束西半球手倒立
我比我個行程大羅睇過，正如佢話，今日係比較relax。一早起身，落旅館餐廳（重未開），覆電郵等。食過多士咖啡後，起程去Greenwich天文台。頁落地鐵，再轉輕鐵，45分左右就到。Greenwich係個小鎮，係喺倫敦東面，泰晤士河邊。佢出名當然因為佢係子午線0度0分0秒，分隔東西兩半球嘅人為劃出來嘅線。天文台喺Greenwich park嘅小山崗上。一出站行冇耐就可睇見。行20分鐘一定攪掂。十分寕靜小鎮風情。踫巧係星期天，家庭日，公園內老老少少攸閒慢步嘅，跑步keep fit嘅，anyway, very nice。行上天文台，見到一團祖國同胞，如要人幫手影相，就耍講果雨喇。
天文台又係museum，講啲例牌嘢，例如點解要有經度…等。我怱怱打個冷，就出去揾條子午線。就喺個後園，地上有條長銅片，銅片一面寫住東面各名城係東經幾多幾多度﹔西面亦係一樣。標準相梗係双脚跨開，各踏東西半球。又或者同另一人拖住手，一人企一便。標準相我都影，不過，梗唔止咁。我請人幫我攝錄，側手翻由東打去西，再由西打向東。第二，手倒立於東西半球。Making something different。目的已達，不再久留。行番去鎮上，有個Sunday market仔，都去行吓，幾有特色，民族小食（奇怪，居然冇唐餐）、小工藝等。又係打個冷。
而家選擇點樣返市區，當然唔走原路，選擇坐船，船費5磅，可扣Oyster card。船以觀賞泰晤士河為主，所以開得好慢，亦停好多站，船上亦有小食、咖啡等飲品，要比錢買嘅！實在好似雪梨由環形碼頭開往Parramatta嘅ferry一樣。
我喺city south上岸，再行上千禧橋，係一條好窄全金屬造嘅橋（鋁？），今日好大風，我可以感覺到條橋郁郁貢！落橋向前行，不久，見一大教堂圓頂，查吓地圖，原來就係大名頂頂嘅聖保羅大教堂。今日禮拜，裡面就係做禮拜。人唔多。逗留冇耐，又係午飯時間。落地鐵，直趨唐人街。一來，食過番尋味，二來，因為見大羅時，唔記得有小紀念品，所以擺喺餐館，到大羅嚟開唐人街，就攞番也。星期日撞上新春，唐人街會逼成點？旺角咁！食過唐餐再戰江湖。
搭地鐵去Hyde Park之Speakers’ Corner，感受一吓自由言論嘅空氣。喺玉門關站（個名靚唔靚，我啱啱改嘅，英文原名叫乜，自已去查）一出，已隱約聽到辯論、演說之聲。呢啲係民主社會嘅胸襟，亦顯現政府统治嘅自信。我即刻走入人群，今日講者全部題材都係宗教同政治。啱聽嘅，聽眾會讚許，唔同意嘅，又會駁嘴。抝到火紅火綠都有，但之後又可握手言歡。我算親身感受到喇。
再跳落地鐵，去我今次倫敦之旅最後一站，大英博物館。好容易去，又唔駛錢。不定期有特別主題。今次係古埃及，夏澄大學就係讀古埃及…，no worries機會多的是。而我，一來興趣不大，二來又攰到飛起。又係怱怱打兩個白鴿轉，喺大堂長櫈再坐一會，感受吓高級知識嘅靈氣。咁我倫敦之旅就劃上一個哈哈笑嘅句號喇。
跳落地鐵，搭車番歸。我由落機開始，用25磅買咗張Oyster Card，全程所有交通費都扣落Oster Card，而家番歸，可以埋單計數。我埋窗口I’m no longer using this card. Can I have my balance back，please？找番5磅幾。OK喇！
明天要搭0820法航，我想5點左右去到希斯路機場，即係要4點鬆啲由旅館出發。旅館可幫我叫的士，成日聽人講倫敦的士好貴，我問價。35磅。殺你！咁又攪埋呢件嘢。
剩番嘅時間就係，食飯、整相，打電話返屋企，收發電郵，寫遊記、較鬧鐘、執行李、刷牙冲涼，都好忙架！
明晨四點起身，再向中美洲出發。
No comments:
Post a Comment