文章日期：02/25/2011 01:50 am
騎馬遊覧煙草田
10 feb Day 7 – Havana – Vinales
Horacio非常好，整定三文治等我上車食。今日九點車，八點鐘預備咗車去車站。到咗車站，第一件事就去寄行李，排隊我前面有個金髮女仔。我問，英文？佢識，我肯定咗我冇排錯隊。寄咗行李，步入候車大堂，坐低，開始同佢傾偈。佢又係去Vinales，佢叫Meta，由荷蘭嚟，31歲，喺佢26歲嗰年，同男朋友分手，用3個月畤問旅遊澳紐，從此愛上一個人旅遊。去過歐美，中南美，東南亞等國家。喺巴士四個鐘可以套到好多料啦。我哋目的地相同，所以約埋一齊玩。
古巴長途巴士公司只有兩間，一比本地人，用mn, 一比外來人，用cuc，叫viazul，佢車隊用嘅車，全部係來自中國宇通。巴士駛出公路，進入高速公路。佢比我嘅印象係條路好少車行。車由夏灣拿向西行，大約路程一半，佢駛入一個resort稍作休息。呢度有咖啡櫃位，亦有樂隊現場演奏十分有氣氛。Queiro un café con lache por favo. 咁我就有嘢飲啦！
下午一點左右到達Vinales，係一個小鎮，我哋稍作整頓，casa主人就幫手按排活動。今日下午預備用4小畤騎馬，包埋領隊只有三匹馬。我哋經過多數係田地，又以種烟草為主。行咗兩個鐘到達湖邊，落馬行吓湖邊，風景極佳。
上馬，行呀行，居然去到 一個山洞，呢度有小規模嘅石灰岩洞。沿岩洞小溪進入，我哋喺睇過大型溶洞嘅人，呢個當然唔入流，不過睇吓冇壞。上馬再行，在一小山坡前下馬，爬上到頂，原來係山脊，可360度睇晒風景，我喺呢度坐低，打個電話番屋企，同啊珊分亨吓眼前情景。再前行，咦，日落咯，佢話不如飲杯mojito。於是去到一小屋，坐入棚亭，叫人出嚟即席做雞尾酒，再表演捲雪茄，當然想你買，我冇，荷蘭妹買咗一扎10支。此時，四周已黑，上馬，我第一次喺星光月下騎馬於田野間，算係十 分十分難忘嘅經驗。七點幾先番馬棚，應該有成5個鐘喺馬背上，梗係我嘅創舉啦！即刻搭的士番歸。casa主人已預備好晚餐，十分豐富，重開喺門口個patio度食，超級有情調。
飯後，邀請主人之弟一齊去睇古巴音樂show，離casa只一街之隔。呢啲show每晚都有，音樂歌聲嘈到拆天，但個個開心都飛起。我開始喜歡拉美音樂！
明天去海灘。 番歸，一覺瞓到天光。
No comments:
Post a Comment