，速度又夠，只停過兩三次。今次威水喇，兩條友要我帶頭，點解？貪我夠慢，佢哋今日想輕鬆吓喎。

十點幾已經去到今日嘅目的地，全程只用咗2小時10分，就踩咗50km，十分滿意。揾間coffee shop坐低透吓，順便食埋午餐。呢間餐廳就喺小河邊，有好多約兩呎長嘅蜥蜴，有啲喺石頭，有啲爬到樹上，伏喺度郁都唔郁，好多日都冇太陽，呢班冷血動物一定有得震冇得瞓嘞。

餐廳自己又經營禮品店、順手睇吓，大小姐提過我，如果有廉價飾物，不妨買啲。行吓睇吓，果然畀我睇中啲手鈪仔，又唔係貴，買咗佢，考吓我啲眼光啱唔啱佢心水。

食過三文治，飲過咖啡。阿Mau一早已將單車放上車頂，我哋拍拍屁股就坐上車，有人打點一切，真好。

返到小屋，又係洗洗晾晾，預備聽日著。下晝冇節目，又係整吓相，上吓網，睇吓報紙咁喇。呀！重可以Skype叫阿珊起身喎！

一條友行出市中心兜個匝，冇乜睇頭，返歸喇。明天離開La Fortuna，繼續南進。

中美洲單車三國遊 (12) 2012.11.08 Canas去La Fortuna 泥鴨一群

中美洲單車三國遊 (12) Canas去La Fortuna 泥鴨一群

文章日期：11/09/2012 08:21 pm

Shy Plant 怕醜草，呢度生滿山

中美洲單車三國遊   (12)  Canas去La Fortuna   泥鴨一群

2012.11.08

好多路要踩，比平時早半個鐘食早餐。呢間酒店wifi居然入到房，方便好多，我可以早啲skype返屋企。

哥斯達尼加喺中美洲各國中，算係好富裕。因為生活水平唔同，好多尼加拉瓜人，合法好，非法好，走入哥斯達尼加打工。哥國警察隨時隨地，向路人撿查證件，捉非法居留嘅人。

今早起身，望吓個天，成天都係點雲，而且行得好快，即係會有大風大雨咁解。Mmm！唔多盞。

團友醒目，快手快腳執晒行李上車。離開Canas向東北行，我哋今晚落腳地方叫 La Fortuna。走入郊區時，風愈嚟愈大，路邊嘅樹畀風吹到左搖右擺，沙沙聲，好驚。冇耐，重落起雨。

第一樣要做，就係去超市買嘢，因為晤知中午會踩到去到邊，所以買定午餐。呢架van又全程跟住，食物擺喺車上，唔駛自己帶。我買咗一條法式麪包、四隻蕉、兩個青蘋果。承惠哥國幣（Colon）1273，我冇換錢，用美金一樣收，3蚊喇，好抵買。Colon最高面額紙幣係5萬！！我一個人旅行好少去超市，因為多數要求放低背囊、袋等，驚你偷佢嘢。我背囊有錢有證件有相機，點放得低畀你！今次孭埋背囊入去都得，奇怪！唔知係咪因為呢度係鎮仔呢？

車駛到高地，向北望，就係Laguna de Arenal。喺湖嘅東面盡頭南岸，就係Arenal火山，佢係哥國最活躍嘅火山，成日都噴緊烟就不在話下，而且每日都有溶岩湧出，認真生猛。今日嘅目的地La Fortuna，就喺湖嘅盡頭東北面。今日我哋嘅任務就係由湖嘅南岸，沿湖順時針方向踩到La Fortuna。預計75km。

車喺高地停低，預算由呢度開始。一落車，至知好大風，氣温唔算低，但係風大，著埋風褸都覺得凍。風太大，Mau認為由高地開始有危險，車行多10km到較低處開始。略作講解，大家冒住雨出發。

喺雨中咁樣踩單車，係我嘅全新經驗，雖然話係Gortex風褸，都係由面濕到底，一來我冇拉埋哂拉鍊，因為會好熱，二來出汗，裡面都濕晒喇。

呢段路實在唔易，基本上，全部都係斜路。唔係上斜就係落斜，每次落斜後即刻就係另一段上斜嘅開始，而且斜路係望唔到頂嗰隻，往往以為嗰度係頂，轉個彎，吓！重要上。即係勁揪長命斜。咁大個人，絕對係第一次上咁多斜！

