龍蝦晚餐
14 feb Day 10 – Trinidad
昨日講到買唔到今日去Santiago de Cuba嘅巴士飛，有人喺站外話可以用8人車開去千里達。今日食過早餐後，企喺casa門口等，九點幾喇，重冇聲氣casa主人主動去巴士站check吓。冇耐番嚟，佢話唔夠人，成唔到團（咁冇交帶，知會聲吖），但casa主人十分好，佢已幫我訂咗明天車票。咁唯有喺度住多一晚，咁今日去邊呢？千里達實在以海著名，我冇去因為驚時間唔夠。而家好嘞，一於去海灘。
實在唔放心，我直踩去巴士站。果然，我個大名就喺旅客花名冊內。咪嘞，比埋錢，一定冇衰。ok。再問跟住兩個站嘅時間，好等我準備好啲。
一切妥當，放心去海灘。我去嘅海灘叫Playa Ancon，離鎮約12km。行出巴士站冇耐，有人叫（國語讀）達西、達西。問價。8cuc。回5。6啦。殺你，跳上車，唔使講，又係古董車。記得喺夏灣拿第一次搭古董車，上車後關門太大力，成個開門手抽跳咗出嚟，要執番塞番入去，司機都頭擰擰。車行冇耐，司機問可以載埋佢女友嗎。冇問題！
車行咗20分鐘就到，海灘前有間酒店，而海灘係開放比任何人。行入海灘，比眼前景物嚇暈，藍天白雲，一望無際嘅加勒比海，優閒泳客在日光下或棕櫚傘下。三、兩人在玩水。第一次見咁靚嘅海，算係開咗眼界。見唔到有當地人，全部遊客，英文人唔多，意大利、西班牙、法文為多。即刻行去揾張沙灘長椅，行行吓，忽然有鬼佬截住我，好似識我咁，重問我乜唔係去咗Santiago咩？。先記起係昨日遇到嘅兩對由雪梨嚟嘅兩對夫婦。咁即刻坐埋隔籬，大家（即係我）有個照應，游水都放心好多。講開又講，我係唔敢留低證証同錢喺casa，成日要孭住四圍行，所以一個人有時係有問題嘅。游水係其一，又例如有哋地方要你放低個袋至入得（如超市、圖書館…），我就唔可以入去。就算旅途中識嘅人，有時你都唔可以太信佢，叫佢看住。
好似啊Lam話，剝晒衫褲，剝晒鞋。set好相機，攝錄機，開機，衝向海灘，前手翻、側手翻出齊，撲入海中，蝶背蛙捷樣樣出齊。潛入水中，清澈晶瑩，重見有魚，總之好玩。行番上去，攤喺椅上，睇吓書，諗吓行程等。跟住有人行嚟收租椅錢，2cuc。
可以叫嘢食叫嘢飲，喺古巴唔駛担心貴。不過我帶咗早餐食唔晒嘅三文治同賓治，又慳番。
同Aussie傾傾吓至知其中一人大有來頭，佢叫Tom York，有OAM荷蘭水蓋，係2000年雪梨澳運，澳洲國家隊Team manager。同佢哋互通電郵，重叫佢行開Carlingford嚟say 哈囉。
快樂嘅時光一定過得快，五點，天已開始暗，又開始翻起風嚟，Lonely Planet 話日出及日落畤會有好眉好貌會生嘅……..沙虱sand fleas出沒。走人喇！
沙灘出口處，好容易揾到的士。關刀哎s （Cuando es）？8cuc。重施故技，5！4啦（點解）？你同呢兩位女士share，你比4，佢哋比4。殺你。路途上遇人一定問，喺邊度嚟？前站邊度？留幾耐？跟住去邊？呢兩位係藍妹，德國嚟。
番到casa喇，沖涼等食飯，今晚又有龍虾食。
明天Santiago de Cuba 見！
No comments:
Post a Comment