國會大厦外，呢架老爺車真有型
21 feb Day 16 Havana
七點鐘已起身，略作整頓，casa主人已預備好簡單早餐。去街喇。
我已有經驗搭固定路綫古董的士，企喺路邊揮手截車。都要成15分鐘至上到車，車到尾站，就係國會大厦，入唔到去睇，只係喺外邊影相。國會大厦後面就係有名嘅雪茄厰，我已喺Santa Clara睇過，冇興趣再睇，不過入佢嘅小賣部睇吓買唔買到啲乜嘢。見到有書形狀木盒雪茄，要130幾cuc，我覺得有趣，而且人人都話喺古巴買實平，就買喇。
因為呢筆額外支出，所以要再換多100歐元。到銀行換錢，排隊前面係個德國仔，似30零歲啩，佢東德出世，喺日本日產車厰做設計師。佢話見到蘇俄五、六十年代嘅車，勾起佢童年共產東德嘅回憶。又傾到社會制度、古巴印象等，都幾多嘢傾。唔係我哋講嘢快，而係排咗好耐隊！
又行過古巴唐人街牌坊，今次見呢個係大嘅。唔好入去揾唐人，根本冇乜如英美奧紐啲唐人街嘅款。原來大量華人到古巴係講緊賣豬仔年代。華人賣嚟呢度起鐵路，或到甘蔗田工作。被人買豬仔，唔會帶埋女朋友。佢哋會同此地棕色、黑色或白色女仔結婚，經過十代八代後，可能重有個陳李張黃何嘅姓，但個樣就唔太唐人嘞。
沿路行去革命博物館。1959年元旦日，卡斯特羅喺Santiago de Cuba宣佈古巴革命成功。歷史只係短短62年，所以根本係冇乜嘢睇，重要6cuc入場，帶相機再加2cuc。唔入又唔好，入咗又呻笨！
搭啲士用海底隧道穿過Bahia de la Habana夏灣拿海灣，呢度有兩處沿海堡壘，都大同小異，但每處都收6cuc，我當然繼續支持古巴，買飛入去也。公道講，都係值得睇嘅，由呢度隔住海灣眺望夏灣拿，真係靚。不過6＋6就過份啲。
冇飯食，見呢度小賣部冷氣開放得咁勁，入去用個半cuc買罐可樂，坐低，食晒飛機上派嘅nuts，又一餐。
過晒堡壘，繼續沿海灣行，遊人已少，再入，離遠見到一列列好新嘅屋。呢度車路喺有路障，人行入去又冇問題喎。我担保呢度會係古巴高級官員或軍官宿舍之類。再前行冇遠就見耶穌像。喺祂腳下影下相沾吓神恩。有趣嘅係，耶穌像前就係另一個老哲紀念館，呢度係革命後佢做軍隊指揮官時嘅官祗。又要6cuc，出嚟又呻笨！
只係下午三點幾，本來明日至去革命廣場，今日做埋佢。飛的去約20分鐘就到。上次嚟過，但遲咗，個Jose Marti高塔已收工。今次ok喇。又要6cuc，影相再加1cuc。搭lift上192m高塔，上有四方八面窗，整個夏灣拿及海岸都盡收眼底啦。
今日行程到此為止，出街食晚餐。我記起我第一次去嘅Jess Clcb，跳上coco taxi，10分鐘去到，重係早，就坐喺Malecon嘅海堤上，heir佢半粒鐘，當地人已開始嚟呢度各式其色喇！
上去食飯咯，今次睇餐牌都可以啦。雞湯、古巴式豬柳加飯，啤酒。就係啦。食食吓，由呢度望出去，居然見到成個日落情景，睇住個太陽消失喺水平綫上。值回票價喇！La cuenta, por favo。幾錢，連貼士9cuc，認真抵食。
飛的回家，隔離女士（唔記得名）又喺度，咁坐低爹番兩嘴。我不相信自己的眼晴。電視居然播緊CNN。一問，原來用衛星天綫收嘅，係唔合法嘅，不過不少人都咁做，大家都知嘅，不過冇人理。可能政策係一路一路鬆吓鬆吓咁喇！
明日8點機，早上重可去多一處，中午就要返到casa執嘢，casa 主人會幫我book的士去機場，15日古巴之旅亦圓滿結速喇！
No comments:
Post a Comment