文章日期：02/25/2011 01:16 am
喺 Malecon海堤大道街邊玩琅嘅小女孩
8 feb Day5 – Havana
七點半個鬧鐘響，即刻起身，走出我房門外嘅廷園仔影吓相。Horacio民宿主人見我已起身，即刻預備旱餐比我。唔係好豐富，亦算精致。有咖啡、果汁，暖奶、烚蛋、生果、餅干，樣樣有啲啦。食過後，佢同我講解附近形勢、點搭車等。問及關於電話及互聯網，佢亦不甚了了，唯有自己試。正要出街，Horacio話有電郵比我，佢成部laptop攞比我。係啊珊嘅，咁我即覆報平安啦。我圢打吓，此時啊珊居然可以打到電話嚟呢度，即刻仆去聽。喂！係我！我諗佢聽到我把聲，就會安樂晒啦！
我諗現今世界上，你再唔會揾到一個地方，係你去咗一日街（首都市中心），全曰未聽過手機鈴聲，未見個一個人講手機電話！呢度就係嘞。用地綫打出國外電話，非常貴。打去歐洲或澳洲，一分鐘要4個幾cuc。咁一個定薪收入嘅人每月人工多少？重要係人民幣（1:24）打個電話簡直天文數字！我下午較後時間，行到一酒店Hotel nacional de Cuba，大堂有電話服務，我先講要打嘅號嗎，佢接駁好後，我就要係大堂嘅一個電話聽，使我記番起舊時喺大陸打電話嘅情形。我同啊珊講咗冇耐咋，承惠21cuc。不過明天我會再試接駁電話及internet。
講番早上，第一個行程係….新正頭，要講聲百無禁忌、大吉大利先。係Cementario de Cristobal colon. 由我住嘅民宿行5分鐘就到，由側門入，有兩條友坐喺度，一見我入去就叫我埋佢個度，梗係攞錢，我諗死佢係。對佢我噏一大餐，我要係喺佢說話裡面揾出我識嘅單字，我終於聽到cinco呢個數目字，比咗5cuc，佢袋落自己褲袋，又冇單比。咁都得，唉！
話雖然係共產國家，佢有好攸久嘅天主教文化背景。墳墓有好多好靚嘅雕像，都係耶穌、聖母、天使拯救等為主題。旅遊書介紹其中兩個，一個係1890年，夏灣拿大火，好多消防隊員殉職，所以建一個碑嚟紀念呢件事。其二係一個悲哀嘅愛故事。恩愛夫婦，太 太小產，大小失救，BB放在媽腳邊，同葬於此。夫每日拜祭，離開時，眼仍望墓，所以用褪後行。一日起棺，發覺BB係抱住，唔係放喺腳邊。眾人認為有法力，所以到墓前祈福，希望保祐胎兒平安…。我都見到好多人係咁做。再行一陣就離開啦。
沿23街行，係夏灣拿嘅主街，一路行，發覺古巴真係好窮，好少啇店，亦冇乜嘢賣。車舊、路爛、所有建築物都破舊，又係美國佬做嘅好事。再轉向海行，終於去到海堤大道，肚餓，走上商場上嘅Jess Cafe，門口有餐牌，平到唔信，湯係2cuc左右pasta 2-5cuc左右。走入去問el menu en ingles por favo。冇英文，大劑！唔識睇，明天要帶西文phrase book。雞同鴨講一輪，剩係攪掂個湯，佢行開叫部長，唏！部長講英文。有湯，烟肉意大利麵、可樂一罐。一路食一路欣賞165度加勒比海風景，呢度晚上有live band，有機會可以一試。Camarero, la cuenta por favo。 承惠5cuc。呢度唔係街邊檔，待應有制服，有規有矩嘅服務，太平啦！
