Turkey and Balkans Trip (24) 2015.06.08 Dubrovnik old city tour, Sarajevo

Turkey and Balkans Trip (24)

2015.06.08 Dubrovnik old city tour, Sarajevo

Dubrovnik 城牆遊

我嘅設計，Dubrovnik 係中途站，所以只係逗留兩晚。不過，嚟到先知，原來呢度旅遊資源豐富，閒閒地逗留一個禮拜，都應該大把地方玩。可惜我已經訂咗下一站，今日就要離開，噚晚同 Marija 講好，今日下晝食埋午餐至 checkout ，Marija 佢好大方，即刻應承，冇托手踭。可能而家仲未係旺季啩。

呢排好食好住，食少餐早餐都唔算得係乜，喺房冲杯咖啡，飲完就出街玩嘞。今日上晝行程非常簡單，全部喺古城搞掂。

去到一笪地方，我鍾意有人帶住我行，瞭解多尐當地風土民情，尤其呢個充滿歷史嘅巴爾幹，就更加如是。走出 Pile 城門，仲係好早，路邊旅遊檔囗仔先至啱啱預備開檔。

古城，攞住天書我自己行都得，但係有一個「戰爭遊」 War tour ，我就想有人講古仔過我聽嘞。睇住小姐搞掂檔囗之後，我馬上道明來意，點知晨早流流，佢畀檸檬我食：戰爭遊？今日冇團，不過佢建議我買個聲音導遊。小姐叫到，我梗聽晒佢話。聲音導遊係個 MP3 加兩張地圖，地圖上有標示觀景點，再配合 MP3 錄音內容，就有導遊效果喇。佢嘅好處，第一就梗係平喇；最大嘅特色，就係自由度好大，我用自己嘅節奏，行每一個觀景停頓點。鍾意喺邊度聽多次，又可以回帶，非常方便。

戰爭遊，就係城牆遊。古城嘅城牆頂部，其實係氹氹匝嘅通道，就好似中國長城一樣。遊客可以用唔同嘅入囗上城牆，但係全部都要逆時針行。我孭住聲音導遊，行返入古城，買咗飛，就由 Pile 城門入口，爬窄窄嘅石樓梯上城牆。城牆大約四層樓咁高，即係古城內一般屋頂嘅高度。

上到城牆頂通道，第一個影相點，就喺對正古城唯一嘅大街 Main Street Stradum 之上，大街直畢甩由東面 Pile 城門，通到西面 碼頭 Old Port，全長都只係 500 米左右。而家仲係早，望落條街，數埋都係十零人，不過到咗旅遊旺季，就一定好虛冚。

大街街頭，Big Onofrio's fountain 就喺腳下，好似一般羅馬古城一樣，為咗保障居民有水飲用，噴泉係不可或缺嘅設施。古城呢個噴泉嘅水，係引附近山上泉水而嚟，判出呢個引水工程，時為 1436 年，當年建築合約，仲有特別條款，講明引水途中，如果損失食水，就唯建築公司是問，要佢賠償咁講，豆腐渣工程，一定追究到底。水管引嚟嘅水，就喺街頭呢個噴泉流出，供人飲用。另外一個出口，就喺街尾嘅 Small Onofrio's fountain 流出。我去旅行，好多地方都叫你買撙裝水，唔好飲水喉水。呢度就例外，旅遊嘅宣傳品都叫人唔使買樽裝水，直接飲噴泉流出嘅水，清涼解渴又安全咁話，慳得就慳，我梗係照飲喇。中世紀嘅工程，用到今日，真犀利。

南面城牆臨海建成，企喺城牆向南望，就係一望無際嘅海洋。是日也，萬里無雲，眼前 Lokrum 小島，就喺薄霧中，孤零零咁瞓喺亞得利亞海。城牆遊客唔算多，今日，睇嚟冇旅行團，全部係散客，三三兩兩，行下停下影下相，大家都遊得好輕鬆。

