Turkey and Balkand Trip (5)
2015.05.20 Sulcuk一日遊蹤
以弗所古城 Ephesus
根據行程，今日三點前，都係自由活動時間。因為多數景點都喺步行範圍，大家自己做吓功課，用自己嘅節奏活動喇。
噚日我已經探好路，今朝，食過早餐，一條冷又出發嘞。由旅館行十幾分鐘，就到第一個景點 The Basilica of St John。我真係好早，到咗考古公園，再要等幾分鐘至到9點鐘開門時間。呢個公園認真抵睇，10個里拉睇埋山頂寨城。
相傳耶穌死後，使徒約翰帶埋聖母瑪利亞，嚟到以弗所 Ephesus 呢度。約翰就喺呢度繼續傳福音，最後，亦喺呢度昇天。而至於聖母幾時，又為乜要返返耶路撒冷，直至長眠？呢一點，我就唔知嘞。
約翰昇天後，佢個墳墓就喺 Ayasuluk 山呢度，後來就喺墳墓蓋上教堂。又好似好多教堂一樣，冧咗原來嗰個，又係原址起個更大更宏偉嘅。
我真係好早，行咗半個鐘，成個教堂遺址就只有我一個人，唔使要撥開其他人至影到相，坐低又好，瞓低又好，任影唔嬲。教堂真係好大，一幅向南高牆仍然矗立喺頽垣之上，牆頂嘅四條柱就顯示教堂嘅頂有幾高。教堂係東西走向，收費入口喺南面。我由南邊入口進入教堂遺址，高柱厚牆，有尐瞓紙，有尐仍然屹立。穿過拱門，走入冇頂嘅大堂，零碎嘅馬賽克，一小幅小幅仍然黐喺地台上。祭壇就喺大堂嘅西端位置，前面有個方型白石砌成嘅矮台，四隻角都有兩米高嘅白石柱，呢個就係約翰之墓。
我諗，約翰係十二門徒之一，墓地就喺呢度，如果係基督教國家，一定會重建教堂，絶唔會只係將佢變成一個考古公園。
再向北行上坡，就係寨城 Ayasuluk Castle， 寨城同山坡下嘅聖約翰教堂，都係拜占廷時代嘅建築。寨城起喺 Ayasuluk 山嘅最高點，厚厚嘅城牆仍然喺度，城內嘅建築物已經變成頹垣敗瓦。我上到山頂，呢度係最佳地點，360度俯瞰成個 Sulcuk。南邊就係市中心所在，周圍就係一幅幅嘅農地。我已經喺呢個考古公園兩個鐘，仍然係冇乜人。早嚟真係好，行得認真舒服。
兩個鐘，都係時候離開，行出門囗時，有人兜售古錢幣，我唔信會係真囉。
個袋剩返四個里拉，即刻去銀行換錢。有錢就身痕，求其搵間路邊餐廳，快快食個午餐，又趕下場嘞。
今日三點，全體人會一齊去以弗所古城。原來而家個名 Sulcuk ，古時嘅名就係以弗所 Ephesus 。去睇古城之前，最好做吓功課。點做？住嘅旅館不遠處就係以弗所古城博物館，裏面有電影介紹古城嘅建築，亦展出好多出土嘅實物，大如巨型雕塑，小如花生米咁細粒嘅金粒仔，都一一展示眼前。
一個城市嘅興衰，當然在乎佢嘅價值，從前嘅以弗所係一個河口沿海城市，河口寬闊水深，船隻都以此為跳板，嚟呢度買鋪給，以便繼續遠航，咁就變成一個市集，有買丶有賣丶有服務，根本就係一個國際貿易中心。就算有天災，例如地震。就算有人禍，例如戰爭。如果城市有價值嘅話，災後，人始終會返嚟繼續搵食。你睇戰後香港，復甦得幾快！以弗所古城由拜占廷高峯時期有25萬人口，到十八世紀剩返20戶人。十九世紀初，古城變成廢墟。衰亡嘅主要原因就係河流改道，海岸線推前。船都入唔到嚟，邊有生意做？
做好功課，返旅館，略作小休。準時出發，緬懷古城光輝歲月。
只十分鐘車程，就到古城。睇過古城模型，即刻開始走去古老大街。第一樣見到嘅，就係公眾浴室。古城係商貿中心，大量由外地嚟嘅流動人口，佢哋帶錢嚟使，但係最驚帶埋疾病嚟。唔理三七廿一，先冲個靚涼。而家，浴室當然係廢墟一個，但係隔格丶冷熱水槽等設施都清楚可辨。
大街兩旁有市議會、辦公室⋯⋯，呢區係古城嘅行政中心。
向前行，路邊有個女性雕像，原來佢係醫生，向左轉入橫街，就係醫院診所，門口有石碑，刻住一條捲住木杖嘅蛇。呢個標誌，用到今日。真犀利！
經過窄門離開商業、行政區，就係市集。點解係窄門，原來要限制商販帶埋佢哋嘅貨物進入行政區。想當年⋯⋯長長嘅市集大街，兩邊有上蓋嘅商鋪，中間露天擺賣。商販嘅叫賣聲，買賣雙方講價時嘅爭㘭，舊雨新知，用不同語言、口音，暢談旅途見聞、交換心得 ⋯⋯，好一個熱鬧街市。
市集前轉入橫街，好大個入口，入咗去再轉個彎，牆邊，一條好深嘅坑，坑上砌咗一排石板，明明白白就似一排石櫈，不過，點解每張石櫈前沿都有一個大窿。唔使估嘞，係坐厠！無法想象！
路邊山坡有 Terrace 住宅，係有錢人嘅家居。由山坡住宅上望落大街及愛琴海岸，一覧無遺，絶對超級靚景。住宅裏面陳設精美，牆畫丶馬賽克地板，自來水管、去水槽等現代化家居有嘅嘢佢哋都有，而家正在復修緊。
再向前行，就係圖書館，而家只剩低屋嘅前幅外牆，第二層露台前嘅四個雕像，完好保留，好有氣勢。好好笑嘅，就係一街之隔，對面就係妓院。個故事話：圖書館有條地道通去妓院，好多人話畀老婆聽去圖書館睇書，其實就去咗對面街⋯⋯！咁，有冇地道呢？事實係點呢？留尐空間畀大家估下喇。
圖書館前廣場、大街，係人群集中嘅地方，呢度係城嘅西邊，由海路嚟嘅人，上岸冇耐就嚟到大街呢度。市政府喺路邊，豎咗石碑，刻有入城規則，大家務必遵守，先此聲明，以免後論。
羅馬古城，一定不可少嘅，就梗係萬人大劇院。企喺劇院最高點向西望就係愛琴海岸，以前河道寬闊水深，船隻直接駛入內港。今日，由劇院前通向港口嘅大直路仍依然喺度，但係海岸線已經喺西面9公里咁遠！咁就完全明白，古城之死嘅原因嘞。
有人喺劇院唱歌，有人打側手翻 ⋯⋯。劇院，果然充滿娛樂性。再睇埋花園、建身院，墓園等等，古城又告一段落。
以弗所古城真係好大好多嘢睇，如果要睇得仔細，花一日，都唔算過份。呢個古城，絶對要大力推薦。
今日行得好多路，個個都謝晒，晚餐後即刻騰返旅館，大覺索咯。
嚤囉
No comments:
Post a Comment