2016.09.29 and 30
嚤囉仔歎世界之旅（一、二）
Sydney to HK to Fukuoka to Nagasaki
除咗時間未試過咁長外，用乜嘢交通工具亦要試下新嘢。搭長程火車，係我嘅夢想。2013 年由青海搭青藏鐡路入西藏，兩日一夜，24小時車程，係我嘅紀錄。曾經有過呢個夢：有一日，要搭火車由香港出發（經過中國最南）去到中國嘅最北站 ⋯⋯。焉知道，滄海桑田，呢段中國幻夢行程，早已破滅。今日，中國夢，已經唔再喺我嘅 bucket list 裏面。
講世界聞名，由東至西橫貫俄羅斯嘅西伯利亞鐵路，梗係執正牛耳。西伯利亞鐵路東起海參崴，連接太平洋；西面經莫斯科直達聖彼得堡，連接波羅的海。要去海參崴，最簡單就係飛入去，不過，今次我棟另類些少 ⋯⋯ 搭船。有隻船，每周一班由日本開出，經韓國到達海參崴，呢個就係選擇日本作為我今次環球之旅起點嘅原因嘞。資料又顯示，渡輪碼頭境港市 Sakaiminato 離日本南部不遠，附近有兩個重要歷史名城，就係長崎同埋廣島。仲使諗咩，一於拜會呢兩個全世界唯一遭受過原子彈攻擊過嘅地方。再睇睇，熊本市亦喺附近，幾個月前，熊本受地震攻擊，據說，而家仍然做緊災後重建。咁就簡單嘞，日本站，一於係咁：長崎、熊本、廣島，尾站境港市，嗰度再搭船去海參崴，頭尾共九日。
最正路就係飛咗香港轉飛長崎，原來長崎冇直航，最近嘅機場係福岡，冇得揀，今日嘅飛行航程就係：雪梨⋯⋯香港⋯⋯福岡。
經過咗幾個月籌備，前嗰兩三晚仲發夢搭火車！可見我真係有尐緊張。根據經典運動心理學理論，適量嘅緊張（stress）係會提昇運動表現，係好事嚟。
睇返轉頭，我原來三月二十九日出院，而家九月二十九日起程。乜話，乜只係過咗半年光景？！呢半年好似過咗好耐，做咗好多嘢，好多事發生咗：
佳叔等到曾孫女出世，無憾息勞歸主；阿珊又正式成為專業翻繹員同埋有牌調解訟裁員，工作多到要推；大小姐返咗七年大學，卒之肯的起心肝戴返頂四方帽，佢仲定埋婚，而家仲籌備緊婚禮 ⋯⋯！
而我呢，呢半年內，喺去咗十幾日郵輪假期，去咗香港、仲去咗兩次雪山長假期之餘，屋企仲可以做咗幾個家居改善工程。嘩，呢半年，真係充實；呢半年，真係多嘢搞。話晒出院只係半年，屋企嘅至愛們（眾數）喺擔心之餘，亦全力支持我圓夢，冇話 gee gee gut gut 托手㬹，有咁多人惜（音錫）晒，我心存感恩。呢一日，廿九號，全家齊集酒樓，連四個月大嘅 Charissa BB 都參加埋一份，真難得。飲完茶，大小姐同阿珊仲可以血拼一回至送我去機場。
大話夾好彩，飛香港呢程，我自己上網畫位，專揀隔籬冇人嘅位⋯⋯。機門關閉，我中咗 jet pot， 成行畀我坐晒！好難得，飛機上可以打撗瞓咗一晚，咁梗係好嘅開始。
架機晨咁早到達香港，要喺機場留五個鐘！詩云：
機場焗 Hea 非出奇，食個翠華早餐A；
行行企企，又話上機。
五點幾，福岡空港着陸地。
不過，禍岡只係路過，今日嘅目的地係長崎，我一早已經買咗七日嘅JR 日本火車 pass。先搭免費機場巴士去 domestic 機場，轉地鐵去博多 Hataka，喺博多JR站換正式嘅 pass，隨即訂去長崎嘅火車。過程雞同鴨講，好難溝通，大家都好努力用盡渾身解數，卒之都搞掂，九點三十分。
之之助助， check in 、上房，搞得嚟都十點喇，落機後都未食過嘢，即刻出街搵嘢食。因為要就火車站，我今次訂嘅客棧，多數近市中心。一落樓，四圍都係食嘢嘅地方，不過唔知係咪太夜，食肆一係就收咗檔，開嘅都係小貓三四咁嘅款。求其入咗間居酒屋，睇下餐牌，比想像中貴尐噃，叫咗份最 cheap 嘅燒魚定食，都要九百幾円！真正日本風味，試過又如何呢？我話，雪梨嘅日本餐廳好味好多喎。
填飽個肚仔，順路四圍行個匝，瞭解暸解之後，就返歸發一個長崎好夢。
咦，七十七日，就咁又過咗兩日喇。
再噏過
嚤囉