沿湖行，應該好好景至係，可惜烟霞處處，乜都唔清唔楚，Arenal火山？梗係睇唔到！

我踩踩吓，離遠見到一隻衰狗一路吠，一路跑埋嚟。我即刻加速，因為衰狗由前面嚟，所以好快喺我車邊，我即刻向前舉高雙腳，否則隻衰嘢可能咬到我隻腳，好彩之前加咗速，衰嘢追咗一陣就冇跟嚟。呢個場景，後面Isabella阿嬋睇到，笑到肚痛，I wish that I had a  camera！佢話。

有一樣嘢，我好耐冇見，今次見番，就係怕醜草。路邊好多好多，生滿粉紅色嘅花，即刻落地用手指掂吓，果然會合埋。細時見好多，維園小山崗就有唔少，唔知幾時起唔見晒。

全日落雨，有時好大，有時細咗，總之冇停過。全部人變晒濕水鴨，加埋車轆唧上嚟嘅泥水，就係泥鴨喇。全日連埋午餐、小休，用咗7個鐘，行咗65km。

三點零去到La Fortuna，埋棧，分房。嘩！發達喇，係每人一間屋。唔係乜豪華嘢，基本嘅都有。淋咗成日雨，冲番個熱水涼。一開，都係凍水，唓！又話有熱水？

今晚唔出去食咯，條法式麪包重未食，又有蘋果，咁嘅晚餐都唔錯。

而家10點，雨未停過，唔知聽日係點款？再濕就冇衫着喇。

中美洲單車三國遊 (11) 2012.11.07 直踩哥斯達尼加

中美洲單車三國遊 (11) 直踩哥斯達尼加

文章日期：11/08/2012 01:49 pm

哥斯達尼加避雨

中美洲單車三國遊   (11)  直踩哥斯達尼加

2012.11.07

喺Ometepe住咗兩晚，今日要離開喇。早餐後，起程踩返去San Jose de Sur碼頭，行李就由酒店車送走。非常舒服嘅25km，一粒鐘左右搞掂，不過等船到又一粒鐘。今次嚟咗隻鐵船，比起上次嗰隻，呢隻係豪華船。唔係好多人，可能因為要載呢架巨型貨車，所以出動大鐵船。一上船，我就爬上第二層頂露天甲板，搽滿太陽油，享受陽光與涼風，欣賞尼加拉瓜湖景色，我而家已經變咗黑炭頭。 

個零鐘船程，到達mainland嘅San Jorge碼頭，車已經等緊。司機同mechanic 阿Mau，夾手夾腳將車擺上車頂。食過簡單午餐，即驅車向哥斯達尼加進發，喺離邊境3km處，unload單車，踩去邊境。沿途擺滿等候出境嘅大貨車，路又窄，好彩行車好慢，都幾安全。

尼加垃瓜出境，要科水us＄3蚊。呢個海関都幾繁忙，主要係貨車同跨境旅遊團。忙起上嚟，分分鐘要等4、5粒鐘。遇到另一批單車團，正入境尼加拉瓜，佢哋已經等咗4個鐘，重未得。我哋只用咗兩個鐘，好好彩喇。入境哥斯達尼加就簡單得多，就係填入境表，排隊蓋印。哥斯達尼加有錢得多，唔收你入境費。

手續搞掂，門外巴士已經等緊，只上行李，我哋踩車離開邊境。嘩！好大條壢青路，全隊人單行出發。唔夠半個鐘，落起雨。本來係預咗落雨都踩車，但係呢段係邊境路，交通好繁忙，又多貨車。我哋即刻縮埋路邊小士多。冇耐巴嚟到，執哂單車同人上車，今日係咁。巴士向柬駛100km，到達今晚落腳地方--Canas。分房，冲涼，邊食飯邊上網不在話下。

今次呢架巴士會一路跟住我哋一直去到巴拿馬。

明天----75km。早抖！

中美洲單車三國遊 (10) 2012.11.06 Isla de Ometepe勁揪45km

中美洲單車三國遊 ( 10) Isla de Ometepe勁揪45km

文章日期：11/07/2012 07:55 pm

中美洲單車三國遊   10  Isla de Ometepe勁揪45km

2012.11.06

Isla de Ometepe 環岛踩

噚晚好眼瞓，一覺瞓到天光，仍然早起。7點早餐，8點半前就要出發。天氣好熱，各人都預備足夠水。呢個双山火山島就似似哋長洲，中間有稍窄地峽，將南北兩島相連，北島火山叫conception 火山（1610m），南島就係Maderas火山（1394m）。我哋住嘅酒店就喺兩島之間嘅Santo Domingo海灘之上。

