Lukla 機場外等機走人
2012.05.07 Day 17 Lukla to Kathmandu
早啲起身，執好行李，預備好，幾時有機就即刻可以出發。
早餐就坐喺門口，晒住太陽嚟食。擔心唔知飛機飛唔飛，天氣幾好吖，睇情形，應該可以飛。跑道方向遠處半空中有一點移就物體，哈！唔係飛機重會係乜。幾秒鐘後，就聽到隆隆嘅飛機聲。大家跳起身，「走得喇！」Suresh返嚟回報，我哋班機已經確定。大家飲埋杯咖啡，拎起行李，行入機場。上機前，謝過副嚮導Dodi，再謝過三位挑夫。佢哋四位服務咗我哋十幾日，勞苦功高，可惜人工又唔係好多。過咗5月，就係行山淡季，佢哋亦冇工開。做埋我哋呢單，就要行2日（！）返家鄉。要等10月先至再出動。
班次都非常頻密，一班接住一班。飛機降落，放低人，隨即上人，即刻飛走，好以搭巴士。
登機喇，第二次搭，失去鮮感。無驚無險，降落加德滿都機場，驅車前往Shanker Hotel。分房後，我哋忙於洗衫，晾到成間房都係衫。
雖然有些少肚餓，不過肚仔重未係好好，唔食一餐清吓腸胃都好。實行過一個懶洋洋嘅下晝。井少出去泳池游水，我就柄埋喺房，繼續寫我嘅遊記。
下午，叫咗兩個尼泊爾後生仔上房按摩，想話舒緩吓肌肉疲勞。我實在唔係好慣俾人咁摸法，並唔係好亨受。
行山團提早兩日結束，可謂皆大歡喜。一則，團友利用多兩日，有人快啲返屋企，有人繼續去觀光。而我哋則提早兩日去Chitwan。另一則，公司方面，又慳返兩日食宿費。大家好！
咁，今晚就係告別宴喇。6點齊集大堂，一齊行去Thamel內一間餐廳。大家又食又飲，都好開心。晚餐後重話要去酒店旁邊嗰間Irish Bar繼續。可惜我哋第二朝一早就要搭巴士去Chitwan，所以未能參與。大家擁抱話別。前後16日相聚，至此告一段落。
返房收拾晾好嘅衫，只帶需要嘅嘢，部份留返喺Shanker Hotel，等6日後我哋返嚟攞。
今晚係十幾日來，喺低過2000m嘅地方瞓覺，重有冷氣，一定好好瞓！
No comments:
Post a Comment