西藏遊（十九） 2011.09.16張家界（二）寶峰湖風景區，十里畫廊

西藏遊（十九）張家界（二）寶峰湖風景區，十里畫廊

文章日期：02/08/2012 06:29 pm

橋伕橫衝直撞，遊人奪命而逃

西藏遊（十九）

2011.09.16張家界（二）寶峰湖風景區，十里畫廊

噚日買嘅飛今日都用得，打手指模入場，順利進入。寶峰湖湖面處於高山上，入場後要行一段長命斜，先可到達。唔係人人有能力撑上斜路，抬轎呢門生意就應運而生喇。唐人，一講揾食，就乜都得。呢班轎伕，一有客人坐上去，就開足turbo，喺條又窄、又斜、逼滿人嘅石級路，口中大嗌「走開！走開！」，急步橫衝直撞，如果你走唔切，唔可以縮理一邊，就會撞到你。轎伕重會擰轉頭臭罵你，點解唔速速「八格開路！」，睇唔到我開緊工咩！揾食喎，梗係大晒！

行完呢段斜路，穿過小樹林，轉個彎，豁然開朗，寶峰湖就在眼前。除咗湖光山色外，你重睇到人山人海，十分壯觀。導遊安排上船遊湖。各位坐定，船上土族打扮嘅啊妹作簡介。湖中兩岸邊分別有兩隻停泊嘅船，有擅唱嘅土族啊哥啊妹各駐一隻船，同遊覽船上嘅客人對唱土族山歌。我哋派出Peter應戰，佢當然不負眾望，差啲要留低做土族姑爺，問過Sara先！

落咗船，沿另一邊落山，返回起點，今朝就係咁嘞。搭旅遊車返回張家界市中心，揾間餐館食晏。

我就帶咗pack lunch，就喺對面馬路，揾個地方，搞掂我早餐預留嘅烚蛋饅頭，填飽個肚後就行吓呢個市。經過一間診所，由窗廚望入去，着住白袍，撻住粗邊膠拖鞋嘅醫生正在同病人診症，冇遮冇掩，夠晒開放。又有一間美容店，美容師正在幫客做「非素」，隔離嗰位店員小姐捧住飯兜扒飯，非常賓至如歸。又有格仔舖，都幾趨時。行行吓，居然喺路邊電燈柱，見到香港特區區旗。原來喺國際土風舞節，香港亦有派隊參加。

午餐後，繼續行程，今次搭小火車睇十里畫廊。所謂十里畫廊，就係沿住火車路向外望嘅山景，可謂風景如畫。我哋搭小火車去，然後行路返。下午呢個行程，兩三粒鐘就搞點喇。

當地導遊當然唔會錯過每分每秒揾真銀，喺食飯前帶成團人去買茶葉同埋竹纖維底褲。呢啲「團購」我最憎，浪費我寶貴旅遊時間，更侮辱我嘅智慧，我乜都唔會買！

今晚係呢個團最後一晚，明日要執行李check out喇。