天子山景區入口，登塔瞧下看
2011.09.15張家界（一）天子山自然保護區
幾夜瞓都好，今朝一早就要起身，集合前走出街，行一行睇睇環境，原來酒店座落離景區不遠之處。反而離開張家界市區頗遠。行行吓，見到呢條街名：未央路，即刻諗起夜未央。咦，住喺嘅度嘅男人，豈不是…未央生？
開車唔駛半個鐘，就到景區門口。導遊派飛後，千叮萬囑，將門劵妥善保存，因為用兩日。入場時，將門劵插入機內，即刻打埋指模。即係話，門劵唔可以撈亂用。
排隊上去搭吊車，人山人海。為咗唔駛排隊啲人太悶，路邊擺咗卡拉OK，邊個唔怕醜，可去大顯歌喉，個喇叭啲聲大到幾乎成個山都聽到，兩個字，吵耳！喺咁靚嘅山景，可唔可以靜靜欣賞。聽吓風聲、鳥聲、流水聲。
吊車依山而建，非常險要。是日也，漫山濃霧，睇唔得遠，但穿梭霧中，別有一番風味。吊車上到山上，要用腳逐個景點行，奇山怪石，風景係好獨特，但真係太多人，太多人。多數導遊都將大聲公嘅聲浪開到最大，加上遊人高聲談笑，小販、影相佬大聲招倈，每個景點都係街市。配合美麗自然景色，簡直係一幅絕佳煮鶴焚琴嘅圖，世界各地，不易得見。
影相佬亦霸住所有上佳有利位置，如要影相，唔該比「人仔」。佢哋亦擺咗高台，唔覺意走咗上去？唔緊要，「人仔」又搞得掂。
中午，因為喺山上，午餐就喺景區內餐館搞掂，餐後再行落山。行行重行行，行過好多觀景台，懸崖等，都係好風光，不過，真係人太多，似行街市多過似行山。
我又發覺，喺山邊石底，放咗好多企直嘅樹枝，個樣似用樹枝支撑住凸出嘅石。伲個情景，我喺九寨溝就見唔少。問隨團攝影師，佢喺土族少女，佢知答案。原來，土族風俗，有老人家，有腰、腳等骨嘅毛病，家人就用呢個方式祈福。用樹枝頂住石頭，就好似支撑住病者，make sense喎！迷團終於解決。
好快行到山腰，有大笪休息地方，坐低攤透吓，同時集合番成隊人。大大個牌寫住「特級防火區，禁止吸煙」，就喺個牌周圍，大把人大模施樣，叼住煙仔，吞雲吐霧。正是：你有你噏，我有我吸，國情吖嘛，慣喇！
再向前行，呢度起咗三架升降機，據說係全世界最高嘅；載我哋直落300幾公尺下嘅地面。打開門，幽幽暗暗，以為有孟婆喺前面賣湯！穿過陰陰濕濕嘅通道，柳暗花明，走出地面。
大喇叭播出土風舞音樂，見到露天大舞台，有著住五彩繽紛民族服裝嘅鬼佬鬼婆，表演緊土風舞。睇下banner，國際土風舞大賽。旅遊產業綽頭噃。
坐喺河邊等車，咁又一日！
No comments:
Post a Comment