咖啡博物館附近lookout point
13 feb Day 10 – Trinidad
昨日失策之處，就係有人接車，開心過頭，唔記得咗買定去Santiago de Cuba嘅車飛。今日再去試喇！
今日預備早上去海灘，下午遊鎮。8點鐘早餐，一路食一路睇Lonely Planet，睇吓有乜好介紹，揭多兩頁，原來距離千里達鎮17公里處，有山區延綿90公里，叫Topes de Calliantes，呢座山 我搭車嚟時已見到。點去呢？Lonely Planet話可聯絡的士，同佢講價，包車3個鐘，約25cuc。我即刻叫casa主人睇吓有冇相熟司機，即刻揾到，收30，唔講價喇，叫佢15分鐘到。早餐十分豐富，唔會食得晒。將火腿三文治同生果賓治包起做午餐，其餘重有咖啡、熱奶、木瓜、番茄、波蘿、煎双蛋、麵包，全部食清光。
門口有車嚟接喇，係一架日產4x4，舊啲，但已係我喺古巴咁耐，最四正嘅車。車主叫Samuel，此後，佢處處表現出擁有呢架車係幾自豪。一路上，佢四圍同人打招呼，街上amigo又招呼番佢，真係mucho amigos。諗番起，同喺夏灣拿車仔佬都好相似，佢又係鍾意撩女仔，Espanol點講？Linda Cubana！原來女仔被撩，唔一定感覺冒犯，而且重會開心，Lonely Planet都提過吓。
車離開市區跑上山，愈行愈高，去到一個lookout 點el mirador，落車睇嘢，先知好大風又凍。今日本來預備去海灘，著定Ｔ恤短褲，搽到成身太陽油，點知變咗冷天！落車直行上lookout亭嘅屋頂。嘩，風景靚到不得了，前面180度無敵加勒比海海景，後面180度延綿唔知幾多里嘅山峯。雖然比風吹到頭甩，但絕對值得。亭角插有古巴國旗，見有兩件鬼仔（後來再遇番，原來法國仔）在影相，啱嘞，有人幫手影嘞！扶住旗杆，唔好比風吹咗去，擺出Asian V字手勢。
再向山內進發，深入山區後，開始見有田地，原來係咖啡，亦有民居，甚至有6層8層似徙置區嘅民居，原來係咖啡農民及工人嘅住宅。車行到古巴當代藝術博物館，叫停，原來冇乜好睇，走人。再經過一個有巨型日晷嘅廣場，冇落車睇，後來睇番書，原來係information centre，早知就落車。
愈入山就愈大霧，Samuel話佢未見過咁大霧，係因為有冷鋒進入古巴。冇耐去到咖啡博物館，呢度好旺，參觀團一批跟住一批。好多係由歐美嚟嘅行山長者，個個孭背囊，手執行山杖。令我想起喺約旦都見到此情景。先參觀外面古老製咖啡嘅工具，然後入內買杯咖啡，咖啡香濃，用嘅奶都用蒸氣打過。Muy bien
我向前行，見有個resort，好靚，門外有人守住，我問准入內影相，呢度有條河流經，佢用堤閘住河水，再喺堤嘅下遊嗰邊起個泳池，泳池兩面擺咗餐枱，超級有情調。再由原路回頭，赫然發覺有一革命博物館，原來喺古巴解放戰爭時，老哲率領部隊，在此紥營打去夏灣拿。但解放後，美國佬資助反革命軍，亦曾於此紥營進行反革命。
上車離開山區，比多15cuc佢，再車我去Mirador de la Loma de Puerto. 。此處建有一44m高嘅瞭望塔。係1750年西班牙殖民時期嘅，莊園主有大量黑奴工作，高塔一來可監看黑奴，二來用火時亦可控制火勢，以免失控。
返回千里達時，已經成兩點啦！Samuel車我去巴士站，每日得一班車開去Santiago，而家已經滿咗，後備都有5個等。行出車站，有8人車去Santiago，每位40cuc，而且喺casa接，應該冇中國宇通巴士咁舒服，但都係只有咁喇！
肚餓，坐喺公園仔，食個由早餐變午餐嘅三文治同賓治，再行吓個鎮，又買咗洗頭水。見有上網，3cuc30分鐘，上到香港yahoo但睇唔到中文，咁即係冇用。好攰啦唔行啦。返歸預備食飯。
明天8時起程，casa主人幫我預備下兩站嘅casaes。
By the way, 呢個黑人casa主人名叫Moro。
No comments:
Post a Comment