呢架老爺車載我去.....Guantanamo
16 feb Day13 Santiago de Cuba， Guantanomo
昨日黑孖孖，比人接咗嚟呢度，今朝早啲起身，睇吓周圍乜嘢環境。又話附近有樓梯街，點解又唔係嘅，同地圖有啲出入。可能我睇錯。casa主人一早已煮定早餐，簡單足夠。食過早餐後，昨晚接我嘅男子Mario，一早帶埋昨晚嘅的士連司機喺門口等。佢話可載我去Baracoa，要100cuc單程，但我已改變行程，包車來回關塔那摩幾錢？佢開80，我還50，60成交。由呢度去Guantanomo單程85km，路程唔短，都係值嘅。跳上車，第一件事係買車飛去Santa Clara，好早去，買咗明晚2000出發嘅巴士，37cuc。好嘞，出發喇。司機叫Bablo，將車整頓一吓，車呔、汽油等。呢架車嘅油蓋居然喺車尾箱內！車身外嘅油蓋冚，應該係冇用嘅。我趁機跳上司機位，影番啲靚相。Mario話比住10cuc佢入油，再比3cuc佢搭車。我照比，我諗，呢條友好cheap！
古巴十分缺乏交通公具，通街古董車唔在講。公共交通工具亦然。Lonely Planet成日講truck，我唔明，而家我知。其一，貨車後面車斗直接企人，冇位，冇頂，好天晒落雨淋。其二，車斗有鐵外壳，裡面有櫈。呢啲就係佢哋日常嘅交通工具，生活都好艱難。都有正常嘅巴士，逼到飛起，我唔會試。較新嘅巴士，全部係中國宇通。因為物資嘅支援。睇得出，古巴人對中國甚有好感。
我搭呢架係1941年款，行得走得，都係奇蹟。因為窮，所以創好多奇蹟，我寕願普通啲喇！車走出城市，經過市郊、農村、鄉鎮，都好有睇頭。我發現呢度啲司機普遍十分小心。出路口停定睇清楚，越綫扒頭亦唔係博晒命嗰隻，我直覺認為只有一個原因令司機小心駕駛，就係罸得好重，而且可能監都有得坐嗰隻。我冇得同人講，未能證實，no Espanol就係咁慘喇。
Guantanamo市係Guantanamo省嘅省會，過咗首界不久就有路障檢查進入嘅車輛。要記錄低司機嘅資料。車再行冇幾耐，左後呔冇晒氣，司機同跟車即刻落車換呔，佢哋十分熟手，睇嚟都係慣常動作。車又繼續前行，個零鐘就到啦！入到城，司機不斷通街問路。咦，Mario又話司機住喺Guantanamo。停架車喺市中心，我就四圍撞。實在冇乜特別，不過偶然離遠可以見到美軍機。到約中午，回程喇。一路駛回Santiago舊城區。我叫司機放低我喺城東，我順便遊埋舊城。
因我住嘅casa都喺舊城區，根據地圖係喺西南角，我而家喺舊城區嘅東面，而家時開尚早，試吓跟地圖行番casa。唔難揾，但係呢個地址（係啱嘅，而且見到樓梯街）並唔係我昨晚瞓嘅地方！今次大劑，咁我昨晚瞓嘅係乜嘢地方？我啲行李全部喺嗰度，邊個知道嗰度係邊度？我即刻走入呢個我以為喺度住嘅地址。好在casa男主人同佢個女識少少英文，咁複什嘅嘢，點講得佢哋明。
而家重組案情。（請亦參看昨日故事）
早喺前日，我要Trinidad casa主人，第一叫呢度揾人接我車，第二我要有地址及在地圖標有casa嘅位置。昨晚出閘後，巡例有人問要唔要casa，我話已訂咗，而且等人接。但又無人用有我個名嘅紙牌接。冇耐，呢條肥仔Mario走埋嚟，重識英文（書已經警告過小心講英文嘅人），佢問我叫乜名，我話Kin。 Hi, Kin, 我而家接你去casa喇（好似猜猜我是誰，我下次應該反問，你係邊間casa？接邊個？）。二話不說，同我攞大背囊，直趨的士。連司機一行三人，直趨我住緊呢間casa，到步後，入屋，介紹casa主人過我，用英文對我講，話呢位女仕係佢個妹，而Mario自已就住另一度。我唔識西文，casa主人又唔識英文，呢條Mario喺中間點噏都冇人知。以後嘅事，大家就知嘞！
我誇張咗我嘅驚慌，希望博佢哋會幫我搞掂佢。喂，真係好麻煩架！唔通我通街問人知唔知我咋晚喺邊度瞓？而且西文又點講？我嘅演技終於打動咗佢哋，佢不斷叫我tranquilo（好彩呢個字我識），然後叫佢太太同埋我去入境處oficina。我知道我每到一個casa，佢都要睇我護照，我唔知嘅係佢要將我嘅資料即刻送到入境處。即係話，我而家住喺邊個人嘅屋企，入境處係知道嘅。當然casa主人要即刻報。好似我咁，casa主人今朝即報咗我入嚟。casa主人太太道明來意，該職員（入境官？）喺櫃通，一張一張咁揭，就揾到我嘅紀錄。casa主人太太記低地址，即刻叫三輪車跟地址去，揾到啦！重唔係呢度！返屋企喇。
casa主人太太同我住緊casa嘅主人，溝通一大輪，我相信佢明白發生咗乜嘢。
我扮晒嘢好嬲，話即刻要搬走，佢講晒lo siento，一定重有話唔關佢事（我估咋！）我直覺佢係好人嚟嘅，一日係條Mario衰。實在佢可以話介紹嗰間滿咗，而家幫你訂咗另一間，就唔會發生唔知瞓咗喺邊嘅事件啦！我而家又瞓番喺呢度喇！
touch wood有意料之外嘅事發生，而又解決到嘅，都喺旅行（人生）嘅特別經歷！呢個算係一個。
扮完嘢都要繼續生活，寫番啱地址，再標喺地圖上。孭上背囊出街遊舊城。今次學吓人用人民幣，買咗個豬肉包，10人仔。見有橙汁，寫住2，我以為cuc，排隊嘅隊友提我係用人仔。嘩！真係好平！
就嚟又水乾，去el banco換的cuc駛吓，電話sim咭又要增值。乜咁多嘢做架！
行行吓又見番瑞典妹Alva，原來佢哋買到去Baracoa巴士飛。佢又介紹我酒店天台有個bar，買杯嘢坐喺度，可360度睇晒Santiago城景，明天可以一試。
明天2000搭夜車去Santa Clara。
No comments:
Post a Comment