呢段城牆，外面係海，城牆內就係民居，民居嘅頂樓，就係城牆頂嘅通道，所以行行下，有時會見到有門口通去人哋屋企；又有尐民居，會喺門口擺兩三張枱，做埋生意，賣小食汽水等等。最得意係城牆邊有間學校，佢樓高三層，城牆隔住操場就係課室，穿過窗口，就睇到學生上緊堂。先生有先生講，學生就望出窗囗，我睇佢，佢又睇返我，仲同我揮手。哈，咁上堂，又幾開心。但係，邊有心機聽書呢？

轉個彎，行入西面城牆，Old Port 就喺腳下，以前係海路入口，所有由海路進入 Dubrovnik 嘅人、食物都要經 Old Port 進行檢疫、打稅等手續。由 Old Port 進入古城，就要經過 Fishmarket gate，想當年，各地漁民帶埋海鮮嚟魚市場， 商人水客，城內城外，講價、叫賣聲 ⋯⋯，一定虛冚非常。

又轉個彎，就係古城北面，由呢度望返入城，可以見到我住嗰條街，除咗睇到一排一排紅色屋頂外，呢邊嘅風景就比較平淡嘞。原來，聽返聲音導遊， War Tour 就喺呢度開始。哦，原來「戰爭遊」，就係揾笪地方，坐低講古仔。好，咁我就喺欄桿邊呢度停低，腳下一排排紅頂白石屋，凝望遠海，聽古仔。話說 ⋯⋯

二戰後，強人鐵托同盟軍併肩作戰，打敗軸心國，解放巴爾幹半島。更重要嘅，係圓咗佢嘅心願 ，就係喺戰後 1946 年，再次統一斯拉夫民族，建立南斯拉夫聯邦人民共和國。鐵托出身自共產主義游擊隊，戰後自然倒向蘇俄，雖然唔似其他東歐國家，佢偏向比較自由化，但話晒都係共產國家，脫離不了獨裁體制。巴爾幹半島，多民族，多宗教，從來都係火藥庫。可能，鐵托真係夠晒硬淨，佢用鐵腕托住呢個搖搖貢嘅國家，直至佢老人家熄爐收工為止。

鐵托死後，八十年代，民族主義再起，正如毛主席天下三分理論話齋：國家要獨立，民族要解放，人民要革命。呢尐係歷史潮流，焉可抗拒。而家強人隕落，正係東山再起之時，八十年代呢十年，成個南斯拉夫醞釀巨變。南斯拉夫以塞爾維亞族（多數係東正教）為主，而克羅地亞以羅馬天主教佔多數。喺強人鐵腕統治下，宗教、人身自由都受到限制。所以，推翻異族統治、民族解放、建立屬於自己嘅國家，就係克羅地亞人民嘅強烈訴求喇。

八九年天安門，哥爾巴喬夫咁啱又喺北京，唔知柴玲李陸，喺佢身上作咗乜嘢法，呢件俄國佬返歸後，就搞到蘇聯解體，東歐各聯邦紛紛獨立，史稱「蘇東波」是也。南斯拉夫當然喺正風眼，南共聯邦，亦告解體。此後一兩年，巴爾幹半島，紛爭不絶，亂晒大龍，大小衝突無日無之。 毛主席又話：「天下大亂，越亂越好」，克羅地亞梗醒目識做，佢喺 1991年宣佈獨立。咁，南斯拉夫塞爾維亞族領袖又會點諗呢？分裂國土？咁大件事，梗冇得傾。結果，就係戰爭。呢場仗好快就有聯合國維和部隊介入，打到 1992 年，塞爾維亞被逼停火。咁樣打唔羸，南斯拉夫塞爾維亞族總統米落索維奇心生一計：使橫手，實行以其人之道，還自其人之身，支助克羅地亞裏面嘅塞爾維亞人搞獨立。咁克羅地亞打完外面又打裏面，呢場仗由 1991 打到 1995 ，終於以二萬條人命換嚟克羅地亞嘅獨立。克羅地亞人稱呢場仗叫做䕶國之戰 the Homeland War。

