Turkey and Balkans Trip (26) 2015.06.10 Sarajevo - Mostar

Turkey and Balkans Trip (26)

2015.06.10 Sarajevo - Mostar

Mostar 地標

一早起身，見到 Fadil 兩公婆坐喺潛建露台嘆早餐，個露台無依無靠，就用鐵製狗髀架撐住，支架再鑲喺外牆。係就係風景無敵，我喺出面企咗一陣，雞咁腳就縮返入屋。入返㕔，噚日食唔晒嘅麪麭，今日繼續上枱。畀嗰些少錢住民宿，有得食，好滿意喇，即刻郁手㷛水冲咖啡，食完馬上出街。

趁仲早，四圍行多陣，之後就去旅行社集合，原來我兩位同車旅友已經到咗。冇耐，韓國車仔嚟接我哋，司機 Marko ，係一個中年波斯尼亞人，高高大大，好建談。離開市區，車仔一路向西南 - 我哋今日嘅目的地 - Mostar 進發。佢一路揸車，一路叫我哋自我介紹。

其中一位同車旅友，一睇就知係穆斯林，佢著住灰色輕紗長衫褲，外加短袖 Tee 裇，淺藍碎花長絲巾，穆斯林包裹方法遮蓋頭髪，並且垂及披肩。佢行止落落大方，睇嚟，一定唔係嚟自極端回教國家。我估計冇錯，佢係土耳其人，一個人嚟巴爾幹旅行。今日，佢仲拎埋隨身行李，因為佢會留喺 Mostar ，即係話今晚回程時，佢唔跟車返薩拉熱窩。其實佢好聰明，參加一日團，順手搭埋車去下一站，咁樣係獨行背囊友旅行嘅好方法。另一位旅友嚟自意大利，兩位都係歷史系學生，都係仰慕巴爾幹歷史魅力而嚟。咦，三位同車男女旅友都有共同興趣，又會咁啱嘅？

冇耐，我哋就由波斯尼亞地區，進入黑塞高雲拿地區。其實波斯尼亞人 vs 黑塞高雲拿人，只不過係地理上嘅分類，就好似我哋話：香港人、九龍人、新界人一樣。車仔行咗百幾公里後，到達河邊小鎮 Jablanica。路邊，醒醒目目有間餐廳 Restoran Zdrava Voda ，呢度係我哋嘅 Coffee Break 。主要公路旁邊，好多時都有咁樣嘅餐廳，方便揸車、及路過嘅遊人。Marko 駛入停車場，搵張枱坐低，我叫咗杯 Mocha。三件旅友，一齊飲咖啡、食件餅之際，Marko 就開始講古仔嘞。

波黑聯邦，係內陸國家，只有西南一小段 20 公里海岸線，破開克羅地亞，由Dubrovnik 北面，通出 Dalmatian Coast。我哋沿路嚟，經過嘅都係山呀、河呀，車路蜿蜒曲折，好少見到一大幅平地。

政治上，波黑聯邦由兩個政治實體組成：一個係波黑，一個係塞族共和國（Republika Srpska。 注意，唔等如「塞爾維亞共和國」！）各自有自己嘅政府、總統、軍隊。加埋聯邦呢一層架構，就有三個政府、三個總統。各聯邦又有屬下嘅行政分區（省？）稱為 Canton，又有自己嘅議會 。波黑聯邦人口，主要由波族 bosniaks、塞族、克羅地亞族組成，其中各民族又分成穆斯林、天主教、東正教、少數猶太教，哈，仲有共產黨 ⋯⋯！？！？

小小地區，複雜成咁。Marko 一路嗒咖啡，一路有一句冇一句咁講畀我哋聽，其實聽完都係一頭霧水，不過就真係好瞭解，呢個地區，真係好複雜。歐洲火藥庫，果然名不虛傳。

