Chitwan 國家公園 四驅一日遊
早餐後，喺旅館集合，Khoba帶埋望遠鏡，打點晒pack lunch，提醒要帶多啲水。連同佢助手，一行四人，行入國家公園。要跨過Rapti河，先至到達公園入口。又冇橋，咁點過河呢？原來河邊泊咗好多隻好長嘅木cannoe，睇樣有八、九米長一米闊。要入公園，就搭呢啲cannoe，條河又唔係闊，我講笑話，只要將隻cannoe打直，可能已掂到兩岸，駛乜撑船？
由岸邊行5分鐘就係入口，已經有四驅車連司機等緊我哋。成日咁長，唔心急，先影幾張相先。
好多人做jeep safari都係半日，我哋大把時間，二來，相信深入啲，可以見多啲動物，於是揀咗個全日行程。來回96km，需時9粒鐘。
出發喇，我哋坐喺開蓬四驅車車斗前面，Khoba同助手則企高喺後面。觀察住空中、樹上、草叢、樹林，甚至地面，睇吓有冇動物踪影。
佢指天篤地，發現咗好多雀，講咗一大堆名，咁多名，我都唔識。佢叫停咗架車，叫睇吓棵樹，原來有隻蜥蜴喺樹竉伸咗個頭出嚟晒太陽，真犀利，得個頭咋，咁都俾佢見到！冇耐，又有發現，大家落車，佢指住地上一行腳印，佢話係孟加拉虎脚印，睇得到老虎由西走向東。嘩！好彩只係見到腳印，如果見到老虎，咁點算？
去到一處小溪邊，佢指住一棵生喺路邊嘅植物，「大麻」，即刻落車，不單影相，我摘咗一塊葉，咬吓，都冇乜味啫，又冇high嘅感覺。原來大麻喺尼泊爾都係違禁品，係要拉嘅，不過仍有唔少鬼，嚟呢度揾大麻食。
經過草原，而家啲草已經生到兩米咁高，好難睇到喺草叢內嘅動物，如果三月左右，草冇咁長，會見到多啲動物。再遲多啲，到六月，好多雨水，草會生到六米咁高，到時jeep safari都做唔到。騎象係唯一入叢林嘅方法。
一路上不時見到成群十隻八隻梅花鹿走過。我觀察，梅花鹿應該喺食物鏈嘅底層，數量係最多，所以係最容易見到。我哋幾好彩，除梅花鹿spotted deer外，連barking deer，hog deer都見到。車轉咗個彎，見到一大群馬騮，塊面圍咗一圈白毛嗰種。佢哋見到車，有啲爬上樹，有啲走遠啲，有啲好定檔，繼續食嘢。馬騮群後面有幾隻梅花鹿，見到車嚟，即刻走到無影無踪喇。原來呢啲馬騮叫Lanhurs，梅花鹿鍾意同佢哋一齊，互相警醒。
孔雀亦係成日見嘅，孔雀叫peacock，我知吖，我唔知原來公嘅先叫peacock，乸嘅就叫peahen！學到嘢喇。又估唔到啲peahen咁飛得，佢見到我地架車一到，幾秒鐘就飛咗上成百米外嘅樹頂。而peacock則施施然行入草叢，成日都見到佢條長尾突出草叢外。原來夜晚，佢哋都飛上樹上瞓覺。
國家公園最出名嘅動物梗係犀牛，原來呢啲犀牛同非洲嘅唔同，係印度犀牛，啲皮革個樣係灰灰藍藍。一路上都睇到佢哋，都係好遠好遠，不過如果太近見到佢，我又會好驚。
太陽昇得愈嚟愈高，我哋就愈嚟愈熱，車上乜到熱辣辣，膠座位，鐵扶手，全部都燙手。頭頂曬住，周圍蒸住，都好辛苦。睇吓Khoba同佢助手，好似乜事都冇，繼續企喺車尾揾動物，連汗都冇滴。我不停咁搽太陽油，問Khoba要唔要，佢話佢啲皮膚唔駛用太陽油。