今日要做嘅係繞南島一個匝。由酒店出發，大路10km，全部磚砌路。然後環島35km，全部石頭dirt road，總共45km。

大路梗係好行，冇人有問題，一轉入石頭路，有一位女仕，佢踩大路時好掂，石頭路就唔掂，冇幾遠就話放棄。自己一個人踩返酒店，另一個又喺稍遠啲放棄。石頭路就係泥路上滿晒石頭，石頭有大有細，可以凸出地面成呎高，好多時單車就喺一嚿石過一嚿石，踩唔到泥地。落斜路時，要捉到車頭好實。上斜路時要不斷踩先至可跨過石頭。初初我會避過石頭，後來避無可避，見石頭就照踩上去可也。真正体會到mountain bike點行dirt road。

我哋沿南島海邊路逆時針方向行，火山島果然物產豐富，沿路都係農莊，到處都係果樹。經常見到貨車停喺農莊路旁，收集香蕉、西瓜等農作物。

行呢段路要好多體力，原因係呢段路好少平路，一係上斜，一係落斜。上斜時要用脚，落斜時要用手。又要好專注，唔可以relax咁踩。

好熱，出好多汗，飲好多水。行到一半到路程，腳有老抽感覺，即刻減慢速度，小休時拉吓筋。冇乜效果。試吓食啲提子乾，果然有效。可能流汗太多，流失咗好多納、鉀等礦物鹽，單飲水補充唔到。以後試下勤啲食，睇吓點。

要完成佢呢45km，都係意志同體力嘅結晶。兩點15分返回酒店，我好滿意。

聽日要離開尼加拉瓜，進入哥斯達尼加。新體會，點樣推住單車過境。

中美洲單車三國遊 （9）2012.11.05 Isla de Ometepe 迷路記

中美洲單車三國遊 （9）Isla de Ometepe 迷路記

文章日期：11/07/2012 11:05 am

黑夜迷路記

中美洲單車三國遊   （9）Isla de Ometepe 迷路記

2012.11.05

梗係噚晚食Grill，食得太多肉，頂住個胃，唔係好瞓得，唔駛6點就醒咗。橫掂都要執嘢離開酒店，早啲起身。

今日行程相當緊密，早餐後，行李上車，單車就擺咗上車頂。有團友想去睇Masaya火出、抽一個鐘，等佢哋聞吓琉璜味，滿足大家要求。

睇完火山，專車直去碼頭。似乎無乜所謂時間表，又唔知幾時開船，大家就揾間湖邊餐廳仔，唔敢叫複雜嘢，一支啤，一件三文治算喇。我坐出去向湖露台。涼風由湖面吹來，好舒服，向西面望，Ometepe島就喺眼前。Ometepe就係兩個山嘅意思，即係話呢個島由兩個山組成。呢兩個山係火山，火山熔岩流出就形成呢個雙山島。火出而家重係生生猛猛。最後一次大爆發係1957年。而家，咁上吓都有溶岩流出，到處都係溶岩流過嘅痕跡，四圍都係大大小小嘅火山石。

喺餐廳等等吓，領隊Martin走入嚟，要我哋15分鐘內搞掂呢餐，即刻去碼頭。我件三文治都未嚟，即刻去櫃枱，堂食改拎走。一路咬一路走，原來我吔啲行李同單車已經上晒船，擺晒喺船尾第二層露天處，我哋好彩，坐晒喺船尾唯一嘅一排櫈。

乘客一路上船，將行李擺喺露天處，人就或企或生，悉隨尊便。開船喇，哦！而家至搬大件嘢上船。雪櫃、電視、大型坐地焗爐、牀褥…..乜都有，呢個國度，無超載呢件事。

船開喇，烟通噴出黑烟，我哋坐船尾，船向前行，烟向後走，我哋受晒。水手傳一張表，乘客要喺上面填上姓名、國藉及年齢。Hah！要嚟做乜嘢呢…？

船行個幾鐘就到。上岸後，行李由酒店專車攞走，我吔就由碼頭踩單車去酒店，路程25km，全程行馬路。由船上向小島望，只見係綠油油長滿植物嘅島，好似荒島。踩單車沿島行至知，原來住咗好多人，沿途都係平房民居。火山喎，唔知幾時….哎….。點解咁多人住？因為火山，土地就肥沃，種乜生乜，點捨得走！