沿海堤大道向東行，一路到見巨型雕塑，都係古巴民族英雄Jose Marti嘅像，此君就好似我民族嘅孫中山咁，係革命先行者。海堤大道以大浪著名，大風時，行人遇上大浪，會由頭濕到落腳，今日算係嘞，我唔驚，因我行馬路另一面。冇耐，忽然見有三女孩喺海堤邊，專登去揾浪，大浪打落海堤，擊起成十米浪花，再濺落佢哋身上，應該係好好玩，當然係吸引咗好多鏡頭。有相為証。
行到冇耐，有腳踏三輪車來兜我坐，話10cuc坐一個鐘遊中心城區 ，我知佢一定揾我老襯，車到邊度又話要加鐘番轉頭。一來行得攰攰哋，二來三輪車可以慢慢遊，睇嘢睇得真啲。呢條友一路踩，口唔收，四維撩女仔，對眼都唔收。不過佢專行小路、內街，一般遊人好少會去，咁就見到一般人生活嘅一麟半爪，開眼界嘅。我成日指着帶表嗰度提佢，佢又講，我又聽唔明，又繼續踩。終於停低，今次佢攞個表出嚟，重有紙筆，將上車時間同而家時間一減，就過鐘啦，比我估中你啦！我攞咗佢筆同紙，我有地圖。我話，你車我去地圖上呢度，唔理時間，我比20cuc你。當然又指手劃腳，又劃公仔。頭先泵波鐘就慢吞吞，而家就li li la la。所以國家聲譽就比呢啲人破壞。我比錢時，用英文同佢講呢番話。我問佢明唔明，佢話少英文，蝦！佢兜我生意時，好似又乜都醒，而家又扮唔明。即係借誤會掠水。以後要多加小心。
實在呢啲嘢喺好多遊記已經提及，但亦提到夏灣拿係幾安全嘅，但梗有take chance掠水嘅啦！
再行冇遠，見一酒店，即入去打電話，前面提過，不多講。
翻起風，驚會落雨，即改乘coco taxi，即機動三輪車，佢係由政府辦嘅，所以收費就劃一嘅，5cuc就成條23街由頭行到尾。
放底重嘢，天仍未落雨。再出過街，食晚餐啦！Horrcio話係6 y 17，即第6街同（y=and）17街處有好嘢食。都要行15分鐘至到。咦，原來John Lennon公園就喺呢度。呢個四方型嘅小公園，四面由民居圍住。個像係邊呢？見一公園櫈，坐咗一個雕像，似似地死鬼約翰，但係對眼鏡呢？啊伯坐喺雕像邊，知道我嚟影相，從容由佢襟袋扲出金絲眼鏡，幫啊John戴好， 離座，指示我坐喺John身邊，再問我攞相機，即刻幫我影咗三張。當我check相之際，佢已經坐回原位，啊John副金絲眼鏡又落在啊伯口袋中。佢又冇問我要錢（旅遊書話唔好亂比錢人，喺會腐化人喎）。如果我識問，我會問，點解用一個人力，去保護一對眼鏡？佢喺義工或受薪…？唔識問嘢，少咗樂趣。
晚餐地點就喺公園前面，係Havana Club，有意大利同古巴餐揀。我揀古巴。上三樓，坐低，睇餐牌，又死得啦！先攪掂湯。主菜點講都唔明，唯有點指兵兵喇。寫得落餐牌都係食物，食吓多啲唔同嘢又ok嘅！飲乜啊？Mojito，做晒功課，佢係古巴no.1著名嘅雞尾洒。上菜喇，原來係豬肉片bbq咗再用洋葱等等調味翻兜，ok啦！飲品嚟，個杯6分滿，佢攞埋樽酒喺我面前倒，我不知就裡，由佢倒到滿。飲飲吓，至知酒味太濃，而家先至要係我面前倒酒嘅意思。我而家每餐後都識用西文讚嘢好食，但如果唔好食就唔知點講啦！
15分鐘，行番歸喇！
No comments:
Post a Comment