Turkey and Balkans Trip (10)
Kilitbahir Castle
第一日嚟到呢間酒店，我覺得好奇怪，酒店外牆個 logo 好似袋鼠國軍隊嘅 logo。再走上去餐廳，掛滿袋鼠國國旗，亦有 kiwi 國旗，真係好似返到屋企。怪唔知，佢哋專做澳紐戰場遊覽團，呢間公司，喺澳洲都有辦事處。裝飾成咁，客人賓至如歸，待客之道也。
噚日，已經同櫃檯小姐訂咗一架單車。他他條條食個早餐，九點鐘，單車已經喺門口等我，校好晒座位就出發。每次喺右邊路嘅國家踩單車，我都要唸口黃：「right is right 」，嚟幫自己記住，唔好行錯隔籬線。
其實，我今日只係踩十幾公里車，就沿住 Bospherous 海峽歐洲沿岸，一路南行，十二點左右就要返返酒店 check out。
呢段路都幾好踩，不過有一段路就比較窄，好彩唔多車，都踩得好舒服。沿途山坡都有民居，海邊不時有迷你小型避風塘，不少小型漁船停泊，呢度，似乎係一個漁港。
踩咗5公里，呢度係海峽最窄嘅地方，有渡輪由呢度過亞洲 Canakkele 。再前些少，有個廢棄咗嘅堡壘。原來呢個堡壘大有來頭，十五世紀，征服者穆罕默德二世，一手摧毀拜占廷帝國。之後就建成呢度同對岸嘅堡壘，緊握海峽咽喉。堡壘就叫做 Kilitbahir Castle，意謂海峽之鎖，咁就明晒喇。
蘇丹王就心田先祖種，土耳其就福地後人耕。大戰時，守護海峽，都係靠呢一帶嘅堡壘炮台，再加水雷陣，英法海軍，完全入唔到嚟。
一車一車旅遊車，載住土耳其旅客嚟朝聖。冇錯，係朝聖。因為呢度有個全土耳其家傳戶䁱嘅英雄故事，「Seyit 下士及其英雄事蹟」，Corporal Seyit and his heroic deed。
1915年三月，丘吉爾派聯軍戰艦攻入海峽，當時 Seyit 就係炮兵，佢負責將炮彈放入大炮內。佢駐守嘅炮台畀戰艦打過嚟嘅炮火擊中，好彩大炮仲用得，但係起重設備就打爛晒。冇起重機，佢點將275公斤嘅炮彈，放入大炮？好一個 Seyit ，佢喺瓦礫中爬起身，見到海上敵艦仲發緊炮。佢雙手擺喺身後，箍住炮彈擺喺背脊腰上，一步一步行上炮架 ⋯⋯ ，居然將咁重嘅炮彈放入大炮，炮手即刻射出呢個炮彈，呢一擊，打中咗 HMS Ocean，呢隻前無畏級戰艦，佢一退，仲衰，戰艦揩到水雷，成隻就葬身海底喇。
因此，佢由兵仔升級為下士，為鼓勵士氣，當然要將事蹟廣為宣傳。有人叫佢再孭一次炮彈，今次，佢點孭都孭唔起。不過佢話：「如果再次見到戰艦，我一定孭得起！」
我踩住單車走上炮台陣，兩旁有路邊攤檔，除咗一般手工藝，Tee 恤、土耳其帽外，亦有戰爭紀念品賣，其中一定有 Seyit 孭炮彈嘅工藝品賣。而家，所有大炮都移離炮台，只留低 Seyit 當年用過嗰支大炮，旁邊仲擺咗佢嘅銅雕像，重現當時情景。
個個土耳其人都要同 Seyit 影返張相，佢真係好唔得閒。你話想，等佢冇人埋身至影相？唔使旨意嘞。古有「三水佬睇走馬燈」，呢度有「土耳其人睇 Seyit 」，都係：陸逐有嚟。
又係咁嘞，我爬高爬低，四圍睇睇。走出炮口海邊，成個海峽真係喺炮火之下，無得走雞。夠皮嘞，又跳上單車，踩出岸邊，岸邊又有一個巨型 Seyit 孭炮彈雕像，佢真係無處不在。
呢個傳奇人物，並無下海做生意撈一筆，戰後，重操故業，係一個樹林工人，直至1934年，真主寵召為止。
朝早幾個鐘，容乜易過，交咗單車，又對住 Dardanelles 海峽食個午餐，之之坐坐又一個下午。六點過後，同埋其他一日團嘅旅客，熬五粒鐘，午夜前返到伊斯坦堡。乜都唔想食，就即刻想瞓覺。
No comments:
Post a Comment