領隊講咗酒店名同海灘名，又話只得一條路，出發！

25km踩公路，真係濕濕碎。黑得旱，預算太陽落山前到。馬路全部pave晒，好好踩，都好多上上落落，唔好睇團友一把年紀，個個都好踩得。我？中間咁喇。既然話一條路，我都懶理路牌，就係沿馬路一直走。我同Anne，英國阿嬋，一齊到達一個鎮，發覺唔對路，就係鎮口等多陣，跟住又有兩個嚟，我哋覺得行錯路。問人，至知過咗籠，要返轉頭，此時天已黑晒。我有紅閃燈掛喺背囊，就押尾。踩吓問吓，有一個家庭，兩架電單車，居然主動話帶路，一架喺前帶路，另一架坐咗仔女嘅押尾，佢嘅車頭燈照住條路，我哋就更安全喇。

行咗半粒鐘，遇到酒店嘅車，佢慢駛跟住我哋，行多半粒鐘，終於到喇，先啤一啤。講起，原來我哋miss咗個右轉，唓！又話一條路直行？

因為小小誤會，我哋喺黑夜踩咗一粒鐘，都係特別嘅經歷喇。

食飯洗漱不在話吓。返房寫blog，寫咗兩行就瞓著咗。

唔寫喇，瞓啦，明天遊島，勁嘢嚟！

中美洲單車三國遊 （8）2012.11.04 單車遊，downtown and the peninsula

中美洲單車三國遊 （8）單車遊，downtown and the peninsula

文章日期：11/05/2012 12:53 pm

落大雨，泥鴨一隻

中美洲單車三國遊 （8）單車遊，downtown and the peninsula

2012.11.04

噚晚畀班友講到我有啲緊張，唔係瞓得好好，今朝6點半就起咗身，搞吓電腦就梗喇。七點正齊集大堂。團友全部見晒。共有９個人，加一個領隊，一個mechanic，共11人。一路食早餐一路聽領隊Martin 講嘢。計劃有啲變化，本來今日開始向南進並且轉新酒店。為咗更加安全，今日就踩附近，目的係試吓單車性能，保證所有部件工作正常。再者，人亦要熱吓身。

呢個團係包埋單車，噚日，單車已經運到，單車前綁咗一張過咗膠，寫咗人名嘅紙仔，各人晤駛卣我介紹，一睇就知你係邊個。我個名串錯咗，Kin Fai 變成Kind Fai。都幾啱，我梗係kind喇。唔講唔去，原來單車個brake有唔同制式。我哋慣用嘅係左邊剎後，右邊剎前。呢度嘅份相反，左前右後，好彩講聲。

一行11人浩浩盪盪由酒店出發，喺Granada城左穿右插。領隊Martin帶頭，機械師押尾，保證唔會走失人。Granada城好細，都係教堂、炮臺啲咁嘅嘢，好快就遊完。離開市中心，踩入尼加拉瓜湖嘅半島。幾日前，我搭船遊過半島海岸，今日我踩車穿過成個半島賞

呢度全部係泥路dirt road，路旁草叢要好小心，隨時有蛇，一定唔可以走入草叢。踩入凹凸不平嘅泥路，佈滿大大小小泥氹。踩呢啲路都有啲技術要求，全團人都有水準，大家都跟得好貼，進程十分順利。行咗個零鐘，有兩三架車，發現問題，鬆咗啲零件、軚漏氣，gear晤順等。問題出晒嚟，早啲發現，早啲搞番掂。半島有幾大吖，彈彈跳跳，顛顛簸簸，又去到半島盡頭，行都湖邊，坐吓洗吓腳上嘅泥，透吓氣先。

15分鐘後回程，呢個時候，個天已經積緊雲，11點，狂風大作，吹埋嚟嘅風都幾寒，瞬間就落起傾盤大雨。呢啲係典型嘅tropical rain，多數會係三、四點落，今日提早咗。各人即刻落車揾棵樹遮吓，不過已成身濕哂。呢啲雨，嚟得快又去得快，半粒鐘就散晒，冇耐，重見番藍天白雲。但係條路已經爛溶溶，單車喺泥路上走，濺起嘅呢漿打到成腳、成衫、成褲都係，個個變成污漕貓。