深入西部48km，中午到達Chitwan西北角 Rapti河邊，呢度個樣似河口，鬼咁闊嘅河牀，河中重有好多冲積沙島。不過此河並唔喺呢度完結，係繼續流入印度。司機揾個蔭頂，一行五人蓆地而坐，助手攞出 出packed lunch，Chitwan野餐咯喂！有妙飯、炸雞、菓汁同生菓。零舍照顧我哋兩件，特登帶咗兩支匙羹，當地人唔駛用餐具，用上天賦予我哋嘅---右手，留意！唔係雙手。
曬咗成朝，fing咗成朝，坐低透吓舒服晒！點知Khoba又話發現鱷魚，話要去睇，見佢鬼咁積極，呢兩條又攰又懶嘅蛇，點好意思話「唓！鱷魚？未見過咩？」唯有起身，離開蔭頂，跟佢行入走叢。每次行入草叢，我都驚驚地，怕咁好彩，遇見隻唔知乜嘢，就唔知點算。行過草叢，去到河邊，離河面都有幾米高，又唔知河邊啲泥夠唔夠硬淨，萬一跌咗落河，你唔駛去揾大鱷喇，佢哋成班兄弟姊妹都會嚟同你見面！好驚！唔好行咁出。Khoba話發現有兩條大鱷喺對岸曬緊太陽，嘩！有成千米咁遠，用望過鏡都好難睇到，算吧喇！應酬吓，係咁意望吓鏡。嘩！係睇到噃，好大條呀！…返去食妟咯！
午餐後，探險隊繼續出發，車到另一河邊，繼續揾大鱷，都係無功而還，不過離遠不時都見到犀牛。多數喺草叢中，冇一次，好似噚日喺大象背上咁清楚。不過如果真係咁近，我又會好驚！
LP提過，如果好彩，會見到野象，重話佢唔係幾好老脾，如果佢衝埋嚟，只有一個方法，就係run for your life！車行行吓，離唔夠100米外，見到龐然大物，係象，野象！真係咁好彩，重咁近，我指住佢話，elephant！佢可能聽到，伸出條鼻，一路大叫，一路跑過嚟。司機即刻踩油走人，佢追咗一陣就冇追嘞，可能只係我哋闖入佢嘅範圍，佢趕我哋走咗就算嘞。好刺激，喺架車裡面，又唔係好驚，之後大家重哈哈大笑！
行行吓Khoba又有發現，喺離路邊約100m草叢處，又有一龐然巨物，我睇佢似一隻大水牛，注意，係一隻大苯象咁大嘅水牛，Khoba話呢隻嘢叫「拜神」（Bysen？），好難先至見得到，我哋真係咁好彩。佢企喺度食緊草，落車行近啲，佢都係冇乜反應。趁佢未發老脾，走人喇。
公園嘅南端，就係印度邊界，所以公園都好多軍營，每經過一個營，就係一個路障。見我哋係遊客，都好easy啫。
曬咗成日，司機車我哋去飲支可樂，一支點夠喉，整夠兩支。大地熱咗成日，天亦積起雲，風亦涼起嚟。喂！大佬，我坐緊嘅係冇遮冇掩嘅車，唔好落雨住，OK！
返到公園入口處，五點幾啫，成天都黑晒，搭cannoe過河時，雷電交加。快啲走，可惜我哋用晒盧比，要出鎮中心換錢。一路行，已落出雨。換完錢，重傾盤大雨。著上雨衣，喺大雨中漫步十零分鐘。冇所謂啦，返旅館即刻冲涼換過乾衫。
Chitwan係幾好玩，人又友善，不過，留兩日已夠晒皮。Khoba幫我哋買咗明日去Porkhara嘅巴士飛。早啲抖，tomorrow is another day.
No comments:
Post a Comment