Turkey and Balkans Trip (14)
2015.05.29 Split – 單車海岸遊，古城 Diocletian's Palace
嚟克羅地亞主要係要參加一個單車遊河團，又聽講 Split 好靚，橫掂順路，就安排先喺呢度留一日。而且我嘅再下一站，薩拉熱窩，亦喺呢度搭車，咁樣就可以早一日嚟探路，
噚晚夜孖孖，畀 Elana 車咗我嚟呢度，都未知自己身在何方。佢臨走前放低咗一張地圖，等我自生自滅。住劏房，就要自己搞掂，邊有人整早餐過你食。一早起身，攞住地圖離開劏房，房門外原來有一個小小庭園，穿過小巷，走出大街，對面馬路就係一個街市，賣嘅係日用品、蔬菜生果、香料等生活必需，係熱鬧地區噃。再對照地圖，搞清自己身在何處，肯定識得返屋企之後，第一件事，就係去搵嘢食。
行過街市，就見到城牆，原來 Split 嘅最重要景點 Diocletian's Palace ，同我間劏房只有五分鐘步行距離。
古城 Diocletian's Palace ，由羅馬君主 Diocletian 興建，作為佢退休後嘅宮殿。皇帝身嬌肉貴，驚人對佢不利，呢個宮殿，似堡壘多尐。公元312年，終於遂佢心願，佢係病死喺自己嘅宮殿裏面。此後，宮殿就丟空荒廢咗。不過，住得唔好嘥，冇幾耐，就陸續又有人搬入嚟，住又好，做生意又好，仲向外圍擴散。慢慢就變成一個市鎮，而家，係克羅地亞第二大城市。
宮殿向海前面係海濱長廊廣場，因為全海景，貼住古城外牆，已經係一間一間嘅鋪頭，多數都係食肆。我求其揀一間餐廳，坐喺太陽遮底下，面對阿得利亞海，食份煎蛋煙肉早餐，一路飲咖啡，一路睇住地圖，諗下今日嘅行程。哈，咖啡因滲入大腦，即刻諗到好數。
Split 係一個伸出阿得利亞海嘅半島，非常平坦，沿住海邊，氹氹匝圍咗一條馬路。仲使講？踩單車就係最佳選擇。喺碼頭邊租咗一架單車，由古城沿海邊，向半島嘅西角走。踩咗一公里左右，就踏入 Park Suma Marjan 公園範圍，睇個樣，馬路亦係由樹林開壁出嚟，林蔭夾道，非常好踩。沿途好少車，間唔中有跑步嘅人，又有媽咪推住BB車經過，呢度好 local 喎。
咁上下，馬路邊有小路通落海，我踩住碎石路落海邊，石砌嘅小空地，我擺低單車，坐喺海堤上欣賞海景，隔籬左右，一個人都冇，藍天碧海，一葉孤帆，真有詩意。小空地有石䃈一路通落海，我除大赤腳，慢慢行落海，梗係要畀阿得利亞海嘅海水浸下腳至得㗎。不過，有些少遺憾，點解我冇帶泳褲！
半島西角盡頭係一個海濱公園，呢度非常熱鬧，全部都係細路同埋媽咪。細路喺海邊岩石、沙灘上走嚟走去，尐媽咪三三兩兩，坐喺露天餐枱太陽遮下，一路傾偈，一路睇實乖乖喺度玩，嘈吵得嚟，又好溫馨。我唔理尐細路嘅古怪目光，推住單車去到岩石盡頭，到處影相。呢尐地方好 local，一般遊客行唔到嚟，踩單車，就有咁嘅好處。
咁樣兜咗個半島公園一個匝，大約15公里左右，又踩返去古城。換個方向，今次向東踩，穿過熱鬧嘅市中心區，就踩落沙灘旁邊嘅小路。市中心東邊沿岸呢度係一個接一個嘅泳灘，呢條六公里長嘅單車行人徑，就將咁多個大大小小泳灘串連起嚟。較大嘅海灘會有餐㕔等設備，當然亦好熱鬧。又有尐細嘅海灘，乜都冇，就只有三兩個人，環境就好清靜喇。喺邊度落腳？總之各適其適，任君選擇，不過無論灘大灘細，游嘅，都係呢個靚海。克羅地亞呢個海，真係靚得交關。