打仗時，Dubrovnik 古城係主要轟炸目標，塞爾維亞嘅船艦、戰機，同埋喺黑山嘅塞軍，就實行海陸空，搏命狂炸古城，而且專打民居。我同旅館老闆女 Marija 講起，打仗時，佢就喺古城呢度，從佢嘅說話，都體會到戰爭嘅恐佈、傷痛。我又講埋米諾索維奇，佢即刻痛罵，話佢係冇人性嘅魔鬼。其實呢場戰爭只係二十年前嘅事，就算而家，都好容易喺 YouTube 搵到轟炸 Dubrovnik 古城嘅影片：

http://youtu.be/YmBvEnfQICk

今次城牆戰爭遊，雖然只係聽 MP3 講古仔，但係我都得益不少。其實如果有多尐時間，Dubrovnik 市區有戰爭紀念館，資料就更加充實喇。我走馬看花，聽完古仔，又行返起點，城牆遊，到此為止 ⋯⋯

咪住，我醒起我唔記得開 iPhone sport tracker 記錄我嘅行程。好，開咗機再行一次，呢次，齋行唔睇景唔影相。卒之，呢個圈用咗22分鐘行咗 1.88 Km，行程就記錄喺我個 tracker 嘅 history 裏面嘞。呢個圈又有尐笑料，當我行到一半，去到一個查飛 check point ，Check 到我係第二次過，佢話唔可以。死抝，係我嘅性格，我話我冇離開過城牆，又跟一個方向行，冇問題喎。佢都費事同我講，揮揮手，照畀我過檢查站。後來我睇返張飛，原來真係寫住行一個圈！我偷咗雞，真唔好意思。

原路行返落城牆，攞住 MP3 跟住地圖路綫行古城。穿過橫街，經過鐘樓、廣場，走入古教堂，街頭街尾噴泉裝水飲，市政㕔，街市 ⋯⋯ 等等等，一一到訪。一路行，一路聽解說，又一路影相，相當充實，相當愉快。

喺古城路邊食埋晏仔，就行返旅館，執嘢走人。臨走仲同老闆女 Marija 喺樓下傾多陣偈，咁又瞭解多尐尐 Dubrovnik 古城咁話喇。

頭尾喺克羅地亞留咗十二日，今日，終於要一別喇。拖住行李出返 Pile 城門，跳上的士，直趨巴士站。講開又講，克羅地亞靚仔靚女多，人又高大，靚人靚景，呢度旅行確係賞心悅目。呢位的士司機哥哥，又係高大靚仔一名，不過架的士係架韓國車仔，司機位窄到死。揸緊車，司機哥哥個膝頭哥頂到上個軚盤，個頭就頂到上車頂，情景好鬼搞笑，我見到都辛苦。不過要搵食，冇法喇。

我嘅下一站 -- 薩拉熱窩。

巴士離開 Dubrovnik ，好快就駛過邊界，進入波斯尼亞及克塞高雲拿聯邦國境。呢一邊，風景迴異， 過去十二日嘅 Dalmatian Coast 行程，就係海景；而家波克，就係山河。呢一程巴士要行約 265 Km，行行重行行，天光行到天黑，巴士行咗成七粒鐘，終於喺夜晚十一點到站。嚟接車嘅係旅館老闆，我哋一早傾過電話，認得佢把聲。跳上佢架車仔，黑夜中，錢七飛馳喺靜寂嘅薩拉熱窩街道。喂！首都嚟喎，乜咁冷清？呢個係我第一個印象。十幾分鐘車程就到旅館，係一間好普通嘅四層高舊樓，似民居多尐噃，執起行李跟住佢行上樓。上吓一層，上吓一層，上吓又一層。我乜都曉⋯⋯，乜原來喺頂樓⋯⋯！

安頓好，沖晒涼，終於可以他他條條望吓街。窗前樓下就係一條直畢甩嘅河，我喺地圖睇過好次。呢條河嘅河邊曾經發生一件驚世之事，而家眼瞓，留返聽日至講。