路盡頭嘅高大身影就係我嘞。指指點點江山
2012.04.29 Day 9 Photse Village to Dingboche (4340m)
今日係入山以來最多路行嘅一日，8點鐘準時起程，天氣幾好，雖然有太陽，好大風，希望唔會太凍。都係向北行。由村後離開，即刻爬上高山。沿河谷山坡行，離村冇耐，向東北方向望。嘩！無遮無擋，珠峰就在眼前，未試過咁清楚睇。因為天氣好嘅關係，珠峰一路都喺我哋正前方。我哋而家睇到嘅，只喺佢嘅尖頂部份，主体山峰則俾前面群山山脊所遮，要到大大後日至可以好好咁睇。
越行越入，各雪山亦越嚟越近，景色亦越嚟越壯麗。
呢條小徑真係繁忙，迎面不斷有由珠峰base camp回返嘅人。行行吓，見到石階上坐咗一個人，佢問我哋要一個杯，我哋冇杯，俾咗個膠水樽佢。當佢要企起身時，至發覺佢係不良於行，佢話佢中過風，我哋要幫佢放個樽入背囊，因為佢手指搞唔掂啲拉鍊，重要扶住佢至起到身。睇住佢背影慢慢離我哋而去，我諗，如果佢再跌低，邊個扶起佢，如果跣腳，下面就係千尺河谷，佢唔可以保持平衡，就係咁先喇！我哋相遇嘅地點，前後村庄有半個鐘行程，好多時要大上大落，行山友都要用poles，或者手足並用至搞得掂，佢點樣行到呢度，真係一個謎。行冇耐，我回頭望番行過嘅山路，咦！點解唔咗佢？唔通…..！
再三回頭，佢喺大石後轉番出嚟，嚇得我，祝佢好運namaste。
今日行得比前幾日快，隊伍都拉得好開，嚮導同副嚮導合作得好好，照顧行得快嘅用佢哋舒服嘅節奏，慢啲嘅亦要安全趕上大隊。我，係快係慢？遲啲話你知。
上午行過兩個村，中午喺–個叫Shomare嘅村庄食午餐。連食連休息一粒鐘，兩點起程。行出餐廳，冇咗太陽，堆滿晒雲，包圍住我哋嘅大雪山，已俾雲遮住，起埋風。速速起程喇。行嘅路非常荒蕪，梗係喇，呢度已經係4千幾。最後一幅薯仔田就喺呢度。行咗個零鐘，就到今日目的地Dingboche (4340m) 。
一路由村口行入嚟，沿途都喺旅館同提供行山人各種服務嘅鋪頭，居然有網上服務，但都收晒，星期日？抑或太晏？
我哋先頭部隊到時，正副嚮導仍在路途中。三個挑夫更加早到，而且幫我哋安排好房間，行李亦已入房，認真抵讚。
行入旅館仔，見喺露天處有冲涼房。即刻柯打一桶熱水。預備梘液毛巾，冲一個4300m凉，水一樣喺慢吞吞，風喺四方八面吹嚟，都係挑戰。梗喺勝利完成任務。我又多一個紀錄。
旅館仔只係小規模，餐廳有暖爐，飯後堆咗三、四組人，打牙較，費時咁早返番呢個凍鐵鐵嘅房。
今日行咗7個鐘，14km，勁！！
呢度真係好凍，外面凍，房都凍。睇樣，要着多啲瞓。
明日係第二個休息日，唔駛咁早起身。
希望今晚瞓得好！
No comments:
Post a Comment