布達垃宮
西藏遊（七）
2011.09.04 布達拉宮，大昭寺，拉薩民族文化藝術宮
第一日拉薩活勳當然係去布達垃宮，導遊話，而家係旺季，旅行團只能逗留1小時喺寺內，宮內其他地方就冇限制。布達拉宮係值得去嘅，如果有一日我重遊西藏，布達拉宮係原因之一。旺季時散客好難買到即日票，即係話要留多幾日喺拉薩至穩陣。
參觀完布達拉宮，穿過隧道，對面馬路就係布達拉宮癀場。廣場有石碑，講明係為咗慶祝和平解放西藏而建，嗰度向住布達垃宮影相係最佳角度。唔駛講亦係打側手翻慨最佳位置。喺癀場嘅左角有個白鴿廣場仔，再過啲，有個水池，水池邊，有好多人面對住布達拉宮「叩長頭」，即係行三步，拜三拜，再五體投地個隻。睇佢哋叩長頭，絕對感受得到佢哋對自已嘅信仰嗰份真誠，同我喺耶路撒冷所見，有相同感受。
過番八廓街呢邊就係大昭寺。大昭寺由唐朝文成公主同尼泊爾赤尊公主參與興建。如果講信仰，藏民對大昭寺更加尊敬。以前，政教合一，布達拉宮係達賴嘅政治行政中心，而大昭寺嘅宗教味道重啲。我喺大昭寺邊嘅八廓街行街，不斷見到人潮同一個方向咁行，初初重以為係返工時間。後來至知，原來係信眾繞住大昭寺，順時針咁行，每行一圈，就等於唸咗一遍經。
藏傳佛教徒對轉圈（一定要順時針）等於唸經有獨特見解，佢哋將經文刻上轉輪，轉動經輪等於唸經。經輪可以細到單手可轉，大碼啲，一兩米長柄用雙手轉。亦有坐地巨型經輪，亦有幾十個一排，一路行，一路轉。推而廣之，傳统嘅，有起喺河邊用水力推動嘅經輪，亦有全新科技，用太陽能發電推動，等等。相同道理，藏民亦相信將經文寫喺布上，造成旗幡，風將經幡吹郁，亦代表唸經，慳水慳力，十分聰明也。
公道啲講，佢哋唸經都好勤力，賣嘢嘅小販，一路招呼你，一路唸經。煮食嘅、行嘅、坐嘅……..，總之，四圍都見人唸經。
睇完大昭寺，又去行八廓街咯。原來僧服店都有唔少嘢可以買，和尚孭袋、和尚鞋、布腰袋等都ok喎，買咯！
食過晚飯，驅車去拉薩文化藝術宮睇musical，戲名叫做「喜瑪拉雅」。票價280人仔。入戲院坐定，見到有「請勿照像和攝像」嘅牌。一如以往，你估有冇人會遵守？我連呢個牌都影咗，你明啦。
Musical係有水準嘅，artists亦好pro，靚仔靚女，劇情就老套咗啲，ok喇。
散場喇，多數觀眾都有旅遊車嚟接，即係話，呢啲都係旅遊業其中一環。
今日一早睇咗布達拉宮，晚上驅車去睇布達垃宮夜景。布達拉宮依山而建，以白色為主，最中央最高部份係紅色（紅宮），晚上山腳巨型泛光燈射向布達拉宮，十分醒目。咁嘅氣氛下，個個都high high哋，玩得幾開心，謀殺不少記憶體就不在話下。
因為要等兩個遲返嘅團友，我同啊珊要搭的士返酒店。全世界梗係有啲的士佬係麻煩嘅，硬係唔想車你去目的地，要勞氣至搞得掂，太麻煩！
No comments:
Post a Comment