大本營 Base Camp 五千二
西藏遊（十）
2011.09.07 日喀則，嘉措垃山口5248，珠峰大本營
今日當然係全個旅程嘅高潮所在，由日喀則直駛去珠峰大本營。
雖然唔駛太早出發，但啊珊念念不忘三輪車市區遊，所以我倆仍然一早起身 ，怱怱食過早餐，走出街揾三輪車。七點幾，條街重唔係好多人，好多舖頭都未開，三輪車亦唔多。行冇遠有一架，問價，佢開50，我還20。埋唔到欄，一拍兩散。再行冇耐，又有一架，先下手為強，即開價20，車伕話OK，一粒鐘內四圍遊再返酒店。沿路遊經民居、商店等日常生活嘅地方。車到一個街市，落車行吓，車伕亦樂得透吓氣嘆番支煙。原來本地人日常市場，都有好多賣小飾物嘅地攤，可見當地人非常喜歡小飾物。
時間緊逼，車伕速速載我哋回程，途中經過「香港周大金珠寶」，唔知條唔係周大福個細佬。
返酒店，執齊嘢，跳上四驅車，向珠峰出發。仍然沿318國道向西行，國道旁不時都有里程碑，標示離出發點上海人民廣場有幾遠。一路行，里程碑標4千9百幾，行冇耐，就到咗一個5000公里嘅紀念碑，落一落車，透透氣，去茅厠等等。茅厠門口照例有肥婆收錢，裡面照例又係臭崩崩。啊珊前日比厠所臭暈咗，今次比錢前向肥婆話，你班友淨係識收錢，又唔肯整乾淨個厠所！肥婆話，「我唔覺臭喎！」比佢吹漲！
車繼續行，再翻過一座山。到達加措拉山囗，海拔5248。落車影相不在話下。車，越行越荒涼，國道兩邊只見碎石及荒草，遠處山峰全部都積滿雪，路邊都見積雪。又到一處休息點，我馬上跳落車，用地上積雪搓雪球四圍掟，十分過癮。啊珊不忘shop地攤，不在話下。
一路沿318國道行，都好舒服。午餐過後，行車冇耐，就離開國道，駛入繞道，啊珊嘅惡夢開始喇。再冇瀝青馬路，而且之字路上山。如果唔係四驅車，根本就行唔到呢啲路。全部都碎石路，拋到你飛起。加上轉彎抹角，你個人就喺車廂裡面，前後左右上下360度全方位滾動，好似入咗架洗衣機咁。而且愈行愈高，暈車浪再加高山反應，啊珊辛苦都飛起，佢話，好似有個大鎚，大力敲落個頭咁痛，真戥佢辛苦，我就乜事都冇。
如是者，掟來掟去，翻過一座又一座高山，經過一個又一個check point，又嚟到一個山口，導遊小陳話呢度可以遙望珠峰。可惜，山峰比雲遮住，只見山巒起伏，珠峰就唔肯露面。唯有上車，兼程趕路，要喺日落前到達珠峰大本營。
辛苦嘅路終於過去，終於嚟到珠峰大本營，大本營係幾個大球場大細嘅地方，中間空地，兩邊紥起一排，一個跟住一個，小屋咁高嘅帆布營，提供食宿。環境肯定唔會舒服，好彩我哋唔住呢啲營。
雖然未係黄昏，但天色已開始陰陰地，加上成天都係雲，氣温下降，即著上雪褸。
啊珊由洗衣機落嚟，重係暈吓暈吓。但仍未有得休息，因為趕住要喺天黑前去觀景台。有穿梭巴士由大本營上觀景台，窄到飛起嘅山路，啊珊由細洗衣機轉入大洗衣機，再拋多15分鐘。到喇！落車，居然見到有「珠穆朗瑪峰8844.43」嘅牌。睇真啲，原來話，距G318，80KM。G318就係珠峰。
觀景台係一個約50m高嘅小山崗，由落車處要再行約400m。平時，唔駛一分鐘就行上呢啲小山崗，而家，啊珊行三步要透一透。我話要扶佢，佢唔比我幫，一定要自己上。我將佢上小山崗呢一段，全程錄影。我喺佢周圍前後左右走嚟走去，發覺，我都氣喘，唔可以連續講超過5個字嘅句子。高山，真係有反應！
團護Esther企喺山崗頂，不斷叫人慢慢行，又叫我扶住啊珊，認真負責兼有心。唔知用咗幾多時間（15分鐘？），終於登頂，企定透透，走去望到珠峰嘅地方，好多人已經擺晒甫士，同珠峰女神合照。咁辛苦上到嚟，唔執輸，影番張珠峰相，美中不足嘅係，珠峰女神唔肯除下面紗，峰頂始終為雲霞所蓋，未能得賭全貌。
落山喇，OK喎，完全冇事，啊珊亦回番條氣，一路行番去搭穿梭巴士返回大本營，再搭番四驅車直去珠峰賓館。
睇完珠峰後，團友十分興奮，四圍影相，將團長話嘅集合時間忘得一乾二淨。團長分房後，即對全團訓示一番，要大家嚴格守時。
夜幕低垂，食過簡單晚餐，行出賓館大露台，睇到珠峰頂嘅嫦娥。月色照落珠峰，日間睇唔到嘅珠峰女神，居然喺月光底下露出真相！雖然只係一個白色雪峰反映，已經好唔錯喇！
搭咗成日車，咁凍點沖涼？！早啲瞓喇，好彩房間都夠暖。第一次喺5千2海拔過夜，感覺呼吸比平時急促，好似吸極都唔夠。好彩，我係個睡寶寶，好快就夢會睡公主喇。
No comments:
Post a Comment