離間 Namche 市集
由二千幾上到三千四，好多時會有高山反應，所以今日邊度都唔去，只留喺原地休整一吓。
噚晚凍到飛起，寫完嘢都成12點，以為好攰，會好好瞓，點之成晚瞓吓醒吓，好耐都未試過瞓得唔好。當然好早又醒咗，唔知喺唔係高山反應，居然有啲頭赤，唔係話好痛，少少赤吓赤吓咁。原來井少都係瞓得唔好兼有頭赤。由房上去餐廳，居然有氣喘感覺。咦，要放慢節奏喇！
食個晏早餐。我串錯嚮導個名，佢叫Suresh，四十幾歲尼泊爾人，屋企喺加德滿都。每日佢都要打點我哋嘅食宿。為咗慳時間，嚮導們都會幫客人落單入厨房，佢同副手，捧埋餐出嚟，食完又收埋碟入厨房，服待周到。副手叫Dodi，佢由家鄉條村行50km去Lukla接我哋機，同我哋一齊兩個幾禮拜，之後又行50km返屋企。真犀利！
今日休整，但唔係表示攤喺度唔郁，適量短程行山反而有助休整。
Namche Bazaar處於東西兩條南北走向嘅路嘅交匯點，係出Lukla嘅大門。自古以來都係貿易重鎮，而家就係去珠峰及各大著名行山、爬山嘅必經之地，小小市集，有幾十間旅館，向行山友提供食宿。所有街道都係賣同行山、登山有關嘅用品。户外活動禦寒衣物、背囊、睡袋….乜都有。街上行嘅，踫口踫面就係行山友同嚮導，當然成日都有挑夫同驢仔運輸隊經過。
我哋由Namche Bazaar西北面開始上山，三千四行山，果然有唔同感受，係要多啲時間warm up，動作亦稍為緩慢。先到訪Namche monastry，去過西藏睇寺廟，偏遠小鎮，梗係差好遠。裡面都係介紹彿教，講吓居民嘅歷史文化等。唔駛半粒鐘就行出嚟。再向東行，有個博物館，都係十分原始基本嘅，冇乜好講。不過，嗰度有幅大平地，除咗向南係河谷出口，呢度根本係被高山環抱，所有見到嘅山都有雪頂，閑閑哋都講緊6000以上，向東北方向稍遠，更係8000以上。原來呢度係可以睇到珠峰峰頂嘅。今日好多雲，睇唔到，以後一路行，都有好多機會睇到。
係咁行行企企三粒鐘，再由東面落番镇上，又話午餐時間。
攤透吓，出鎮行吓逛吓買吓嘢。返旅館上吓網，打吓電話，又到晚餐。
今日真hea！不過hea得有道理。
No comments:
Post a Comment