事頭婆屋企，白金漢宫
Day 2 – London
2011.02.05泰晤士河新春行大運
因為飛機餐嘅關係，昨日成日肚仔都唔多舒服，所以食咗一個營養晚餐（相），今日已全面恢復喇。早上係hostel食過間單早餐，即上征途。
睇住地圖，約半個鐘左右就行到事頭婆屋企，白金漢宮，影番幾張標準相，再向河方向行，經過威靈頓軍營（禁軍駐地），就轉入御花園St James’s Park。一入去，見有一pommy（口音非常易認）用有殼花生喂雀，本來冇乜特別，忽然見雀群中閃出松鼠仔，此鼠竟然爬上英漢身上揾花生食。平時見松鼠都好怕人，來去怱怱。呢幾隻嘢可以同人咁接近，重混入雀群搶埋一份，十分少見也。喂，點解啲松鼠唔怕你嘅？英漢話佢每星期都嚟喂佢，已经熟晒，佢重叫呢班友仔做ninja squirrel 。咁我喂又得唔得呢？得！只要你有花生，佢就會嚟你。..…唔！喂松鼠，悟出人生大道理。特區眾生相，我又明多啲喇！
別過英漢，行到禁軍騎兵駐地，啱啱錯過咗換防儀式。門口兩邊各有一騎兵，個個都争住同佢影相，我都唔執輸，影一張先。咦，乜禁軍都有黑人？又幾多元文化噃。
喺呢度已聽到大笨鐘嘅報時。佢每15分報一次，整點畤就大搞一吓。大笨鐘其實係國會大厦嘅最北端部份，而南端嘅高塔就叫Victoria Tower。沿國會大厦南行，對面街（西面）有空地叫Parliament square近路邊處，有一排野營用嘅tent，同上世紀天安門廣場嘅tent十分相似。裡面冇人啩（我睇唔到），上面寫住標語。例如反對以色列壓逼巴人…等等。不過點解英政府唔清佢場呢，咁多世界各國遊客，唔好睇吖嘛！
今個講住咁多先，好眼瞓。
ZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZZ
That was only the 1st 3 hours story in the morning
the rest of the story will be continued when my mind is clearer.
have a look of the photos first,
No comments:
Post a Comment