Turkey and Balkans Trip (22) 2015.06.06 Trogir , Split, Dubrovnik 古城

Turkey and Balkans Trip (22)

2015.06.06 Trogir , Split, Dubrovnik 古城

古城晚照

最後一晚浪漫號嘅覺，瞓得好甜，執好行裝，未等早餐鐘聲，即刻落去餐堂，就算早餐未預備好，都希望飲返杯咖啡。落到餐堂，呵呵，一切已經凖備就緒，點止咖啡咁簡單，牛油麪麭三文治，煎蛋火腿樣樣齊！原來知我要早走，豆先生提早預備早餐，等我有個飽滿嘅句號。咁関照，真係唔話得。

食食吓，其他人亦一一落嚟。飽餐之後，逐一同團友再次擁抱，拉住行李，別過浪漫號，再次踏上歐陸大地。

Elana 果然守信用，凖時九點就嚟到巴士站接我，因為要趕10點鐘由 Split 開出嘅巴士，本來非常緊張，而家見到 Elana ，成個心都定晒。星期六，條馬路暢通無阻，車上，一路同 Elana 閒話家常，半粒鐘左右，我又第三次返返嚟split 咯。到咗巴士站，別過 Elana，新嘅行程又展開喇。

下一個目的地，就係克羅地亞南邊城市 Dubrovnik 。

因為騰雞嘅関係，呢一程由Split 去 Dubrovnik 嘅巴士，車飛一早喺網上買咗，十分方便。而家去到車站賣飛窗口，再三確定候車月台，就安心喺車站等車。巴士準時埋站，先喺車邊排隊寄行李，司機收我一個 Euro 。以為一早劃好座位，點知原來係先到先得任坐，好彩架車唔多人，大把位任你揀。巴士都幾新，乾乾淨淨，非常舒服。

巴士緩緩駛出車站，我又第三次同 Split 講拜拜嘞。呢度離 Dubrovnik 接近三百公里，大約等於由雪梨去坎培拉嘅路程，就算私家車行高速公路，三、四粒鐘。一定走唔甩。離開市區，巴士一路沿 Dalmatian 海岸公路南行。沿途睇下風景、寫下遊記、休息下⋯⋯，都唔會話好悶。

Dubrovnik 所在嘅郡縣，原來零零舍舍離開克羅地亞主要國土，原因可能喺劃國界時，要畀鄰國波斯尼但亞有個出海口，所以呢程車有一段路綫，係入咗波斯尼亞境內。到咗出入國境，有邊境人員上巴士撿查證件，方便快捷，一尐麻煩都冇。

巴士司機揸車好小心，加上呢條路都好多彎，其實都唔可以揸得快，卒之，呢三百公里，足足玩咗五個鐘，先至嚟到 Dubrovnik 。再轉一程的士，到達古城，我租嘅旅店喺古城裏面，汽車入唔到去，我拖住行李，轆過大大塊嘅石板路，穿過城門行入直畢甩嘅主街，唔太困難就搵到旅店。旅店就係中世紀城牆裏面，一間幾百年嘅建築物，對住街古老木門上，有兩個細小招牌仔，原來同一地址，有兩間旅館，我租呢間 Guest House Marija 就喺一、二樓，而三、四樓就係另一間旅館，大家都共用樓梯同門口通道。店主 Marija 係土生土長城內人，而家女承父業，全職打埋小旅館。我今日成日風塵僕僕，安頓過後，即刻幫自己洗塵，孭起 day pack，攞住地圖，四圍逛逛。

先向東行出城牆，嗰度係 Old Port，係古城嘅水路進出口。沿住碼頭仔行，路邊食肆林立，遊人如鯽，好鬼熟鬧。靠海岸嗰邊，一張張太陽遮下圓形高枱仔，就係一個個檔口，一件件高佻克羅地亞靚仔靚女，各自據枱微笑，見有客到，即刻鼓其三寸不爛之舌，推銷佢嘅產品。賣乜？我咁八卦，點會執輸，當然借尐意埋去同靚女爹兩句。

原來 Dubronvik 就地處 Dalmatian 海岸最南端，由呢度坐船沿海岸北上，就係一個個靚到好似人間仙境嘅外島。船公司就有好多旅遊產品，你可以揀：幾粒鐘短遊、一日遊包午餐又得、黃昏晚餐睇日落，如果大把時間，三四日島過島深度遊亦得，總之豐儉由人，任君選擇。克羅地亞佳麗對住我噏咗一大輪，我都淨係笑，冇落疊。點解？因為前嗰八日，我咪就係玩緊 Dalmatian coast island hopping 囉。

回頭行返過西面，穿出城門就係 Pile gate。講起Pile 呢個字，我向人問路，讀成「派噢」咁嘅音，點知人哋唔知我噏乜，原來係「(P）啤--呢」。Pile gate 係主要入口，巴士站、的士站都喺晒呢度，噴泉、廣場都喺呢度。路邊又係一檔檔太陽遮下檔口仔，呢度賣嘅又係旅遊產品，今次我要認真選購喇。

其實，嚟呢度之前，已經做咗功課。想去邊玩，都已經有個大概。聽過介紹後，好快已經有咗決定。我仲有兩日逗留喺呢度，聽日，就參加一個一日團，去黑山共和國；後日，就喺 Dubrovnik 遊古城牆。後日晚，就起程搭巴士去 波斯尼亞。搞掂晒！

行程既定，就放心繼續行。古城西面隔住海灣仔有個山咀，山崗上有座雕堡 Fort Lovijenac，佢同古城遙遙相對，其實就係喺外邊，保護古城嘅前哨雕堡。沿山邊梯級行上雕堡門口，回頭向東望返古城，哈，居高臨下，唔同角度睇古城，又別有另一番美態。此際忽然烏雲蓋頂，仲有幾聲驚雷。又咁得意，四周烏雲閉天，一束陽光射向古城，白色城牆，紅色屋頂，紅紅白白，層次分明。我孤陋寡聞，Dubrovnik 古城，so far，係我見過最靚嘅古城。

過雲雨啫，一路淋住細雨，一路落山，又係天黑時份，就喺 Pile 城門廣場嘅餐㕔，搵張對海嘅枱。海鮮意大利飯、蘑菇會粗通粉，咁靚嘅晚餐，啤酒點少得？又係一個飽滿嘅晚餐，月色下踱步返古城，雖然係入夜，古城街邊店鋪，仍然燈光通明，非常熱鬧。路過雪糕店，抵唔住，又坐入去，食個雙色雪糕球至返歸。

百年古屋，發個中世紀嘅夢。