Turkey and Balkans Trip (19)
2015.06.03 Vis island to Hvar island
最近心神不定，打斷咗寫遊記嘅雅興，而家略為回魂，又再噏過。
話說6月2號夜晚，浪漫號喺我哋食緊晚餐之際駛入 Vis 小島。Vis 係離開克羅地亞大陸最遠，而又有人居住嘅外島。第二次世界大戰時，南斯拉夫強人鐵托嘅指揮總部就喺呢個島上。盟軍嘅飛機、艦隊都由 Vis 島出發，去攻擊納粹德國。戰後，南斯拉夫鐡托繼續將 Vis 作為軍事基地。直至1989 年後，先至逐步開放畀旅遊業 ⋯⋯。
飽餐之後，又話天黑，落船附近行個匝當幫助消化。一宿無話，又渡一宵。
六月三日，早餐過後，即刻預備好行裝，跳上坐騎，又開始一日行程。講過喇，小島踩車，每次都係先上斜路，今日都冇例外，頭嗰五公里已經爬咗三百公尺，跟住又係大斜落。沿途靚景，百看不厭。個零鐘就落返三百米，去到島嘅西面海邊小鎮 Komiza 稍事小休 。大家各散東西，多數單車友幫趁海邊小餐㕔，飲杯咖啡食件餅，而我就踩住單車，滋滋油油，四圍睇嘢。鎮中心旁邊就係避風港，我沿長堤踩出盡頭燈塔，堤邊圍牆有紀念碑，係紀念二戰時由呢度開往戰場，參與解放歐洲大陸，而葬身大海嘅英國海軍。石碑外泊滿嚟渡假嘅私人遊艇，大家今日，生活喺自由大地，享受陽光空氣之餘，一定要記住呢班犧牲自己生命，為我哋爭取自由民主嘅戰士。別過紀念碑，踩返出鎮中心，會合大隊，又再次出發。
今日行程係一個環迴路綫，我哋由西面 Komiza 呢度，兜過島嘅南部，向東踩返去出發地點 Vis 小鎮。其實途中係經過鐵托戰時嘅指揮所，行程冇安排參觀，今次錯過咗，實在可惜。
今日總踩車路程只係三十幾公里，實在他條得很。返到碼頭，上得船嚟，已經係午餐時間。洗過白白，換返乾淨衫，「噹噹噹」，午餐鐘聲響起，一路開船，一路醫肚。午餐係番茄芝士雜莱沙律，主菜係薯茸球配茄汁肉丸。
正當我哋享受精彩午餐之際，浪漫號向東駛緊去 Dalmatian Coast 最長嘅外島 —— Hvar Island。成日流流長，食完午餐，仲有大把時間，船長唔心急泊岸，就喺海中間拋錨。呵，又係游水時間，換咗泳裝帶埋 GoPro ，一二三，又跳落水喇。講真，呢個行程，都好多機會喺船上跳落水，初初好過癮，慢慢，新鮮感已過，尐水又鬼咁凍，唔使半個鐘，大家都上返水。浪漫號亦向 Hvar 島嘅 Hvar 港駛去。
離遠，可以見到堤岸已經泊滿船，好彩，我哋呢尐 power yachts ，跟本冇泊位問題，就係一隻跟住一隻咁連橫船，泊埋一齊。到我哋呢隻浪漫號泊埋頭時，已經係第五隻，跟住仲陸續有來。卒之，由堤岸邊數起，一共有十隻船泊埋一齊過夜，非常壯觀。
船埋港後，又係自由時間，換過簡單行裝，上岸行街去也。
走過咁多個島， Hvar 島似乎係最多遊客嘅一個，到處都係人，鎭中心露天餐㕔滿晒客人，海堤上、廣場裏面，坐得人嘅地方，都有三三兩兩、一群群嘅遊人。佢哋一係曬緊太陽，一係閒坐欣賞美景 ⋯⋯，呢度雖然人多熱鬧，但係氣氛悠閒，感覺非常舒服。
