好靚海灘，邁亞美就喺對面
9 feb Day 16 Santa Clara – Varadero
七點起身，早餐已開好，3隻煎荷包蛋。即刻夾兩件牛油蛋包，再倒起一樽果汁，就係今日嘅午餐啦！找數，兩早餐一晚餐加一晚房租，連貼士50cuc。從露台望落街，見到昨日喺車站接我嘅車伕，又駕馬車嚟，佢唔係想用馬車載我行200公里呀嘛。見佢勞師動眾。我塞10蚊人仔過佢，婉拒佢嘅好意。
冇耐，的士已喺門口等。係一架韓國現代車仔，唔係話乜嘢靚車，起碼係一架正常嘅小房車。司機著晒制服、打晒呔，十分專業。走上幹綫，以超過100km速度行駛，我而家再次感覺速度，即刻扣好安全帶。之前，我話呢度啲司機揸車小心，睇嚟主要原因係老爺車唔係話停就停，話去就去，要比較大嘅緩沖時間，所以比人有〝小心〞嘅錯覺。
古巴真係好少車，有一段路，大大話話行咗成半粒鐘，前後左右，剩係得我坐呢架車！
約兩個半鐘，到達Varadero，先載我去巴士站買明天返回夏灣拿車飛。順利買到明天3點半車飛，10cuc，車行3個鐘。攪掂車飛直趨酒店，只需5分鐘。呢段200公里的士，花費咗110cuc，你可知係呢度普通人1年工資！
直趨大堂，而家係11點幾，要3點至可check in，但可放低行李。換過泳裝，即刻去沙灘。酒店後面就係沙灘。呢度係向北，海係墨西哥灣、佛羅里達海峽。一望無際嘅海，靚到唔識講。開頭有雲同小雨，好彩不久就散去，跟住就晒到顛啦！指定動作，揾個棕櫚傘連沙灘長椅，游水、攤透、睇書…等。三點去check in。再遊吓，去酒店泳池遊吓水，再落沙灘。Varadero係一個長20km嘅半島，我用兩粒鐘行咗向北嘅沙灘一個來回，由如日方中攪到紅日西沉。係時候返房整頓一吓。我估唔到呢61cuc房租重包埋早餐同晚餐！
冲番個靚涼，好耐冇沖到咁正嘅熱水喇！換番套較乾淨嘅衫褲，落去餐廳。係自助晚餐，唔係多到死個隻，但已十分足夠。沙律、生果、deli、熱餸、飯、意粉、麭、湯、雪糕、甜品…重有一個即煎嘅攤位。連飲品都包埋，算唔錯喇！
一個人都唔食得好多嘢，上房瞓啦，明天再晒過。
重返夏灣拿咯喂！
No comments:
Post a Comment