路邊小廟宇，到處都係
雖然話兩點至瞓，今朝六點鐘已擘大對荔枝龍（---眼），原來井少話佢五點幾就醒咗。冇法喇，後生仔唔瞓得咁多，起身搞le搞lo又到七點，約咗落去食早餐，一於食個露天花園早餐，本來以為包埋早餐，點知要俾錢食。又係嘅，兩個人住一晚收你18美金，重包埋早餐，你咪好發？叫咗兩份，都係煎蛋多士橙汁咖啡咁喇，每份約150-200盧比（HK15-20蚊）。‧
噚晚，夜孖孖到，都唔知附近乜嘢樣，食完早餐，孭起背囊，攞往地圖，行街去也。我一定要讚下自己，原來我揀呢間旅館仔，就喺著名地標Thamel內，一行出街，買嘢、食嘢……非常方便。我哋毫無目標四圍行，先向東行，10分鐘到舊皇宮。尼國十幾年前有宮庭政變，皇叔取代皇位，不久白己亦被推翻，而家，尼國已經係議會制嘅國家。舊皇宮亦成為博物館，我哋唔入去，只係兜住外城牆行一圈。
作為首都，加德滿都顯得貧窮，路面破爛，到處都係垃圾，一唔小心，好易踩到黄金，我好好彩，好快就中到獎。井少恭喜我，話佢阿媽講過，咁會帶嚟好運。我承佢貴言，我信喎！
唔駛一粒鐘，行咗一圈，去到正門邊閘口，有個穿著尼泊爾傳统軍裝嘅軍人，高大靚仔，走埋去同佢合影一張，井少重寫低佢Ｅ貓地址，話Ｅ番張相俾佢。
行出Thamel，向南行，行入咗一般人嘅生活區，睇嚟，日用品都係較為原始簡陋。話時話，過份追求離晒譜嘅精美生活，又係唔係人類發展嘅方向？我唔識講。
由八點開始行，到九點、十點返工時間，條條街塞滿人、電單車、Suzuki車仔，喺混亂中自有其秩序，作為遊客，放下成見，溶入呢個小宇宙中。井少由大陸嚟，當然見慣世面，我跟佢過馬路，十分安全。
神明，真係無處不在。行唔夠一分鐘，就見到大大小小，供奉神明嘅地方，大如成座建築物，兼有歷史價值嘅廟宇，又有細到1呎Ｘ2呎大小嘅路邊小神食龕。無論大細，前面一定有吊鐘，信眾先響起鐘，通知神明，再用手指先點前額，向下劃向胸前，來回幾次，咁就得喇，唔會阻太多時間，又有神明成日陪住，心就平安喇。又，如果你唔趕時間，可停一停，走入廟內走個圈，先要除鞋，保持裏面乾淨。再買個細蠟燭座供奉亦可，喺各條街打幾個白鴿轉，你必定體會到濃厚嘅宗教氣氛。不過，有印度教，又有佛教，唔知怕唔怕拜錯，又或者拜邊個都冇乜所謂？
窮係窮，一定有富起來嘅一部份人，都有部份街，專賣名牌，衫褲鞋袜，金飾手錶，高級餐廳，應有盡有。嗰邊廂披金戴銀，我前面呢個細路，打大赤脚，污糟邋遢，流住兩趟鼻涕，捧住飯碗，企喺街邊食緊飯！呢種景象全世界都有。要公平？怕者要喺第二個世界至揾得到？
行咗一朝，向番住嘅酒店方向回程，喺附近一間叫New Oleans嘅餐廳坐低，11點啦，食個簡單午餐。我哋未換盧比，用美金，1us = 80Rs，呢份餐，兩個人，us8蚊有找。
唔駛一分鐘，行返回旅店，行山嚮導Suise已坐喺大堂等我哋，佢車我哋去Shanker Hotel。係有阿差守門口，拉門俾你入兼同你「耍冧」；又有人幫你拎行李嗰隻酒店。如果喺網上book，雙人房us80蚊，包埋自助早餐，以服務質素嚟計，實在係好抵，可惜離Thamel較遠，日常行動、揾食不如旅館仔方便。、
Check in後，稍作整頓，又再出動。就喺門口，有三輪車伕兜生意，踩一粒鐘，開價us20，15成交。車伕已六十幾歲，重老當益壯，一路踩，一路介紹周圍環境，絕對係好嘅經驗。踩到舊皇宮時，佢話，佢鐘意皇帝，而家冇咗皇帝，變成毛派政府。講起嚟，似乎好懷念前朝。車伕踩嘅路綫，大多係我哋今朝都行過嘅，嘩，我哋都行咗好多哋方。行咗幾遠？9km。一粒鐘好快到，車伕冇耍花樣，好老實，俾啲貼士，算得乜嘢。
又去番new oleans飲杯嘢，貪佢有free wifi，點知上極都上唔到，好失望。再沿路行番酒店，冲個涼，預備本團嘅第一個歡迎晚餐，係尼泊爾餐。
可能係行山團嘅原因，我哋去食飯都冇車坐，都要行約20分鐘至到。呢間餐廳喺舊皇對面，專食尼泊爾餐。要除鞋並且坐地下，好彩有刀又供應，唔駛用右手食。一路食，重有靚仔靚女表演傳統歌舞。睇嚟，都係好似袋鼠國，有啲專俾鬼佬食嘅唐餐館。又有entre，又有main，又有甜品，總之樣樣有啲。我點都唔信尼泊爾人係咁食嘢嘅。好唔好食？都係咁上下啦，有得揀，我唔會揀呢樣，食碗炒飯，拉麪好過。咁講，作為經驗，OK啦。
本團有六個人，兩個由加拿大嚟，係一對父女，重有兩個由美國嚟，不過互不相識嘅，加埋我哋兩件，湊成六人。有一個嚮導，Suise，一個副手，加埋三個挑夫，一行11人，十全十美，再加零一，好得很。24號出發。
唔知係唔係時差（？），成日都好似好眼瞓，今晚早啲瞓，預備明天。
小連 at 06/04/2012 03:54 pm comment
好開心找到你遊記﹗我六月中出發喇﹗
kin at 04/25/2012 08:20 pm comment
多謝回應， 會繼續寫，可惜山內net唔多方便 盡量快上，
T L at 04/24/2012 02:12 am comment
好友结伴远方行，正！多谢blog分享。btw, 万事小心。blog不要停啦，忠实读者在这里。我的回应也快，只在亚珊之后。
Siu Shan at 04/23/2012 08:28 pm comment
wow, it's seems that you have a very good start, enjoy your challenging trip. take care.
No comments:
Post a Comment