Hvar 鎮一個唔可以錯過嘅景點，就係山上嘅西班牙堡壘 Fortress Fortica Španjola，當地人就稱之為 La Španjola 。由廣場轉入旁邊樓梯小巷拾級而上，蜿蜒山路仔就一直帶我登上三百幾米山崗，望住堡壘而上，一定唔會行錯路。堡壘係十六世紀，喺威尼斯統治時期建成，但係佢嘅前身及堡壘嘅地基，可以追塑到公元前一千年；一直到拜占庭時期，東羅馬帝國亦喺呢度起過寨城。其實西班牙從來冇統治 過呢度，十四世紀時，有一隊西班牙工程師參加堡壘建築工程，居然因此，就得到西班牙堡壘嘅名稱，其實佢官方嘅名叫做 Hvar Town Fortress。
堡壘係必到之地，唔單止係歷史，更重要嘅，呢度係全鎮嘅最高點，由呢度，就睇到 Hvar 海港全景，不過要參觀堡壘，就要畀入場費。咁遠水路嚟到，我點會摼呢少少錢？即刻磅水入場。堡壘唔算大，睇景都值回票價，最有趣係個堡壘監獄。監獄有三個監倉，都係原身由大石開鑿出嚟，倉嘅盡頭就係懸崖，並且鑿穿一個窿嚟抖氣，不過，呢個抖氣窿就睇到 Hvar 全海景。 香港人，打死一世工都買唔起咁靚嘅海景單位，呢度坐監都咁有景，真係同人唔同命，同遮唔同柄！
信步行返落山，走入人潮中。我沿海邊漫步，時而停低影相，時而坐喺路邊，靜觀百態浮生。Dalmatian Coast 嘅海水，真係清得好交関，呢度嘅海底、石牆邊黐滿一隻一隻黑色嘅海膽，海水清到連海膽伸出嚟嘅刺，都睇得一清二楚，我醒起有帶 GoPro 喺身，即刻趴喺地下，用 GoPro 伸入海，直接拍攝海膽。哈，又幾好玩喎。
又係返上船食晚餐時間，大家圍喺餐枱，一路食炆雞肶、多士燒魚皮，一路發表 Hvar 鎮半日遊見聞。紅日西沉亞得利亞海，飲飽食醉，各自返倉，尋好夢去也。
船邊暢游阿得利亞海
話說6月2號夜晚，浪漫號喺我哋食緊晚餐之際駛入 Vis 小島。Vis 係離開克羅地亞大陸最遠，而又有人居住嘅外島。第二次世界大戰時，南斯拉夫強人鐵托嘅指揮總部就喺呢個島上。盟軍嘅飛機、艦隊都由 Vis 島出發，去攻擊納粹德國。戰後，南斯拉夫鐡托繼續將 Vis 作為軍事基地。直至1989 年後，先至逐步開放畀旅遊業 ⋯⋯。
飽餐之後，又話天黑，落船附近行個匝當幫助消化。一宿無話，又渡一宵。
六月三日，早餐過後，即刻預備好行裝，跳上坐騎，又開始一日行程。講過喇，小島踩車，每次都係先上斜路，今日都冇例外，頭嗰五公里已經爬咗三百公尺，跟住又係大斜落。沿途靚景，百看不厭。個零鐘就落返三百米，去到島嘅西面海邊小鎮 Komiza 稍事小休 。大家各散東西，多數單車友幫趁海邊小餐㕔，飲杯咖啡食件餅，而我就踩住單車，滋滋油油，四圍睇嘢。鎮中心旁邊就係避風港，我沿長堤踩出盡頭燈塔，堤邊圍牆有紀念碑，係紀念二戰時由呢度開往戰場，參與解放歐洲大陸，而葬身大海嘅英國海軍。石碑外泊滿嚟渡假嘅私人遊艇，大家今日，生活喺自由大地，享受陽光空氣之餘，一定要記住呢班犧牲自己生命，為我哋爭取自由民主嘅戰士。別過紀念碑，踩返出鎮中心，會合大隊，又再次出發。
今日行程係一個環迴路綫，我哋由西面 Komiza 呢度，兜過島嘅南部，向東踩返去出發地點 Vis 小鎮。其實途中係經過鐵托戰時嘅指揮所，行程冇安排參觀，今次錯過咗，實在可惜。
