哲古華拉紀念館
18 feb Day 15 Santa Clara
昨日5點食晚飯，別過casa 主人Doris，跳上的士，到車站，重有粒幾鐘至開車。我用騷擾戰術，不時問係唔係呢班車，攪到整行李嘅啊叔都記得我搭邊班車。時間就到，佢已經叫我寄行李。我知道夜車冷氣好勁（書話嘅），所以帶埋厚褸上車。開車啦，車程約12粒鐘。整定架步，瞓覺也。坐吓坐吓，先知大劑，我有帶厚褸，但係着住短褲涼鞋，我估唔到咁凍，車廂內好似個雪櫃，好彩巴士會停站，有人會攞行李，有人會放行李，我就落車攞咗個背囊外袋笠住對腳，再着埋膠雨表，戴埋帽，勉強頂得順。
重未止，我知古巴人鍾意音樂，而且係節奏强勁嗰隻，但係10點幾重開着，在座好多人識西班牙話，點解冇人投訴。我唯有出去對司機話，musica…唔知點講細聲啲，唯有出動手勢，用手掌壓吓壓吓咁。司機笑笑口話Si。咁我坐低番，音樂照舊，佢唔會以為我欣賞佢啲musica，所以比多啲我聽呀嘛？點算好，靈機一觸，用紙巾塞住對耳，都好過冇。下次記住帶埋耳塞！好彩音樂喺11點幾停咗。
係我第一次塔夜車，比我想像中舒服，我居然瞓得幾好。當然都係瞓瞓醒醒咁，唔錯啦。忽然又有音樂聽。唔係呀嘛，幾點呀？6點幾。駛唔駛咁鍾意音樂？好彩就到Santa Clara！
帶埋行李出閘，例牌四圍有人對你講casa，達西。今次冇book定嚟，試吓點。有人嚟，佢唔識英文。我問佢casa喺地圖乜嘢位置（呢句西文係我成日講嘅）。En centro！佢幫我拎大背囊，去到一睇，居然係馬車！「極力覺落」，原來中心區離巴士站都有2km遠。駛到一casa，司機….sorry，唔係，係車伕，停馬，對我講momento。入屋，冇耐同另一男子出來。佢可以用英文溝通，話呢個casa已滿，不過我可以去另一個。到此，真相大白，馬車伕只不過係駁腳。casa之間互相介紹，亦係合作生存之道。
極力覺落。又到另一處，都喺城中心。呢個casa已有兩組人住緊，今日離開，正好我填補佢一間房。其中一對couple食緊早餐，我又做八卦公。佢哋係法國人，喺德國工作咗3年。個男嘅係做科學研究（嘩！），請問邊瓣？原子物理學（曄！可能識整原子彈）。我話比佢聽，我係鞋匠，我嘅工作比較容易理解。另一對couple帶埋單車嚟。書都有講，途中搭巴士時亦見到單車旅遊人士。十分羨慕。
casa主人叫Pilar，我喺度食埋早餐至出發。沖涼梳洗稍作整頓，出發啦。
到Santa Clara只有一個目的，就係去老哲紀念館。1968年10月8號佢比玻利維亞政府軍捉咗，咨詢CIA，佢第二日連同其他38個游擊隊員被槍決，秘密埋葬。到1997年揾番佢同埋其他17個人嘅骸骨，送返古巴，再葬喺Santa Clara呢度。呢個銅像係1968至起，紀念佢被殺20週年。葬喺呢度並唔係佢嘅故鄉。而係呢度佢打過大勝仗並因此導至古巴革命成功。銅像下有紀念館，介紹老哲生平。
知否，老哲根本唔係古巴人，佢喺亞根廷出生，屋企係富有嘅，醫科畢業唔做醫生，駕電單車周遊南美，醉心暴力革命…..等等。
老哲确係傳奇入物，古巴革命成功後，佢被頒榮譽市民，並成為國家銀行行長，商業部長。多數人打完江山，就坐江山喇。可惜佢唔鍾意打呔，再去非洲，中南美搞繼續革命。結果亦葬身於此。Hasta la victoria siempre 就係佢嘅金句。
睇得出古巴人好懷念佢，樂隊表演，有時都唱懷念老哲嘅歌，casa 主人Doris，多次話佢好鍾意老哲。再唔講成個古巴到處都有佢嘅嘢。可能生活愈艱難，愈記住英雄人物。
廣場就好大，紀念館好細，好快睇晒。走出嚟，見有人影婚紗相。結婚都要話比老哲聽？
跳上馬車，返回中央城區，其實冇乜好睇。坐喺廣場睇吓書有乜好介紹。雪茄厰啦！參觀票唔可以喺工厰買，要出番去旅行社買，4cuc一個入。好多工人，每支雪茄都係人手一步一步咁造出嚟。造出嚟可以賣好貴，工人雞碎咁多收入，啲錢唔知去晒邊？你知唔知一個醫生幾錢一個月？
再計劃吓末來幾日行程，發覺喺夏灣拿時間太長，揾個中途站停一日都好。Varadero啦！走入infotur訂酒店，一切順利，係巴士時間唔多夾，一於…..
明日飛的去。200公里。
No comments:
Post a Comment