踩到單車徑盡頭，就沿原路囬程，返返古城海濱廣場。交車時，大讚克羅地亞人靚景靚，租車人當然欣然受落，我嘅車租仲打咗折頭。口甜舌滑，係我強項。
費事四圍走，又喺城牆邊餐㕔食個晏晝。一份雞肉三文冶，就係午餐。好猛太陽，不過一尐都唔覺得熱。戴黑超，坐喺太陽遮下，呷住冰凍啤酒，前面廣場好似一個大舞台，海灣、郵輪就係背景，紅黃藍白黑嘅遊人，喺台上挹挹漾漾，好一齣人間眾生相。就算咁樣坐一日，真係唔會厭。
搞咗成朝，Diocletian's Place 古城都未入，埋單入古城。
睇過好多羅馬古城，多數都係廢墟，樑柱城牆，跌到一地都係。呢個古城，已經有一千七百幾年歷史，一路有人用，一路有人住，有尐新加嘅建築，又黐住尐舊城牆。我攞住地圖逐條街慢慢行，認下邊度係皇宮，邊度係教堂；金銀銅鐵四道城門都一一走過。其實。古城內地鋪多數係食肆，同埋專攻遊客嘅鋪頭仔。慢慢行，唔係話入鋪頭血拚嘅話，兩粒鐘，乜都夠晒。
除咗遊覽，今次喺 Split 仲有一個任務，就係要探路：睇下去薩拉熱窩嘅巴士站位置。其實 Split 個城好細，巴士站就係碼頭附近，好易揾。我去到巴士站，仲確認埋我喺網上買嘅巴士飛，任務完成。
今日已經喺街食咗早午兩餐，晚餐就古怪一尐喇。我喺附近快餐店，買個免治牛肉漢堡麭，再去街角小超市買支玉泉汽水加個橙，帶返劏房開餐。不過，就算咁樣買餐，計起嚟，原來都唔平得好多，下次都係去餐廳食，乾手淨腳咯。
臨瞓前，打個電話畀 Elana，提佢聽日一早嚟接我。
聽日，上船喇。
克羅地亞 Split 阿得利亞海 海岸 靚到攞命
嚟克羅地亞主要係要參加一個單車遊河團，又聽講 Split 好靚，橫掂順路，就安排先喺呢度留一日。而且我嘅再下一站，薩拉熱窩，亦喺呢度搭車，咁樣就可以早一日嚟探路，
噚晚夜孖孖，畀 Elana 車咗我嚟呢度，都未知自己身在何方。佢臨走前放低咗一張地圖，等我自生自滅。住劏房，就要自己搞掂，邊有人整早餐過你食。一早起身，攞住地圖離開劏房，房門外原來有一個小小庭園，穿過小巷，走出大街，對面馬路就係一個街市，賣嘅係日用品、蔬菜生果、香料等生活必需，係熱鬧地區噃。再對照地圖，搞清自己身在何處，肯定識得返屋企之後，第一件事，就係去搵嘢食。
行過街市，就見到城牆，原來 Split 嘅最重要景點 Diocletian's Palace ，同我間劏房只有五分鐘步行距離。
古城 Diocletian's Palace ，由羅馬君主 Diocletian 興建，作為佢退休後嘅宮殿。皇帝身嬌肉貴，驚人對佢不利，呢個宮殿，似堡壘多尐。公元312年，終於遂佢心願，佢係病死喺自己嘅宮殿裏面。此後，宮殿就丟空荒廢咗。不過，住得唔好嘥，冇幾耐，就陸續又有人搬入嚟，住又好，做生意又好，仲向外圍擴散。慢慢就變成一個市鎮，而家，係克羅地亞第二大城市。
宮殿向海前面係海濱長廊廣場，因為全海景，貼住古城外牆，已經係一間一間嘅鋪頭，多數都係食肆。我求其揀一間餐廳，坐喺太陽遮底下，面對阿得利亞海，食份煎蛋煙肉早餐，一路飲咖啡，一路睇住地圖，諗下今日嘅行程。哈，咖啡因滲入大腦，即刻諗到好數。