政治難搞，食物就易明好多。呢間餐廳近路邊處，有個好大嘅燒烤棚，座落咗幾個，每個三米咁長嘅燒烤爐，串住十隻八隻全羊，正在喺炭火上面滾動燒烤緊。香味梗係吸引，不過最有趣係串住隻全羊嘅燒烤鐵桿，佢哋嘅轉動力，喺嚟自人工水漕，流水推動巨型水輪轉動，再帶動燒烤桿轉動。個水輪成十呎咁大，離遠都睇得清清楚楚，就算係汽車上聞唔到香味，都見到水輪氹氹轉，絶對係上佳嘅宣傳手法。我鐘意四圍𥄫，睇真尐，原來水輪係裝假狗，其實有鐵錬連住摩打！不過，動力真假又有乜所謂，香噴噴，即燒即食，一定唔會差得去邊。佢燒得咁多隻羊，生意一定唔錯。可惜我哋只係嚟飲咖啡，索多一啖羊騷味，忍着淚說 goodbye 喇，跳入車仔，再上征途。

由 Jablanica 餐㕔再向南行唔使半粒鐘，就到達 Mostar 。成日流流長，我哋唔急於到 Mostar ，反而再向南行多少少，去 Pocitelj 村莊，睇一個堡壘。

如果沿呢條路繼續向南行，就可以去到阿得利亞海岸。其實，前日我由克羅也亞去薩拉熱窩時，都經過呢段路。村莊就喺路邊，村前有好多停車位。落車後有細路仔上前兜售自家種嘅士多啤梨，路邊又有賣紀念品嘅地攤，即係話，呢度都係旅遊點。Pocitelj 嘅歷史可以追朔到鄂圖曼帝國時期，堡壘及建築物都係當時建築風格，村民都係以穆斯林為主。

村落南端其實係一個小山崗，村屋依山而建，半山有清真寺，蜿蜒小山徑，經過村屋直上 50米高嘅山頂，堡壘就座落山嘅最高點。50米小山崗？濕濕碎，我一口氣行上頂。堡壘入口嘅拱門仍然屹立不倒，沿石卵路行到堡壘，雕堡主樓大致完好，貼住內牆邊，有旋轉石樓梯一直爬上頂，頂層四邊有人咁高嘅瞭望囗，坐喺矮石壆，成條Neretva 河，同埋河邊村莊盡收眼底。二十年前嘅波斯尼亞獨立戰爭，塞軍喺呢度狂轟猛炸，全村波族穆斯林，唔係被殺，就係拉晒去集中營，直情就係種族滅絕。今日 Pocitelj 村嘅村民，戰前出生嘅，唔夠三百人！

沿小路落返停車場， Marko 買定士多啤梨等我，我哋縮喺樹蔭，一路傾偈一路嘆新鮮生果，等埋兩位女士。

原路向北返轉頭，途中經過一個東正教修院 Zitomislic Monastery，係十六世紀興建嘅聖母堂，佢收藏咗一尐金銀教堂裝飾物，橫掂路過，停低睇下都冇壞，我哋嘅穆斯林旅友都入埋去參觀。修院好細，除咗少量金銀裝飾品外，牆上、天花拱，都畫滿聖經故事壁畫。正當兩位旅友併肩睇緊壁畫之際，我感覺到一個好特別嘅場境：一個羅馬天主教嘅意大利人，一個穆斯林土耳其人，一個東正教修士，一個波斯尼亞人，一個澳洲藉香港出世嘅華人，一齊出現喺黑塞高雲拿嘅東正教修院。咁多種族，咁多信仰，又咁和諧，我即刻舉機影張相，好舒服，好平安嘅畫面。

離開修院冇耐，車仔轉右，沿河嘅支流向東走，我哋行咗入山區，右邊係Neretva 河嘅支流 Buna 河 ，左邊就係山邊。一般河流，愈上愈窄，呢條 Buna 河好奇怪，佢係愈上愈闊，去到尾，居然出現一個大水潭，冇咗條河。連條路都冇埋！點解？喺正前面，就係一堵絶壁百米石牆，抬頭向上望，真係又高又直。面前水潭呢度就係絶壁崖底。水潭盡頭絶壁崖底處，原來係個大山窿，河水就喺裏面滔滔流出，原來裏面係一個石灰溶洞 Kastic cavern，呢條 Buna 河之源，就隱於山窿裏面大山深處，不為凡人所知。水潭近出水口處，人工造咗一條弧形分水堤，將河水兵分三路，引入村莊服務大眾。