踩番出大路，都係午餐時間，湖邊有間小店，以魚著名。坐低叫餐，先嚟一杯啤酒。嘩！呢一啖啤酒，認真受用。團友嚟自天漄海角，各有不同人生經驗，都好多嘢講。

食完傾完，又踩車回程，今日踩得好少，體力要求係濕濕碎。但係，爛路、泥氹、狂風大雨、成身濕晒，又買係未試過。呢度三國都係tropical，咁嘅嘢，嚟緊十幾日，好多機會再試過。

晚上，領隊提議去一間專食Grill嘅餐廳，話係the best of the town。好！又試吓。唓！BBQ啫，味道？過得去喇。埋單，每人US 15 – 19，係最貴嘅一餐。呢條友都係富貓嚟，以後要諗過先，咁洗錢法，點得掂。

要pack嘢，明天轉新酒店。

Suesue at 11/05/2012 01:00 pm comment

very interesting! Take good care of yourself, old mate.

kin at 11/06/2012 10:16 am reply

Will do, don't worry

中美洲單車三國遊 （7）2012.11.03 預備單車遊

中美洲單車三國遊 （7）預備單車遊

文章日期：11/04/2012 12:07 pm

Homestay Family 多谢照顧

2012.11.03（7）預備單車遊

後生嘅人唔瞓得好多，雖然夜瞓又攰，7點就起身。Felix仔預備咗尼加拉瓜糯米雞做早餐，又係用塊大葉，包住大嚿飯，裡面乜都有啲。好唔好食？我食咗一半，話，啲嘢好食，不過太飽喇，食唔哂，sorry囉。

雖然唔駛返學，但係我都返番去學校，因為可以上網。

9點半去到旅行社，呢個Martin又已經企咗喺門口，咁鬼勤力。原來佢係加拿大人，好鐘意呢度，重打算買個物業做酒吧。佢係愛爾蘭人，佢話愛爾蘭人就鍾意開酒吧。跳上觀光小巴，圍住個城四圍去，教堂、市場、最古老嘅屋、市議會、炮臺、墳場、古老火車站，啊，重行咗入一間造地磚工厰添，講吓歷史、講吓人情，都係一個好開心嘅快速走馬看花。

11點去番中心區，我自己再行。LP介紹 Covento e Iglecia de San Fransico，本來係個修院，燒毁後重建，就係而家嘅教堂。呢個點一定係個must see，遊客一車跟一車咁嚟參觀，外表睇，多數係退休人士，有啲重要人扶上石級，有啲攞住行山杖。梗係喇，趁仍然行得（雖然勉强啲），去得幾多得幾多！重有，好多由美國嚟，交通方便吖嘛。我冇執輸，即刻跟住啲美國團，英文講解喎。

早上，畀咗US 5蚊過Felix仔，叫佢整個大份午餐，唔好太複雜，我要煎蛋、腸仔、三文治就夠，唔好整果汁，買支特大可樂就OK。12點返到，擺喺抬面就係咁！呢餐好開心。執拾細軟，告別各人，咁７日民宿生活，又告一段落。記番起第一晚坐喺牀邊幾唔高興，唓！住住吓就慣，人生就係咁嘅喇。

今日好熱，但成天冚住雲，係悶熱嗰隻。新背囊果然好用，全部家當孭上晒身，再行15分鐘，都非常舒服。行入酒店，櫃枱小姐第三次見我，問都唔駛問，即刻同我check in。入房，嘩！king size牀，即係話呢間房畀晒我。唔駛畀單人房附加費，又有單人房，真OK！如果成個trip都係咁就發達喇！不過冇乜可能。

游水後他他條條坐喺泳池邊上吓網，Skype傾吓偈，非常寫意，忽然翻起風，行晒雷，落起好大雨。喺呢度７日未落過半滴，今日下午冇節目就落雨，都算好喇。

團友陸逐嚟，噚日見嘅Anne 同Derek，今日見Isabella，佢哋三個睇款係退休人士，咁，我冇咁驚喎。冇耐，又見埋領隊，係德國人叫Martin Muller。高高大大，哈駛問，一定係單車高手嘞！重有四個，今晚夜啲到，聽目會見晒。即係話，全團連領隊係9個人。

