古巴遊 Day 17 Varadero – Havana

古巴遊 Day 17 Varadero – Havana

文章日期：02/26/2011 08:07 am

好有水準嘅二人組合 hasta  siempre

20 feb Day 17 Varadero – Havana

今日犀利喇，喺酒店就係食嘢、坐沙灘、望海、聽音樂、睇書以及睇其他好睇嘅嘢。

估唔到呢間酒店包晒你早午晚三餐，其他時間lobby bar任叫任飲，小cafetaria任叫任食。食自助早餐時，已pack咗兩件三文治同3隻蕉做今晚晚餐。吃過豐富早餐，即坐出沙灘，時而睇書、望海，時而閉目養神，思索宇宙底奥秘。又去bar整杯café con leche提吓神。

又到一點喇，去餐廳食個自助午餐，食吓食吓，有隊二人組合，逐枱獻唱古巴名曲，唱完，冇人會唔比打賞咁衰仔者。我認為佢哋水準甚高。到我嘞，佢問我有乜啱聽嘅古巴歌。我記得有一首講老哲嘅歌，我沿途都聽過好幾次，我當然唔知歌名，就話要點一支關於老哲嘅歌。佢哋即刻點晒頭。我即刻預備攝錄uno, dos ，tres開始，一唱，就係呢一首！午餐後，佢哋移師lobby bar，我又跟埋去聽。佢見我係知音，即叫我買CD，我問有冇附西文歌詞，當然冇，不過如果有，我真係會買一張。

想聽歌撳 Link

http://youtu.be/mGVpcw4Qnrs

兩點半，飛的去巴士站，搭三點半開去夏灣拿嘅車。坐唔夠一半人，準時開車。中間又到休息站，見有老哲CD，店員見我攞起睇，随即播比我聽，果然又係呢首，問店員係邊首，原來歌名就係hasta  siempre。我都冇買。

巴士到達尾站夏灣拿新城，時為下午6點半。5cuc飛的去Horacio屋企，原來佢屋企已住咗人，但佢亦幫我揾咗另一住人家，同一條街，只係過一條馬路。casa主人唔識英文，揾佢個仔，識少少，好過冇。係對面街揾咗個70歲嘅啊婆（諗真啲，都係大我十幾年咋，真恐佈。叫女士唔叫啊婆）。呢位女士做女嘅時候喺美國讀過書，古巴革命前回來。佢講英文係可以，但因太耐冇講，有啲用字我要提佢。我哋三個坐喺個廳，飲住古巴咖啡傾咗粒幾鐘。從英國茶講到古巴咖啡，從中國開放改革到古巴社會經濟。又講到呢個casa一家人係從事lead glass手工藝。佢屋企重有一隻芝娃娃狗仔，重跳咗上我身。

晚餐係嗰兩件三文治同埋三隻蕉。

明天，夏彎拿舊城。