Split 係一個伸出阿得利亞海嘅半島，非常平坦，沿住海邊，氹氹匝圍咗一條馬路。仲使講？踩單車就係最佳選擇。喺碼頭邊租咗一架單車，由古城沿海邊，向半島嘅西角走。踩咗一公里左右，就踏入 Park Suma Marjan 公園範圍，睇個樣，馬路亦係由樹林開壁出嚟，林蔭夾道，非常好踩。沿途好少車，間唔中有跑步嘅人，又有媽咪推住BB車經過，呢度好 local 喎。
咁上下，馬路邊有小路通落海，我踩住碎石路落海邊，石砌嘅小空地，我擺低單車，坐喺海堤上欣賞海景，隔籬左右，一個人都冇，藍天碧海，一葉孤帆，真有詩意。小空地有石䃈一路通落海，我除大赤腳，慢慢行落海，梗係要畀阿得利亞海嘅海水浸下腳至得㗎。不過，有些少遺憾，點解我冇帶泳褲！
半島西角盡頭係一個海濱公園，呢度非常熱鬧，全部都係細路同埋媽咪。細路喺海邊岩石、沙灘上走嚟走去，尐媽咪三三兩兩，坐喺露天餐枱太陽遮下，一路傾偈，一路睇實乖乖喺度玩，嘈吵得嚟，又好溫馨。我唔理尐細路嘅古怪目光，推住單車去到岩石盡頭，到處影相。呢尐地方好 local，一般遊客行唔到嚟，踩單車，就有咁嘅好處。
咁樣兜咗個半島公園一個匝，大約15公里左右，又踩返去古城。換個方向，今次向東踩，穿過熱鬧嘅市中心區，就踩落沙灘旁邊嘅小路。市中心東邊沿岸呢度係一個接一個嘅泳灘，呢條六公里長嘅單車行人徑，就將咁多個大大小小泳灘串連起嚟。較大嘅海灘會有餐㕔等設備，當然亦好熱鬧。又有尐細嘅海灘，乜都冇，就只有三兩個人，環境就好清靜喇。喺邊度落腳？總之各適其適，任君選擇，不過無論灘大灘細，游嘅，都係呢個靚海。克羅地亞呢個海，真係靚得交關。
踩到單車徑盡頭，就沿原路囬程，返返古城海濱廣場。交車時，大讚克羅地亞人靚景靚，租車人當然欣然受落，我嘅車租仲打咗折頭。口甜舌滑，係我強項。
費事四圍走，又喺城牆邊餐㕔食個晏晝。一份雞肉三文冶，就係午餐。好猛太陽，不過一尐都唔覺得熱。戴黑超，坐喺太陽遮下，呷住冰凍啤酒，前面廣場好似一個大舞台，海灣、郵輪就係背景，紅黃藍白黑嘅遊人，喺台上挹挹漾漾，好一齣人間眾生相。就算咁樣坐一日，真係唔會厭。
搞咗成朝，Diocletian's Place 古城都未入，埋單入古城。
睇過好多羅馬古城，多數都係廢墟，樑柱城牆，跌到一地都係。呢個古城，已經有一千七百幾年歷史，一路有人用，一路有人住，有尐新加嘅建築，又黐住尐舊城牆。我攞住地圖逐條街慢慢行，認下邊度係皇宮，邊度係教堂；金銀銅鐵四道城門都一一走過。其實。古城內地鋪多數係食肆，同埋專攻遊客嘅鋪頭仔。慢慢行，唔係話入鋪頭血拚嘅話，兩粒鐘，乜都夠晒。
除咗遊覽，今次喺 Split 仲有一個任務，就係要探路：睇下去薩拉熱窩嘅巴士站位置。其實 Split 個城好細，巴士站就係碼頭附近，好易揾。我去到巴士站，仲確認埋我喺網上買嘅巴士飛，任務完成。
今日已經喺街食咗早午兩餐，晚餐就古怪一尐喇。我喺附近快餐店，買個免治牛肉漢堡麭，再去街角小超市買支玉泉汽水加個橙，帶返劏房開餐。不過，就算咁樣買餐，計起嚟，原來都唔平得好多，下次都係去餐廳食，乾手淨腳咯。
臨瞓前，打個電話畀 Elana，提佢聽日一早嚟接我。
聽日，上船喇。
No comments:
Post a Comment