文章日期：02/07/2012 08:18 pm
大本營賓館餐廳外，呵！珠峰出嚟喇！
西藏遊（十一）
2011.09.08 珠峰大本營，扎什倫布寺，日喀則
早睡早起，今日我有個訓練任務，要體驗一吓喺5千幾高海拔運動嘅感覺，為明年去尼泊爾做準備，我一早起身，天重未光，孭起day pack，逐層樓嘅走廊，由頭行到尾，再上一層，再行走廊…，如是者上上落落，行咗成粒鐘。果真体會到高原運動嘅感覺，同行平地真係好唔同，anyway比咗我好大信心。
由天黑行到天光，忽然睇到屋外積咗雪，方知噚晚落咗場雪。睇吓個天，仍然陰雲密蓋，今朝可以睇到珠峯晨光第一綫嘅機會好微。一路喺摟梯走廊上上落落，陸續見到其他團友紛紛起牀，洗漱等。我亦結束高原晨操，得益不少。
高原地方，物質缺乏，簡單嘅早餐，好好喇。食食吓，出去露台，睇吓乜嘢環境。四周都係霧，望向珠峰方向，都係睇唔到。唯有影多幾張霧鎖珠峰相。冇耐，皇天不負有心人，四周嘅霧忽然散去，珠峰居然露出真面目，向東嘅山坡，一條銀白色嘅太陽反映，清可見。即刻入去報料。各人即刻放低早餐，出動所有相機，趁住珠峰女神未改變主意前，多合照幾張相。
用珠峰做背景，打三個側手翻，係我必做嘅動作。
花三日時間，到訪大本營，終於睇到珠峰真面目，可算不枉此行嘞。目的既達，眾人執嘢走人。出去停車場，所有車都鋪滿雪，司機都忙於清理車窗上嘅積雪。上番四驅車，回程日喀則。
噚晚落過雪，路上一個二個水氹，四驅車都拋得好犀喇。可能經過一夜休整，高山反應亦已適應，加上一路向山下走，啊珊並無任何不適。各人心情非常愉快，一路上，司機同我哋不停唱歌，融洽得很。
不知何解，回程路，時間過得特別快。終於離開繞道碎石路，返回318國道，咁就舒服晒。
好快就返回日喀則，入城前，喺城西停車，參觀扎什倫布寺。此寺與拉薩嘅三大寺：「甘丹寺」、「色拉寺」，「哲蚌寺」，合稱格魯派四大寺。自四世班禪以來，歷代班禪，都以此為基地。寺內有一高牆，每年「展佛節」，會掛上一張巨型唐卡。
返回日喀則市區，先到餐廳食晚飯，返回藏隆酒店。領隊分房，今晚好彩分到一間有套間嘅房，客廳有電動麻雀枱，睇吓有冇腳，今晚打麻雀。分房後，各位即返房冲個靚涼，然後再逛街掃貨，亦有人去按摩，行到攰晒，返酒店休息。
冇人打牌，浪費咗張麻雀枱。
No comments:
Post a Comment