領隊要接人，我哋四個出街食飯。講吓講吓，原來Derek同Anne係單車高手，用單車，去過世界各地旅行，Derek重參加過不少世界嘅公開賽！！！而Isabella亦係慣踩單車嘅人，雖然冇話屬於乜嘢單車會，但細時亦係踩單車四維走嘅。嘩！乜最渣係我。我即刻自爆，話：

「我乜嘢都唔係I am not even a cyclist，我只係想試吓，如果話踩40 – 70km，我試過可以應付，但更加取決於路面斜道。萬一應付唔到，有車跟往，就跳上車。你唔試過，點知得唔得。」

我咁講，係等啲高手睇住細佬。Isabella話，你得嘅，你得嘅。承你貴言，我會努力。席間又講咗好多技巧，我得個聽字，但獲益良多。

中美洲單車三國遊 （6）2012.11.02 畢業喇，Masaya 火山探險記

中美洲單車三國遊 （6） 畢業喇，Masaya 火山探險記

文章日期：11/03/2012 10:16 pm

Masaya 火山口，仲噴緊烟

中美洲單車三國遊 （6）

2012.11.02 畢業喇，Masaya 火山探險記

星期一上第一堂，今日星期五，就係畢業日喇。學到幾多唔緊要，點都要專心上埋呢堂。–坐低，Maria攞粒骰仔出黎，吓，玩board game？我最憎！擲骰仔，行到邊睇吓做乜嘢，例如講吓你最鍾意嘅音樂….等等。唔啱我喎。我提議講吓尼加拉瓜嘅嘢，例如歷史、文化等等。於是，由土著，西班牙殖民開始，講到而家個總統。戰爭喇、美國干預喇、社會問題….乜都有得講。因為係一對一，每句說話，邊個字唔識，都即刻問，問到明白為止。佢講完一堆嘢，我又試吓再講一次。咁樣又可以學語文，又可以學歷史、社會。我覺得好有趣味。

有聚合就有分離，係時候講再見，可惜講嚟講去都係多謝同拜拜，多少少心思嘅都唔識講，唯有用表情搭夠。

我要求提早一粒鐘完，食過屋企三文治，即刻行去旅行社。十一點半已經去到，旅行社Martin已經喺門口等。點解咁趕，原來今個星期日係市長選舉。好多政府機搆今日下午停工，我哋要趕喺佢收工前入到火山景區，聽日、後日都唔會開工，咁就冇得睇喇。唔只咁，聽日、後日，所有食肆酒吧等，都唔准買酒。好果係酒鬼，好早啲入定貨！

跳上四驅Ute，到另外一個hostel，去接一個法國仔，原來呢個「團」只得兩個客人。由Granada去Masaya火山唔夠三十公里，要趕喺收工前去到，Matin只用咗十幾分鐘就搞掂。進入山脚收費亭，車再行冇幾遠就係展覧廳。都係講火山點形成，先民點樣懼怕火山，要掟生人落火山口祭神….等等。原來呢一區根本就係喺兩個板塊之間，幾嗰大火山就一字排開，正正坐落板塊夾縫之上。Masaya火山喺2000年爆過一次勁嘢，石頭飛到Masaya市區，打爛車呀、屋呀….好多嘢，好彩冇打死人。流出嚟嘅岩漿凝固咗，而家仍然喺度。呢區嘅火山，仍然生生猛猛。前排噴烟多咗，即刻封山，以防不測。

離開展廳，有工作人員隨車，車喺閘口停低，每人派一頂工地用嘅安全帽，以防睇睇吓噴出石頭，扑親你就唔好喇。車繼續向山上爬，冇遠就見到山頂不斷噴烟，烟再向上升，喺山頂上空形成一堆又似塵又似雲又似霧嘅物體。到山頂，所有車都要褪後泊，車頭向外，咁樣，走都走得快啲。一落車就見到烟由火山口不斷噴出，有琉璜味，但唔係想象中濃。由火山口邊沿向火山口中心下望，就只見烟，深不見底。

巡例行個匝，影啲相。再上車，車去火山口嘅另一面。隨車哥仔落車後每人派電筒一支，「做乜鬼？探險？」，一行四人，沿住火山石碎石路向下行，去到一個洞口，原來要入洞，真係探險！成個洞就係由溶岩造成，修修長長，好似隧道，原來打仗時，居民就當防空洞。黑孖孖，沿住隧道行咗有冇200m（？），到盡頭，一齊熄電筒，感受吓全黑嘅環境。我搞吓氣氛話，you’re still there？冇人答，跟住哈哈大笑，然後行番轉頭。