今日總踩車路程只係三十幾公里，實在他條得很。返到碼頭，上得船嚟，已經係午餐時間。洗過白白，換返乾淨衫，「噹噹噹」，午餐鐘聲響起，一路開船，一路醫肚。午餐係番茄芝士雜莱沙律，主菜係薯茸球配茄汁肉丸。
正當我哋享受精彩午餐之際，浪漫號向東駛緊去 Dalmatian Coast 最長嘅外島 —— Hvar Island。成日流流長，食完午餐，仲有大把時間，船長唔心急泊岸，就喺海中間拋錨。呵，又係游水時間，換咗泳裝帶埋 GoPro ，一二三，又跳落水喇。講真，呢個行程，都好多機會喺船上跳落水，初初好過癮，慢慢，新鮮感已過，尐水又鬼咁凍，唔使半個鐘，大家都上返水。浪漫號亦向 Hvar 島嘅 Hvar 港駛去。
離遠，可以見到堤岸已經泊滿船，好彩，我哋呢尐 power yachts ，跟本冇泊位問題，就係一隻跟住一隻咁連橫船，泊埋一齊。到我哋呢隻浪漫號泊埋頭時，已經係第五隻，跟住仲陸續有來。卒之，由堤岸邊數起，一共有十隻船泊埋一齊過夜，非常壯觀。
船埋港後，又係自由時間，換過簡單行裝，上岸行街去也。
走過咁多個島， Hvar 島似乎係最多遊客嘅一個，到處都係人，鎭中心露天餐㕔滿晒客人，海堤上、廣場裏面，坐得人嘅地方，都有三三兩兩、一群群嘅遊人。佢哋一係曬緊太陽，一係閒坐欣賞美景 ⋯⋯，呢度雖然人多熱鬧，但係氣氛悠閒，感覺非常舒服。
Hvar 鎮一個唔可以錯過嘅景點，就係山上嘅西班牙堡壘 Fortress Fortica Španjola，當地人就稱之為 La Španjola 。由廣場轉入旁邊樓梯小巷拾級而上，蜿蜒山路仔就一直帶我登上三百幾米山崗，望住堡壘而上，一定唔會行錯路。堡壘係十六世紀，喺威尼斯統治時期建成，但係佢嘅前身及堡壘嘅地基，可以追塑到公元前一千年；一直到拜占庭時期，東羅馬帝國亦喺呢度起過寨城。其實西班牙從來冇統治 過呢度，十四世紀時，有一隊西班牙工程師參加堡壘建築工程，居然因此，就得到西班牙堡壘嘅名稱，其實佢官方嘅名叫做 Hvar Town Fortress。
堡壘係必到之地，唔單止係歷史，更重要嘅，呢度係全鎮嘅最高點，由呢度，就睇到 Hvar 海港全景，不過要參觀堡壘，就要畀入場費。咁遠水路嚟到，我點會摼呢少少錢？即刻磅水入場。堡壘唔算大，睇景都值回票價，最有趣係個堡壘監獄。監獄有三個監倉，都係原身由大石開鑿出嚟，倉嘅盡頭就係懸崖，並且鑿穿一個窿嚟抖氣，不過，呢個抖氣窿就睇到 Hvar 全海景。 香港人，打死一世工都買唔起咁靚嘅海景單位，呢度坐監都咁有景，真係同人唔同命，同遮唔同柄！
信步行返落山，走入人潮中。我沿海邊漫步，時而停低影相，時而坐喺路邊，靜觀百態浮生。Dalmatian Coast 嘅海水，真係清得好交関，呢度嘅海底、石牆邊黐滿一隻一隻黑色嘅海膽，海水清到連海膽伸出嚟嘅刺，都睇得一清二楚，我醒起有帶 GoPro 喺身，即刻趴喺地下，用 GoPro 伸入海，直接拍攝海膽。哈，又幾好玩喎。
又係返上船食晚餐時間，大家圍喺餐枱，一路食炆雞肶、多士燒魚皮，一路發表 Hvar 鎮半日遊見聞。紅日西沉亞得利亞海，飲飽食醉，各自返倉，尋好夢去也。
隱藏郵件原件
嚤囉
No comments:
Post a Comment