古巴遊 Day 19 Havana – Paris

古巴遊 Day 19 Havana – Paris

文章日期：02/26/2011 12:19 pm

夏灣拿機場離景大堂

22 feb Day 17 Havana – Paris

今天已冇乜節目，昨日得到德國仔指點，話夏灣拿西面有嘢睇。食過早餐即行去睇也。晨運咁行，不如行出海邊睇吓都好，忽然見海邊一處空地，用磚石起咗啲長櫈，有人瞓喺度晒太陽，再行前啲，居然有人游水，需知呢度唔係沙灘，而係尖畢甩利石造成嘅岸邊。佢哋將一處磨平咗，就係一個泳池仔喇。有人游得好出，有人就學緊。書話古巴人擅長bend the rule，物資缺乏，要食腦。

都行咗成個鐘頭至到，書話要3cuc，我入到去，佢話唔收我錢。又會咁好嘅！呢度展出一個籃球塲咁大嘅模型，比例係1比1000。成個夏灣拿城喺晒度嘞。我睇嚟，手工就好粗糙。北京都有一個咁嘅展覽館，但係梗係靚得多。唉，都係錢作怪也。都係冇乜睇頭，走人！

沿第五街向東朝新城區方向。發覺呢條街比較特別，馬路中間再有一條都幾闊嘅行人路，兩旁種滿樹。建築物外有不同國家國旟。好明顯係使館區。

穿過河底隧道，就返回新城區啦。呢處係Malecon海堤大道最西點。坐喺珻邊冥想吓，忽見兩女人帶埋一袋二袋，行出海邊，真中一袋係白雞一隻。唔通係乜嘢儀式？我心諗。只見佢哋捉隻雞出嚟，用小刀鋸雞頸，倒轉放血入個兜度，再將雞血及其他兩樽液體洒喺石頭上。之後將雞掟落海。唔知係乜嘢祭祀，我冇問，亦唔識問。

再向東，都行得夠皮啦，係時候食嘢喇，一心去番Jass餐廳。點知上午有生日會，要到下午1點至開，太遲喇，沿Paeso路向23街方向，有間會所咁嘅嘢，喺有嘢食。呢一餐9cuc搞掂。有什果、豬扒加飯、汽水同啤酒。呢餐係最後夏灣拿午餐喇！

走上23街，揮手截古董車，10分鐘返到23 y 28。返歸執嘢，casa主人已幫我叶定車，將行李攞出房，casa主人又整杯咖啡我歎。冇耐啲士到，謝過casa主人，住機場去也。

Check in時要聲明，行李要由法航轉至維珍直飛香港。過移民局，直入候機大堂，未用完嘅錢換返歐圓，重有就食埋佢。打電話返鋪頭，打電話比啊珊，直至balance用完為止。

上機飛巴黎，8個鐘到。