我估呢啲隧道係咁形成嘅：火山爆發，溶岩好似河咁流出。溶岩河面因為接觸空氣而冷卻凝固，但中部仍然熱辣辣，繼續向下流，直到溶岩流盡，就變成中空嘅隧道。我哋一路行，都見到隧道頂部有由溶岩氣泡形成嘅痕跡。我提出呢個假設，全團人都認為係個 good guess。有冇地理人有乜嘢意見？

我唔估到睇火山要捐埋山窿，今次呢個trip有賺喇。

山上活動個零鐘，上車回程。車行冇耐，Martin話，路嘅右手邊係火山，左手面紅燈區，你去邊度。佢當然係攞嚟講笑，但我即刻諗起「火山孝子」，又幾啱噃。

離開公路，轉入Masaya市區。Masaya位於馬拿瓜同Granada中間，個城比Granada大，人口亦多，災難亦多，因為近火山，歷史上多次遭受巨劫。Masaya亦係尼加拉瓜著名手工藝城，好多人慕名而來。我行過市集，唔知係唔係選舉嘅原因，好冷清，小貓三四隻，點揾食？

有冇買咗啲乜嘢？我睇勻，咪又係啲咁嘅嘢，有乜好買！

三點幾返回Granada，即刻行去單車團集合嘅旅店。嗰位櫃枱小姐見過我，知我來意。佢話呢個團已有兩個到咗，而家游緊水。嘩！開心得我吖，即刻去泳池。係英國人，睇嚟係退休人士，由倫敦嘅南部嚟（講明--唔係倫敦）。我坐喺池邊地下，佢哋兩個在水中央，就傾起嚟。原來佢哋十日前已到尼加拉瓜，玩咗Leon、馬拿瓜、今日啱啱到呢度。

確認咗集合地點就ok喇。

同佢哋傾偈時，佢強調，佢哋係British，或者係Wales，但絕對唔係English！好有原則！有機會（有14日咁長），瞭解吓因乜解究！

今晚係最後一晚住民宿，聽日搬去Hotel Casa Vivald，由民宿行去，只須15分鐘！

一個段落結束，係另一個段落嘅開始。

Suesue at 11/05/2012 12:56 pm comment

See, 好有原則！I love it.

中美洲單車三國遊 （5）2012.11.01 Isletas de Granada, 鐘樓，馬車遊

中美洲單車三國遊 （5） Isletas de Granada, 鐘樓，馬車遊

文章日期：11/02/2012 09:51 pm

中美洲單車三國遊 （5）

2012.11.01 Isletas de Granada, 鐘樓，馬車遊

今日下午有節目，Felix仔一早搞掂早餐，早食早走。臨走叫佢記得，我要12點正有飯食。

而家我係最早返學嗰個。即刻上網，Skpye等，不在話下。Maria嚟到，我要出盡九牛二虎之力話畀佢知，我要早15今鐘走，並且因為參加咗遊船河，去唔到佢安排嘅節目（話要去參觀墳場）。佢明白咗之後，梗係話唔緊要，重叫我Tranqilo，我用小人心度佢，有假放，畀我就會好高興。

閒始上堂，繼續噚目嘅el articulo，教你幾時用el，教時用las…等等。學文法好緊要，否則你都唔知點樣組成句子，咁點講嘢？而家時間咁短，就算我識，好快唔記得，講多啲始終緊要。小息後，唔再講文法，Maria攞出一本介紹尼加拉瓜嘅書，打開地圖，就由土地講起，小小歷史，小小文化，人種、教育、節日、宗教、社會問題…….樣樣有啲。又講國旗、國花、國樹。咁教好好，因為我要明晒佢，所以要問，咁就有互動，活潑好多，好過淨係坐住聽。公道講，冇之前嘅嘢，你亦聽唔明。總之都係講平衡。

