Turkey and Balkans Trip (21) 2015.06.05 Solta island, back to Trogir , 返回原點

Turkey and Balkans Trip (21)

2015.06.05 Solta island, back to Trogir , 返回原點

豆先生咁照顧，臨別啤返啤

噚晚喺睡夢中進入 Solta 島，浪漫號泊喺 Stomorska 港口，係一個好細嘅鎮仔。食過早餐，行過跳板，喺碼頭睇住工作人員幫手搬單車上岸，大家知道，而家係呢個行程最後一次搬單車上岸，係咪有尐唔捨得呢？

呢個島真係好細，打長唔夠 20公里，島上尐山仔，又得嗰二百幾米高，今日絕對係悠閒嘅一日。大家跳上單車，嚟自唔同船嘅單車友都踩埋一堆。由碼頭先爬升百零米，跟住就他他條條喺呢個高度，上上落落，唔夠一粒鐘，踩得嗰 13KM，第一個站就到喇。

十六世紀，威廉沙翁劈頭一句「to be or not to be」，講到而家都唔厭，仲有排講。廿一世紀今日，我踩單車嚟到呢度，又見到一句差唔多嘅：「to bee or not to bee」！計我話，呢句更有哲理，真係喎，做人做 bee ，自有造物安排，點到你揀？又係嗰句，唯有煮到嚟就食。

原來今日我哋訪問蜂場。單車友放低坐騎，穿過庭院，一齊坐喺花棚演講㕔。肥佬蜂園主人略略講解蜜蜂生命週期，呢尐都係中三生物課程啫，其實佢主要想帶出保護花朵、植物。保護環境嘅訊息，大家收到晒。跟住每人攤大手板，肥佬蜂主逐一派花粉，佢話，有花粉症嘅人，先食少少花粉（要 local 喎），再逐漸加多，就會舒緩花粉敏感症狀，work 唔 work？信不信由你。講起花粉過敏，我自己移民前，完全冇花粉症，唔知 Hayfever 為何物。慢慢喺袋鼠國住得耐，居然惹上花粉症，每到春天，尤其朝頭早，就猛打乞嗤，對眼又痕又紅。就今次呢個行程，喺土耳其開始，就開始有 Hayfever ，好彩只係少少唔舒服，冇乜嘢大不了。而家肥佬蜂主有好介紹，試吓搵尐 local 花粉嚟食都冇壊吖。

今早呢段路，唔單止他條，車路兩旁都生滿 rosemary 等等香草野花，一路踩車，香氣襲人，非常享受，當然亦都走唔甩眼紅及猛打乞嗤喇。

中午前，全程 17KM 由 Stomorska 踩去 Rogac 鎭嘅單車行程亦告結束，返到碼頭，同架單車影返張相，多謝佢喺呢六日載住我四圍去。將單車舉返上船之後，呢個跳躍離島 island hopping 又告尾聲嘞。上返船洗白白，又係午餐時間。

正當我哋享受緊青豆雞肉、大條通心粉做午餐之際，浪漫虢亦啓航，向住北邊 Trogir 港口駛去。Trogir！冇錯，就係七日前，我登上浪漫號嘅港口。呢個禮拜，我哋喺 Dalmatian Coast 順時針兜咗個圈，登陸咗 5 個外島，踩咗 213 公里單車。好彩，快樂時光仲未過去，浪漫號泊埋碼頭後，我哋有個 Trogir 古城導遊。執好傢生，上岸參觀去也。

Trogir 古城嘅發展，可以追塑到公元前羅馬時代，正如附近好多地方一樣，Trogir 喺唔同時期，有唔同嘅統治者。二千年嚟，希臘、羅馬、威尼斯、鄂圖曼土耳其 、斯拉夫 ⋯⋯ ，等等，都統治過呢度。邊有人可以講：「呢片土地，自古以來，就係某某大國嘅神聖領土」呢尐咁嘅廢話。

古城其實係座落喺歐洲大陸及 Otok Ciovo 島之間嘅人工島，七日前，我自己都行過一次，今日有人帶住，就梗係過癮好多。我哋由南面城門入城。好耐好耐以前，城門係宵禁嘅，遲咗返屋企嘅人，就要喺城門外過夜，等第二朝開城門至入得城，所以，城門牆外有個風雨亭，尐夜歸人就唔使受風吹雨打咁慘，呢個亭而家仲喺度，見證住 Trogir 古城歷史。

而家，古城仍然有人住緊。古老嘅房屋，上居下舖，蜿蜒石板窄巷，食肆、咖啡室，枱櫈開出路邊 ⋯⋯，多數古城都係咁嘅格局。旅遊業之於居民，永遠係一把雙刃劍。一方面，佢提高咗民居嘅價值，但係另一方面，佢又為居民帶來不便。你諗吓，你晾晾吓衫，有人嚟影你相；又或者你坐喺屋企，有人伸個頭喺窗前欣賞你笠記牛記個樣 ⋯⋯ ！咁，你鍾唔鍾意喺度住呢？

古城嘅東角係遊客最集中嘅地方，古鎮廣場 St John II Square、以往嘅官府機構就喺呢度，全城最著名嘅教堂 Cathedral of St Lawrence，就喺鎭廣場嘅北面。教堂係全鎮最高嘅建築物，畀入場費可以上去鐘樓頂，居高臨下，俯瞰全城，教堂亦有好多好有特色嘅雕塑，例如門口兩側一對男女裸體雕像，以當時咁保守嘅環境，實在非常出位。間教堂由十三世紀，斷斷續續咁施工，起到十六世紀，搞咗三、四百年，所以，每一層嘅時代風格都唔同，又話 Romanesque 、 Gothic 、Mannerist 、Venetian（呢尐嘢，我鬼知係乜！）⋯⋯，多種唔同建築風格都集中一身！如果唔係有導遊，鬼知咁多嘢咩。

導遊哥哥知識豐富，呢兩粒鐘非常享受，完咗導賞，我自己行多次再睇真尐，行到夠皮上返船，浪漫號嘅最後晚餐就等緊我喇。咁又唔係特別豐富嘅晚餐，只不過係青菜蘑菇湯，橙汁香草牛扒而已。餐後，徳國佬代表我哋多謝全體工作人員，當然，最實惠嘅，就係致送小費，大家客客氣氣，互相多謝一番。至此，成個 Dalmatian Coast Boat and Bike Tour 所有活動就正式結束。剩返嘅就係今晚瞓覺同聽日早餐。我一早已經約咗 Elena 聽日朝早九點喺巴士站接我返去 Split 搭巴士，我預咗食唔到八點半開始嘅早餐，所以，今晚晚餐後，同各位團友逐一道別，話晒同舟共濟咗八日，都係緣份一場。

擁抱過後，返倉瞓覺，靜候黎明。