離開西寧，搭青藏鐵路去拉薩
西藏遊（六）西寧、青藏鐵路、拉薩。
今日係緊張嘅一日，要搭聞名已久嘅青藏鐵路。早上起身，唔喺酒店食早餐，再搭的士出去揾啲持別嘢食吓。問吓靚女司機，佢介紹有間叫清真馬尔沙牛雜，非常聞名，可以一試咁講。唔駛10分鐘就到喇，果然見到人山人海，排晒長龍。傳统智慧話，咁多人排隊，一定好食。條龍雖然長，厨師 快手快腳，好快就輪到我啦。正擔心唔識叫食物，原來全店只賣一種食物，係！係一種。就係牛雜湯連一個薄餅。不過你可以揀要大碗或細碗。我哋要咗一碗大、一碗細。原來份量都唔小，料又足，味道都幾好，不過又唔係驚為天人嗰隻。老闆唔停手咁收錢，應該都幾發噃。
食過清真早餐，行吓街市。都好多嘢賣，可謂物產豐富。街市亦十分整潔，對西寧，留下幾好嘅印象。不過物價都唔少嘢，拍得住香港，有啲重貴過添，用當地人工計，生活都唔容易。
行行吓有啲凍，百幾银，買左件薄風褸。原來呢度都好多賣户外活動用品嘅舖頭，注重消閑，係中產人口增加嘅指標，生活水平應提高不少也。
聽講西藏冇乜生果，行去著名嘅水井巷街市，買咗廿個生果，好重！重要拎埋去西藏！
行返酒店，收拾所有行李，先車去食午飯，再去火車站。別過導遊小汪，展開24小時青藏鐵路之旅。順利入閘去到候車室，坐低後，有團友發生疑似唔見咗證件事件，嚇得個個一額汗，團長重親自督導，翻箱倒籠，終於化險為夷。事後佢送手袋、請飲啤酒，此是後話。
我哋搭呢班車，喺由上海出發，西寧只係中途站，因此我哋團友坐得好散。好彩我坐到軟卧，空間同設施都比硬卧好啲。同房有一個由星加坡嚟中國solo旅行嘅醫生仔，佢好好人，主動讓咗個下格比我個團友。好多團友都嚟我間房，傾偈食嘢，我哋喺下格玩得好開心，不過唔知有冇嘈親佢。車行到夜晚，忽然個喇叭廣播，話有乘客有病，坡仔醫生即刻出動，真係一個好人！
西寧海拔三千二，火車一開就向上爬升，最高去到唐古拉山口，海拔五千二，然後再下降到拉薩三千五。不過，成架火車係密封兼加咗壓，乘客多數都唔會有高山反應嘅。聽講以前係比人喺唐古坵山口落一落車，影相留念。但有人因高山症香咗，自此就取消咗呢個節目嘞，bad luck！所以我連過咗唐古拉山口都唔知！
一路上景色獨特，遠處有冰頂嘅連綿雪山，近有草原湖泊。牧民嘅帳篷同佢哋嘅牦牛、羊等，到處可見。火車到咗無人區時，著名嘅藏羚羊亦不難見到，不過喺好遠好遠。好好嘅經驗。
火車內揾兩餐亦唔係好難，可以去餐車食，不過最好先訂，以免滿座。亦可買飯盒。冷熱水供應充足，亦可買杯麵搞掂肚仔。總之各適其適，十分方便。我只食咗晚餐同早餐，第二日嘅午餐就冇食，成日都冇乜點郁，駛乜食嘢！
不過解決大小二事，對有啲人嚟講，尢其女仕，仍然係一個挑戰。廁所成日都塞，當然非常有風味，行過都耍忍住道氣。公道啲講，乘務員已經好盡力去清理，我認為係結構上嘅缺憾，好多人埋怨前綫工作人員，咁唔公道。
喺火車瞓覺，十分好瞓，有空調，枕頭被鋪齊備，十分ok。
火車係密封嘅，規矩上係唔准食煙。但係啲煙剷如果24小時冇煙食，唔知會點樣。所以亦有「潛規則」，就係只可以喺每卡嘅頭尾度食，而且晚黑就唔可以食，咁都係一個折衷嘅方法。
愉快嘅時光好快就過去，火車比預定時間早咗啲到站，約3點半，到達拉薩。
拉薩導遊小陳接車，佢係全程唯一識講廣東話嘅導遊。照例，每人比一條哈達叫一聲「扎西達勒」即吉祥如意，上車去酒店喇。住嘅叫唐卡酒店，就喺中心。離著名嘅步行街，即「八廓街」，行路只須5分鐘，離布達拉宮，就要步行約30分鐘。
快速check in後，早啲食飯，就可以去行街喇。八廓街係圍住大昭寺附近嘅步行街，好多攤檔。藏人鍾意裝飾，攤檔大都擺賣飾物、供彿祭品、吉祥物品等。當然亦有食嘅著嘅等日用品。呢度重係夏天，日照時間好長，成8點重係好光，8點半開始黑就收嘞。當然大有斬穫，連僧侶用品都有買。
第一日喺拉薩就係咁啦！
No comments:
Post a Comment