Maria非常醒目，早15分鐘，就fine喇，講完adios就急急脚返屋企。好熱，冲個涼，食個快飯即刻走人，5分鐘去到旅行社。好快等齊人，即刻坐上觀光小巴。

由市中心向南行，就係尼加拉瓜湖，車到湖邊再駛入半島景區。呢一區地貌係火山活動形成，喺一萬年前（！）Monbacho火山大爆發，將地上所有嘢連同岩漿噴晒上天，部份跌番落嚟嘅嘢就積成半島，零零散散嘅就跌得遠啲，咁就形成260多個不同size嘅小小小小島，有啲好似足球場咁大，有啲好似藍球場咁大，有啲種得幾棵樹，重有啲根本就係一嚿石，咁唔知算唔算係一個島。所有夠大住人嘅島都起咗屋，舊時係漁民住嘅，到而家就係超級勁揪富豪嘅屋企，當然亦有餐廳。每個島都有電纜由半島供電，由外面睇，全部都係超豪華嘅屋，外面停泊住大船、細船、水上電單車等豪華備設，十分夠派頭。

等船處有香蕉賣，係預備畀馬騮食。同船嘅有一對哥斯達尼加嘅夫婦，居然有一對由西澳嚟嘅姊妹。遊船沿住半島外，島與島之間嘅水道航行，真係好鬼寫意。又因為同內陸隔阻，樹木又多，就變成小鳥天堂。有長腳長咀嘅水鳥，企喺水中弧石上，又有數唔盡成群成群細小嘅海燕係水面急速穿梭。好猛太場，不過天氣乾燥，加上行船撞起涼風，舒服到不得了。

離遠就見到一個島上樹叢之間有黑影盪嚟盪去，就係頂頂大名嘅馬騮島。各人預備蕉，我就預備兩架機。樹上馬騮見有船駛近，即刻樹過樹，5秒鐘就去到伸出水上嘅樹枝，有一隻重沿樹枝跳咗上船嘅蓬頂，然後伸長個馬騮頭裝落船，再伸出長臂，成袋香蕉攞起，跳番上樹，逃之夭夭。呢件事發生喺前面隻船。我哋隻船埋岸，馬騮王施施然行出，攞咗香蕉就坐喺度食，其他馬騮仔馬騮孫，淨係得個睇字，焉敢越雷地半步。大聖果然有風範。

兩個幾鐘活動，又車又船，只係us 10蚊，冇得講喇，Hah，唔知佢有冇收錯錢呢？既然咁抵玩，再下一城。聽日，本來Maria約咗去Excurson，畀佢休息多一日，我跟番呢間旅行社。終於訂咗聽日下午去Masaya火山，後日早上揾個識英文嘅嚮導，帶我遊一次城，講吓歷史，講吓人文。兩個節目，收我us 40。去馬！

搞掂晒都係三點零，自己攞住地圖再行過。由中央公園西行15分鐘路程，有一間叫Iglesia de la Merced嘅教堂，建於1539年，係巴洛克建築（乜嘢？唔識睇！）。最緊要係有個好高嘅鐘樓，畀us 1蚊可以沿旋轉樓梯上到鐘樓。點會錯過吖，我，一口氣轉到上去，喺鐘樓氹氹轉360度睇晒Granada市全景，非常滿意。又轉番落地，至醒起，有幾個鐘未去，借問下面兩位肥兄弟，Bano？一肥話，哎…，另一肥話ok。拎住鎖匙，帶埋我去，穿入另一個廳，再開鎖穿過小門（連我都要低頭過）進入另一廳，就見厠所。我去時，佢重要喺出面等，然後帶番我出去。唔怪得佢起初要…哎…喇。咁好人，即刻出去講聲God bless you喇！

都只係4點，重有些少時間，向番中央公園行。見到一行馬車，好似的士站咁喺度等客，去到頭馬，問，cuanto cuesta por…哎….a ride（唔識講，英文試吓得唔得），佢話，How long time？啊！講英文，ok喇！開價，半個鐘us 10！cinco！siete！cinco！一路講一路褪，多數work。OK OK Come up！哈，又搞掂！

呢個馬伕好好人，一路有傾有講，我最鍾意讚人，氹得佢好開心。我問佢馬拿瓜同Granada，邊度好，諗都唔駛諗，佢話Granada好，點解？因為揾到錢！直接，make sence。佢冇欺場，半個鐘兜返火車站。畀５蚊，再加1蚊 for your smile，大家開心。

行番屋企，太陽落山喇。今日Felix仔去機場接佢阿媽Groria由邁阿美返嚟。五點幾，兩母子返到屋企。第一次見佢面，同佢全家一齊出去食Pizza，阿媽外出咗一個月，三母子嘰哩咕嚕，雞啄唔斷，睇嚟，感情都好好。

喺月光底下漫步返屋企。好！