貼住絕壁崖底水潭邊，有一座三層高白色金字頂屋仔，佢就係我地今日嘅第二個觀光點 - Blagaj Tekke ，屋仔係鄂圖曼帝國15世紀時期嘅建築，已經有四百幾年歷史，一向都係一個穆斯林教派嘅退修寺。退修寺乃隱居修練之所，呢度就啱晒喇。看！絶谷崖底，白龍潭邊，瀑布濺起層層薄霧，流水潺潺，輕煙裊裊。好一個仙境人間。朦朧迷糊之中，化成大俠，由崖頂跌咗落嚟，畀神鵰金眼兒救起，帶返去見火雲邪神古漢雲，收為義子，並且修練埋九式如來神掌（叮，小刀舞序曲響起），最後，返去緸霞山莊，同裘玉華雙雙闖盪江湖去也⋯⋯ 。

發完龍劍飛如來神掌之夢，就入去修道寺行個匝。好似一般清真寺一樣，門口有𢇁巾提供，入寺前要將露出嘅肉遮住。我哋呢個意大利天主教旅友，佢用兩條絲巾纏下纏下，就纏出一個時裝嚟，咁又幾好睇噃。寺內鋪滿彩色花地氈，陳設簡單，好多間獨立嘅房，有人喺房間裏面，低頭雙膝跪下，正在靜修，我參觀完畢，放輕腳步，離開靜修寺。

行橋橫過水潭，食肆喺岸邊擺咗枱櫈，又係午餐時間，搵張枱坐低，今日呢個午餐就對住潺潺流水，真夠氣氛。

午餐後，四人繼續行程，車仔離開山谷，走返出大路，向北行冇耐，就已經到達今日嘅主題目的地 - Mostar。Marko 先將穆斯林旅友送咗去佢嘅小旅館，道別後，就喺近古橋嘅橫街泊車，一行三人，徒步直趨 Mostar 古橋。

Mostar 係黑塞高雲拿地區最重要嘅市鎮，佢成為具規模市鎮嘅歷史，可以去到十六世紀鄂圖曼帝國時期。當初，條橋係冇名嘅，兩邊橋頭堡 bridge keepers 為保䕶石橋而建，當地話叫做 Mostari ，於是人人就叫條橋做 Mostar！叫叫下，最後，連個鎮都叫埋呢個名。當然，古橋就係古城嘅地標，遊人大多都係因為古橋而嚟。我睇資料介紹，除咗歷史原因外，古橋嘅日落係大大靚景，如果有時間，係應該喺度住一晚。坐喺橋邊河岸，食個「夕陽斜照無他橋」晚餐，梗係賞心樂事。

親眼見古橋，比想象中要大，佢中間冇支柱，就靠一塊一塊石板砌成拱狀。Marko 話，設計古橋嘅人，當時只係一個建築系學師仔，佢對自己嘅設計都十五十六，冇乜信心。起橋時。先用支架𠄘托，再一嚿一嚿石砌上去，拱橋完工，當要將支架攞出時，呢件學師仔驚到走咗路，唔敢睇！後來知道冇冧橋，先至敢返嚟，yeah 我得咗喇，佢話。

其實 Mostar 古橋，唔應該太陌生，自1968 年起，每年七月尾仲夏時份，呢度都有跳橋比賽。後來呢個比賽會出現喺電視新聞，係當世界花邊新聞咁播出，好記得，以前我都睇過呢則新聞。今日，你都可以跳，只要交咗 euro 學費，跳橋會 Divers Club 就會有教練教你點跳，真正跳橋之前，會畀十零米高度你試下，合格咗至嚟真嘢 - 24 米。

