日月山，文成公主路經此地
2011.08.29丹葛爾古城，日月山，茶卡鹽湖
兩晚冇好好咁瞓過，卒之有覺好瞓，噚晚恍如大昏迷。六點半起身，七點食早餐，都算係過得去嘅自助早餐喇，出外旅行，唔好要求咁高喇。
團友非常合作，準時開車，到達丹葛爾古城。又係城隍廟呀，啲咁嘅嘢。較特色嘅係文廟，即孔廟。廟內有一部份，遊客獲發一本假綫裝書，有類似教書先生嘅人教諗書。「學而時習之….」，大家就跟住讀。又有一個丹葛爾廳署，即係芝麻官升堂審案嘅地方。佢哋安排有官、師爺、被告、官差等，上演一場烏龍芝麻官審案。鼓聲咚咚咚，大老爺大拍驚堂木，師爺大嗌升堂。遊客都識大嗌「威…武…」。宣讀案情，之後草草判案，被告扮晒嘢，嚇到跌落地下，此時咁好機會，我點會執輸，即刻大嗌「寃枉大老爺」，然後逃之夭夭。
又有乜嘢藏民、回民服裝表演，民歌演唱等，都係求求其其揾遊客老襯掠水之舉，不談也罷。回想起香港宋城、集古村，比呢啲好睇得多。都係香港好！
去完廁所，跳上車趕下場喇。車從西寧向西南駛，要跨過日月山。此處高3500 米。相傳唐代文成公主遠嫁吐蕃，路經此地，一時傷感，留下眼淚，佢嘅淚水就變成倒淌河（即係河水由東向西流）。係真係假就冇人知，呢度成為景點，好多人喺呢度揾食就真珠都冇咁真嘞。啊珊點會錯過機會，唔理有乜嘢高山反應，即刻衝上成百級樓挮，睇下擺地攤嘅藏民賣緊啲乜嘢家傳寳物，當然亦有啲斬穫，就係雞血石一嚿。
亦有藏民拖住白牦牛，比你坐上去影相，又叫你抱住小羔羊影相。當然要付出人仔作為代價啦。大家揾食啫。
講真，呢度風景真係靚，3500m居高臨下，一望無際，加上呼呼山風，果然氣勢非凡。
拜別文成公主，繼續向西南走，到達今日尾站，茶卡鹽湖。Ｎ咁多年前，呢度係浩瀚大海，天帝將海洋托起，變成高山，造成內陸瑚泊，水份蒸乾就變成鹽湖喇。今日好天到冇得頂，藍天少雲，曬到飛起。我哋搭小火車去鹽湖邊，講解員頭戴巨型鴨舌帽，巨型墨超，絲巾包住成塊面，長衫長褲手套，冇一丁啲肉露出嚟，認真夠晒職安健（OHS）。佢講解得都幾好，不過，由頭到尾，我都唔知呢位靚姑係乜嘢靚樣，認真遺憾。
呢度位處柴達木盤地嘅東端，被祈連山（北面）及昆崙山（南面）所包圍，即刻諗起「如來神掌」，武林高手好多都來自嘅兩座山。藍天，加上高山環抱碧錄湖水，岸邊晶瑩雪白鹽粒。影相一睇，嘩！又謀殺唔少記憶體喇。十分滿意。
驅車到賓館，呢度只係小鎮，條件當然好有限，厠所尤其風味十足。好彩牀舖都幾乾淨，算係咁喇。
晚飯後，出外散步，過咗馬路（呢條唔係普通馬路，係著名嘅青藏公路），係一個廣場仔，大喇叭播住吵耳音樂，駛唔駛咁大聲呀？！幽暗燈光下，有回民、藏民散步、打士碌架等。好一個民族團結和諧景象。
冇嘢睇、冇嘢買，返歸瞓覺喇！
wtm246 at 02/07/2012 11:37 pm comment
Enjoy your day! Have a nice day!
No comments:
Post a Comment