唔鍾意自己跳，睇人跳都得。當我上橋時，就有兩個後生仔企喺橋邊石壆頂，佢地只著短褲，以示隨時可以跳畀你睇，不過就要收集足夠跳橋費至得。原來，無論自己跳，抑或睇人跳，收返嚟嘅錢，一概用作古橋保養基金，都係善舉嚟嘅。而家，係就係有人圍住呢兩位跳橋友，可惜收唔夠錢，今日冇得睇喇。原來每次跳橋都有紀錄，截至早前，2015年 已經跳咗四百五十幾次喇。

古仔即係古仔，我而家親身踏足嘅呢條「無他橋」，其實係 2001 年重建嘅「新橋」，舊嗰條，已經喺 1992 年波斯尼亞獨立戰爭中，完全摧毀。1995 年戰爭結束。戰後，國家百廢侍興，有鬼錢咩。基於歷史價值，UNESCO、歐盟等協助班水重建，匈牙利又出動潛水軍人，盡量喺河底搵返原來嘅石頭。歷史學家、鄂圖曼建築師，一一出動，想盡辦法，用傳統工藝咁去起返條橋。條橋起咗三年，2004 年7月正式啓用。唔係講笑，計起嚟，呢條古老大橋，同香港都有尐尐 La lung。古橋復生，都算係一件歐洲大事，當日，歐盟派出外交專員，喺啓用典禮致詞，講話當然會呼籲民族和諧 blah blah blah。哈，就係咁啱，呢位專員，就係末代港督肥彭喇。

一日遊 Mostar 其實唔夠，最好能夠住一至兩晚，可惜，我地又要走喇。目的地已達，亦係時間回程。車仔繼續北上，路途中，時間尚早，仲可以停多一個點。公路沿 Neretva 河走，原來，Neretva 河呢度，都打過重要嘅戰伇。

話說，1943 年，歐戰正酣，鐡托領導嘅反納粹地下軍經常喺呢度出沒，德國希魔、意國墨魔派兵嚟清剿鐡托義軍。就喺河邊，大戰連場，義軍勢孤力弱，死傷枕藉。鐵托帶住眾多傷兵，被困喺 Neretva 河岸呢度。因為有大量傷兵，唔能夠快速轉移，為咗阻慢德意軍繼續進攻，鐵托一邊運走傷兵，一邊將所有橋樑炸毀，結果成功撤走所有傷兵。 Battle of Neretva ，鐡托義軍死咗萬二人，點計都係敗仗一場，但係，鐵托全力照顧傷兵嘅行為，絕對為後世景仰。佢對住傷員話：「絶唔會留下一個傷兵」。佢講得出，做得到。

車仔停喺當年鐵托炸毀嘅火車橋附近，當年嘅一段路軌保留至今，上面仲有一架蒸氣火車頭拉住一卡貨卡。倒冧嘅火車橋仲喺對岸，瞓喺山坡直挿河底。如今呢尐一切一切，都係呢度岸邊戰爭紀念館嘅展覽部份。紀念館廣場草地上就有一個雲石碑，刻咗鐵托對傷員所作嘅承諾：

「 Ranjenike Ne Smijemo Ostaviti 」

離開 Neretva 河，車仔沿大路繼續向東北方駛向薩拉熱窩，個半鐘頭車程，就返返去舊城，喺旅行社門口解散。多謝 Marko 帶咗我一日，多謝同車旅友相陪，又分擔咗旅費，有緣再見喇。咁樣嘅包車一日遊，盡興而還，每人承惠七十歐元，實在抵玩。我仲有聽日嘅一整日，但係仲未參加到「行刺圑」，再問遊行社小姐，佢答應幫我搞掂佢。

走入舊城，再行多一陣，又聞到油煙味，又係開餐時間，今次花多些少心機，試咗另一間餐館。旅行就係咁嘅喇，樣樣試下，增廣見聞。

今晚瞓個好覺，聽日 ⋯⋯ 行刺奧國皇儲。

早抖。